InfoHub Logo

تۇركيادا ستامبۇل مەرى ەكرەم يماموعلىنىڭ قاماۋعا الىنۋى ەلدى ءدۇر سىلكىندىرىپ،جاعدايدى ودان ءارى شيەلەنىستىرۋدە،-دەپ حابارلايدى Infohub.kz.

تۇركيانىڭ بىرنەشە ءىرى قالاسىندا بيلىككە قارسى نارازىلىقتار ءورشىپ تۇر. وعان ستامبۇل مەرى ەكرەم يماموعلىنىڭ قاماۋعا الىنۋى سەبەپ بولدى. وپپوزيسيا جەتەكشىلەرىنىڭ ءبىرى سانالاتىن يماموعلى "جەمقورلىق" جانە "تۇركيادا تىيىم سالىنعان كۇردتەردىڭ جۇمىسشىلار پارتياسىن قولداۋ" ايىپتارى بويىنشا تەرگەلگەن سوڭ سوت ونى قاماۋعا الۋ تۋرالى شەشىم شىعاردى.

ەلدى دۇرلىكتىرگەن ۇستاۋ

ستامبۇل مەرىن سەنبى كۇنى شامامەن بەس ساعات بويى تەرگەدى. ول وزىنە تاعىلعان ايىپتاردى جوققا شىعارىپ، مۇنىڭ ءبارىن ساياسي قىسىم دەپ اتادى. تۇركياداعى وپپوزيسيالىق حالىقتىق-رەسپۋبليكالىق پارتياسى (حرپ) يماموعلىنى 2028 جىلعى پرەزيدەنت سايلاۋىنا ۇمىتكەر رەتىندە تاڭداۋعا دايىندالىپ جاتقان ەدى. الداعى سايلاۋدا ول پرەزيدەنت رەجەپ تايىپ ەردوعاننىڭ باستى قارسىلاسى بولۋى مۇمكىن دەپ بولجانعان.

الايدا، سوت ونىڭ "قىلمىستىق توپ قۇرىپ باسقارعانىن، پارا العانىن، بوپسالاۋمەن اينالىسقانىن، جەكە دەرەكتەردى زاڭسىز تىركەگەنىن جانە تەندەرلەر ناتيجەسىن بۇرمالاعانىن" مالىمدەپ، ونى تۇتقىنداۋ تۋرالى شەشىم شىعاردى. وسىدان كەيىن حالىق جاپپاي كوشەگە شىعىپ، نارازىلىق باستالدى.

نارازىلىقتار جانە قاقتىعىستار

قالا تۇرعىندارى مەن وپپوزيسيا جاقتاستارى نارازىلىق اكسيالارىن تەك ستامبۇلدا عانا ەمەس، انكارا، يزمير، ادانا، انتاليا، چاناككالە، ەسكىشەحير، كونيا جانە ەدىرنە قالالارىندا دا وتكىزدى. تۇركيانىڭ ىشكى ىستەر ءمينيسترى ءالي ەرليكايانىڭ مالىمەتىنشە، نارازىلىق كەزىندە 340-تان استام ادام ۇستالعان.

ستامبۇلدىڭ ساراچانە اۋدانىندا پوليسيا دەمونسترانتتاردى تاراتۋ ءۇشىن كوزدەن جاس اعىزاتىن گاز بەن سۋ اتقىشتارىن قولداندى. كەيبىر كۋاگەرلەر پوليسيانىڭ رەزەڭكە وقپەن اتقانىن حابارلادى. مينيستر ەرليكايا نارازىلىق كەزىندە ءبىر دەمونسترانتتىڭ پوليسيا قىزمەتكەرىنە قىشقىل شاشىپ، شابۋىلداعانىن مالىمدەدى.

بيلىكتىڭ رەاكسياسى

رەجەپ تايىپ ەردوعاننىڭ ۇكىمەتى نارازىلاردى "ەلدىڭ تىنىشتىعىن بۇزىپ، حالىقتى ەكىگە ءبولدى" دەپ ايىپتادى. ال حرپ جەتەكشىسى وزگۋر وزەل يماموعلىنىڭ قاماۋعا الىنۋىن "كەلەسى پرەزيدەنتكە قارسى جاسالعان توڭكەرىس ارەكەتى" دەپ باعالادى.

نارازىلىققا بايلانىستى بيلىك سوت عيماراتتارىنا باراتىن جولداردى جاۋىپ، جاقىن ماڭداعى مەترو ستانسيالارىن بەكىتىپ، جۇزدەگەن پوليسيا قىزمەتكەرى مەن ونداعان ارنايى تەحنيكا جۇمىلدىردى. سوعان قاراماستان، ستامبۇلدا حالىق بەسىنشى كۇن قاتارىنان قالا اكىمدىگى الدىنا جينالىپ، بيلىككە قارسى ۇراندار ايتۋدا.

قازاقستان كونسۋلدىعىنىڭ ەسكەرتۋى

تۇركيادا جۇرگەن قازاقستاندىقتارعا قازاقستاننىڭ ستامبۇلداعى باس كونسۋلدىعى مالىمدەمە جاسادى. وندا ازاماتتارعا حالىق كوپ جينالاتىن ورىندارعا بارماۋ، ميتينگىلەرگە قاتىسپاۋ جانە قاۋىپسىزدىك شارالارىن ساقتاۋعا شاقىرۋ ايتىلعان. سونداي-اق، جاڭالىقتاردى قاداعالاپ، قازاقستاننىڭ تۇركياداعى ديپلوماتيالىق وكىلدىكتەرىمەن بايلانىستا بولۋ ۇسىنىلدى.

تۇركيا قايدا بەت الىپ بارادى؟

ەكرەم يماموعلىنىڭ قامالۋى تۇركياداعى ساياسي لاندشافتقا ۇلكەن وزگەرىس اكەلۋى مۇمكىن. ونىڭ تانىمالدىعى ارتىپ كەلە جاتقاندىقتان، وپپوزيسيا جاقتاستارى بۇل ارەكەتتى بيلىكتىڭ قارسىلاستارىن السىرەتۋ امالى دەپ سانايدى. ال ساراپشىلاردىڭ پىكىرىنشە، بۇل جاعداي 2028 جىلعى پرەزيدەنت سايلاۋىنىڭ الدىندا ەلدەگى ساياسي شيەلەنىستى كۇشەيتپەك.

قازىرگى ۋاقىتتا تۇركيادا جاعداي تۇراقسىز. وپپوزيسيانىڭ ارى قارايعى قادامدارى، بيلىكتىڭ رەاكسياسى جانە حالىق نارازىلىعىنىڭ قانشالىقتى سوزىلاتىنى الداعى كۇندەرى بەلگىلى بولماق.