قارلىعاش
كوكتەم شىعا بەرە ورمان اراسىنداعى قازاق ءۇي شاڭىراعىنىڭ ىشكى كەنەرەسىنە ۇيا سالعان قارلىعاش، بالاپاندارى جۇمىرتقادان شىققان سوڭ قۇلاپ كەتپەسىن دەگەن نيەتپەن اياقتارىن قىلمەن ماتاستىرىپ تاستاعان. ەرەكشە ءبىر ادەتى — ۇيانى ۇنەمى تازا ۇستايتىن، ءتىپتى بالالارىنىڭ قيىنا دەيىن سىرتقا الا كەتەتىن. سوندىقتان با، الدە باسقا سەبەبى بار ما، ايتەۋىر ادامدار وزىنە قۇرمەتپەن قارايتىنىن ىشتەي سەزەتىن. جانە مۇنداي جەرگە زياندى جاندىكتەر، ءتىپتى جىلاننىڭ دا جولامايتىنىن جاقسى بىلەتىن.
بۇل ءۇيدىڭ وتاعاسى جاناربەك قاريا مال شارۋاشىلىعىمەن اينالىساتىن. اسىرەسە ءىرى قارا تۇقىمىن اسىلداندىرۋعا ەرەكشە ءمان بەرەتىن. مەزگىلىمەن ورىسكە شىعارۋ، سۋارۋ، جەمدەۋ ءتارىزدى جۇمىستاردىڭ جۇيەلى اتقارىلۋىن تالاپ ەتەتىن. كومەكشىلەرى ونىڭ ايتقانىن قالت جىبەرمەي مۇلتىكسىز ورىندايتىن. سوندىقتان دا بولار، سوڭعى ەكى-ۇش جىلدا شارۋاسى وڭعا باسىپ، قىستاۋىنا شاعىن ءسۇت فەرماسىن ۇيىمداستىردى. مەملەكەتتىڭ كومەگىنە ارقا سۇيەپ، جۇمىسشىلار جالدادى. ولاردى تۇرعىن ۇيمەن قامتاماسىز ەتتى. ءسويتىپ، كەشەگى جالعىز قىستاۋ بىرتىندەپ ەلدى مەكەنگە اينالا باستادى.
قارلىعاش مۇنىڭ ءبارىن دە ءوز كوزىمەن كورگەن. جىل سايىن وسىندا كەلىپ بالاپان شىعارۋدى ادەتكە اينالدىردى. بيىل كوڭ ساسىعان قىستاۋدى قويا تۇرىپ، اۋاسى تازا، اينالاسى اشىق قازاق ءۇيدى مەكەندەگىسى كەلگەن. بۇل شارۋا ونىڭ ويلاعانىنداي بولىپ، ۋاقىت ءوز بابىمەن ءوتىپ جاتقان.
ءبىر كۇنى اعا باقتاشىنىڭ:
— بورداقىعا الىنعان مالدى ءشوبى شۇيگىن ايماققا اپارعانىمىز ءجون سياقتى، — دەگەن داۋسىن قۇلاعى شالىپ قالدى. شاڭىراققا قونىپ وتىرعان قارلىعاش ات ۇستىندەگى جاناربەك قاريانى بايقادى.
— مالشىلارعا قاجەت قوي، ءۇيدى جىعامىز با، قايتەمىز؟
— قارلىعاش — كيەلى قۇس، بالاپاندارىن ۇشىرىپ اكەتكەنشە تيىسپەڭدەر.
— جارايدى.
— جىگىتتەرگە ايت، ۋاقىتشا جاپپا جاساپ السىن.
— ماقۇل!
مىنا جىلى سوزگە قارلىعاشتىڭ ريزا بولعانى سونشالىق، قۋانعانىنان ەرىكسىز سايراپ جىبەردى.
You Might Also Like
-
ايدانا ناۋرىز مەرەكەسى كۇنى اجەسىنە ەرىپ، الماتىداعى رەسپۋبليكا الاڭىنا باردى.
-
بيىك ءارى تىك ۇلكەن جارتاستىڭ تۇسىنداعى قۋىستارعا قونىستانعان ۇيرەك پەن قازداردىڭ بالاپان شىعاراتىن مەزگىلى جاقىنداپ قالعان. جىل سايىن ۇيادان تومەن قاراي سەكىرگەن اق ۇرپەكتەردى بە...
