InfoHub Logo

رىسقۇلبەكوۆ قايرات نوعايباي ۇلى — 1986 جىلعى جەلتوقسان كوتەرىلىسىنىڭ قاھارمانى. قايرات رىسقۇلبەكوۆ 1966جىلى جامبىل وبلىسى مويىنقۇم اۋدانى بىرلىك اۋىلىندا دۇنيەگە كەلگەن. 1973-81 جىلدارى شۋ اۋدانى تولە بي اۋىلىندا س. شاكىروۆ اتىنداعى مەكتەپ-ينتەرناتتا 8 جىلدىق ءبىلىم الادى. 1981-83 جىلدارى بىرلىك اۋىلىنداعى ورتا مەكتەپتى بىتىرەدى. 1984-86 جىلدارى امۋر ولكەسى بەلوگور قالاسىندا اسكەري مىندەتىن وتەيدى.

1986 جىلى اسكەري بولىمشەنىڭ جولداماسىمەن الماتىداعى ساۋلەت-قۇرىلىس ينستيتۋتىنا وقۋعا تۇسەدى. وسى جىلى 16-18 جەلتوقساندا بولعان قازاق جاستارىنىڭ وتارشىلدىق جانە امىرشىلدىك جۇيەگە قارسى كوتەرىلىسىنە بەلسەنە قاتىسادى. ءبىراق كوتەرىلىس جانشىلعاننان كەيىن 1987 جىلدىڭ قاڭتارىندا ىشكى ىستەر ورگانىنىڭ قىزمەتكەرلەرى «الماتىدا ءبىر توبەلەسكە قاتىستى» دەگەن جەلەۋمەن قايراتتى قاماۋعا الادى. كەيىننەن، كوپشىلىككە ءمالىم بولعانداي، تەرگەۋشىلەر نەشە ءتۇرلى ايلا-شارعىلار قولدانا وتىرىپ، ونى س.ساۆيسكييدىڭ ولىمىنە كىنالى ەتەدى. قازاق كسر-سى جوعارعى سوتىنىڭ قىلمىستىق ىستەر جونىندەگى كوللەگياسىنىڭ ءتوراعاسى ە.گرابارنيكتىڭ 1987 جىلى 16 ماۋسىمداعى ۇكىمىمەن رىسقۇلبەكوۆ ەڭ جوعارى جازا (ءولىم)-اتۋ جازاسىنا بۇيىرىلدى. زيالى قاۋىم وكىلدەرى كوكپ باس حاتشىسى گورباچيەۆ پەن كسرو جوعارى كەڭەسى ءتورالقاسىنىڭ ءتوراعاسى گرومىكونىڭ اتىنا رىسقۇلبەكوۆتىڭ جازاسىن جەڭىلدەتۋ تۋرالى ءوتىنىش جولدادى. كەيىنەن اتۋ جازاسى امالسىزدان 20 جىلعا باس بوستاندىعىنان ايىرۋ جازاسىمەن اۋىستىرىلدى. ءبىراق شۋ، قاراعاندى تەمىر جول بەكەتتەرى ارقىلى رىسقۇلبەكوۆ سەمەي تۇرمەسىنە جەتكىزىلىپ، قۇپيا جاعدايدا ونىڭ ومىرىنە قاستاندىق جاسالدى.

جەلتوقسان كوتەرىلىسىنىڭ قۇربانى بولعان رىسقۇلبەكوۆ ەلىمىز ەگەمەندىك العاننان كەيىن قازاقستان جوعارعى سوتى پلەنۋمىنىڭ 1992 جىلعى 21 اقپانداعى شەشىمىمەن اقتالدى. وعان «حالىق قاھارمانى» اتاعى بەرىلدى.

وقۋعا كەڭەس بەرەمىز:

سوڭعى حات

قايرات رىسقۇلبەكوۆ (ۆيدەو)

---