akorda.kz
قازاقستان تۇركى الەمىنىڭ جاساندى ينتەللەكت ورتالىعىنا اينالادى: توقايەۆ جاڭا ۋنيۆەرسيتەت اشاتىنىن مالىمدەدى
قازاقستان پرەزيدەنتى قاسىم-جومارت توقايەۆ تۇركى مەملەكەتتەرى ۇيىمىنىڭ بەيرەسمي سامميتىندە ەلدە جاساندى ينتەللەكت سالاسىنداعى جاڭا فورماتتاعى جوعارى وقۋ ورنىن اشۋ جانە بارلىق تۇركى ەلدەرىنەن ستۋدەنتتەر ءۇشىن ارنايى گرانتتار ءبولۋ جوسپارىن مالىمدەدى.
بۇل تۋرالى Infohub.kz اقپارات اگەنتتىگى حابارلايدى.
تۇركى ەلدەرىمەن ىنتىماقتاستىقتى نىعايتۋ
مەملەكەت باسشىسىنىڭ ايتۋىنشا، قازاقستان جاساندى ينتەللەكت جانە سيفرلىق تەحنولوگيالار سالاسىنداعى تۇركى ەلدەرىنىڭ ىنتىماقتاستىعىن كۇشەيتۋگە نيەتتى.
«ءبىز قازاقستاندا جاڭا فورماتتاعى تەحنولوگيالىق وقۋ ورنىن — جاساندى ينتەللەكت ۋنيۆەرسيتەتىن اشۋدى جوسپارلاپ وتىرمىز. بارلىق تۇركى مەملەكەتتەرىنەن ازاماتتاردى وقىتۋ ءۇشىن ارنايى گرانتتار بولۋگە دايىنبىز»، — دەدى ول.
عىلىمي-تەحنولوگيالىق وليمپيادا جانە ينۆەستيسيالىق قور
پرەزيدەنت سونداي-اق جاساندى ينتەللەكت جانە وزىق سيفرلىق تەحنولوگيالارعا ارنالعان تۇركى ەلدەرى جاستارى اراسىندا جىل سايىن عىلىمي-تەحنولوگيالىق وليمپيادا وتكىزۋدى ۇسىندى. ونىڭ ايتۋىنشا، بۇل باستامالارعا تۇركى ينۆەستيسيالىق قورى قارجىلاي قولداۋ كورسەتە الادى.
«بۇل قور ناقتى جوبالار بويىنشا جۇمىس ىستەۋدە تيىمدىلىگىن دالەلدەدى. ونىڭ جارعىلىق كاپيتالى 600 ميلليون دوللارعا جەتتى جانە الداعى ۋاقىتتا ۇلعايۋى مۇمكىن. قور تۇركى كەڭىستىگىندە ستارتاپتاردى قولداۋ جانە ءىرى ينفراقۇرىلىمدىق جوبالاردى جۇزەگە اسىرۋ ءۇشىن ستراتەگيالىق قۇرال بولۋعا ءتيىس. مەن مۇشە مەملەكەتتەردى بۇل جۇمىسقا بەلسەندى قاتىسۋعا شاقىرامىن»، — دەپ اتاپ ءوتتى مەملەكەت باسشىسى.
Turkic AI ورتالىعىن قۇرۋ
توقايەۆ سونداي-اق تۇركى مەملەكەتتەرىنىڭ IT-ستارتاپتارىنىڭ بىرىككەن ورتالىعىن «Turkic AI» دەگەن اتاۋمەن قۇرۋدى ۇسىندى. بۇل الاڭدى alem.ai حالىقارالىق تەحنوپاركىنىڭ بازاسىندا ورنالاستىرۋ جوسپارلانۋدا. پرەزيدەنتتىڭ ايتۋىنشا، جاڭا ورتالىق تەحنولوگيالىق جوبالاردى بىرىكتىرىپ، جاساندى ينتەللەكت جانە سيفرلىق ازىرلەمەلەر سالاسىنداعى تۇركى ەلدەرىنىڭ ىنتىماقتاستىعىن كۇشەيتۋگە ءتيىس.
«بۇگىندە ءار ەلدە IT-جوبالارعا باعىتتالعان ءوز تەحنوپاركتەرى بار. مەن تۇركى كەڭەسىنە مۇشە مەملەكەتتەردىڭ IT-ستارتاپتارىنىڭ بىرىككەن ورتالىعىن اشۋدى ۇسىنامىن. بۇل ورتالىققا «Turkic AI» دەگەن اتاۋ بەرۋگە بولادى جانە ونى Alem.ai حالىقارالىق تەحنوپاركىنىڭ بازاسىندا ورنالاستىرۋعا بولادى»، — دەدى ول.
رۋحاني قۇندىلىقتاردى ساقتاۋ
توقايەۆ جاساندى ينتەللەكتتى دامىتۋ رۋحاني جانە مادەني قۇندىلىقتاردى ساقتاي وتىرىپ ءجۇرۋى كەرەك ەكەنىن دە اتاپ ءوتتى.
«جاساندى ينتەللەكت پەن جوعارى تەحنولوگيالاردى دامىتا وتىرىپ، رۋحاني جانە مادەني قۇندىلىقتاردى ۇمىتپاۋ كەرەك. تۇركى سيۆيليزاسياسىنىڭ باي مۇراسىن ساقتاۋ جانە تاريحي جادىنى جاڭعىرتۋ — باستى مىندەت»، — دەدى پرەزيدەنت.
-
شىمكەنتتە 23 جاستاعى سانيا جۇبانىشيەۆانىڭ ءولىمى قوعامدى دۇرلىكتىردى. قىزدىڭ ادۆوكاتى ونى نەگىزسىز قاماۋعا العانىن، ال قىلمىستىق ءىس وعان قارسى باعىتتالعانىن ايتۋدا.
-
قازاقستاندىقتاردىڭ شەتەلگە جاپپاي اعىلۋى – تەك تابىس تابۋدىڭ جەكە جولى ەمەس، ەلدەگى الەۋمەتتىك-ەكونوميكالىق جاعدايدىڭ كەڭ ينديكاتورى. بىلىكتى مامانداردىڭ شەتەلگە كەتۋى «brain drain» قۇبىلىسىن تۋدىرىپ، ەل ەكونوميكاسىنا كەرى اسەر ەتۋدە.
