InfoHub Logo

قازاقستان – ۇلى دالا ەلى
ەۋروپانىڭ ءدال ورتاسىنداعى، جۇرەگى اتانعان ەل – قازاق ەلى. قازاقستان - ۇشقان قۇستىڭ قاناتى تالاتىنداي ۇلان – عايىر اۋماقتىڭ يەسى. مەن ماقتانىشپەن، كوكىرەگىمدى كوككە كوتەرىپ «مەن قازاقستاننىڭ جاس ۇرپاعىمىن، كەلەشەگىمىن!» - دەپ جارياعا جار سالا الامىن.
تاۋەلسىزدىك - قازاق حالقىنىڭ وشكەنىن جاندىرىپ، ولگەنىن ءتىرىلتتى. الماتى مەن استانادا، وبلىس ورتالىقتارى مەن ءىرى ەلدى مەكەندەردە كەرەي مەن جانىبەك، ابىلاي مەن ءابىلقايىر سياقتى ايگىلى حاندارىمىزدىڭ، قابانباي، بوگەنباي، ناۋرىزباي باتىرلاردىڭ ەڭسەلى ەسكەرتكىشتەرى بوي كوتەرىپ، ولاردىڭ ەسىمدەرى ەلدى - مەكەندەرگە، جوعارى وقۋ ورىندارى مەن مەكتەپتەرگە بەرىلدى. بابالاردىڭ ەرلىك پەن كۇرەسكە تولى ونەگەلى ءومىر جولدارى جايلى توم - توم عىلىمي ەڭبەكتەر مەن ادەبي شىعارمالار جازىلدى. تاۋەلسىزدىكپەن بىرگە ورالىپ، ۇرپاعىنا ۇلانعايىر قونىس قالدىرعان باتىر بابالارىمىزدىڭ بيىك رۋحى قازاقتاردىڭ، اسىرەسە، جالىنداعان جاستاردىڭ اراسىندا اسا زور پاتريوتتىق ورلەۋ تۋعىزىپ، ۇلت تاريحىنا دەگەن ماقتانىش سەزىمىن ۇيالاتتى. تەك وتكەن تاريحىمەن عانا ماقتاناتىن ەلدىڭ بولاشاعى بۇلىڭعىر. ءار بۋىن وكىلدەرى اتا - بابا داڭقىنا داڭق قوسىپ، ابىرويىن ارتتىرىپ، بۇكىل دۇنيە ءجۇزى الدىندا بەدەلىن بيىكتەتە بىلگەن ەلدىڭ عانا بولاشاعى جارقىن، مەرەيى ۇستەم بولادى. وسى تۇرعىدان كەلگەندە تاۋەلسىز قازاقستاننىڭ جاستارى بابالار اماناتىنا ادالدىق تانىتىپ، ەلىمىزدىڭ ابىروي - بەدەلىن بۇرىن - سوڭدى بولماعان بيىككە كوتەردى.
ءبارىمىزدىڭ كيەلى اتا-مەكەنىمىز بار، ول - قازاقتىڭ ۇلى دالاسى. سول دالادا بابالاردىڭ ىزگى اماناتىن ورىنداۋ جولىندا ءبىز قۇرعان قاسيەتتى وتانىمىز بار. ول - تاۋەلسىز قازاقستان. تاۋەلسىزدىك - ءبىزدىڭ ماڭدايعا باسقان باعىمىز، ماڭگى ساقتاۋعا ءتيىس اماناتىمىز. قاسيەتتى وتانىمىزدا قانداي قيىندىقتى دا قايىسپاي قارسى الۋعا لايىق ءورشىل رۋحتى، ازات ويلى، جاسامپاز حالقى بار. ول - ەرجۇرەك قازاق حالقى. سول قاھارمان حالىقتىڭ العا قويعان ىزگى مۇراتى بار. ول - ۇلى دالا توسىندە ءوزى قۇرعان مەملەكەتتى ماڭگىلىك ەل جاساۋ.
پرەزيدەنتىمىز ن. ءا. نازاربايەۆ ءوزىنىڭ «ماڭگىلىك ەل» باعدارلاماسىندا «ماڭگىلىك ەل» ۇعىمى كەڭ ءارى وسى ەكى اۋىز ءسوز قازاق حالقىنىڭ وتكەنى مەن بولاشاعى ەكەنىڭ اشىق تۇردە ايتىپ وتكەن بولاتىن. ەگەمەندى ەل بولىپ قالىپتاسۋ جولىنداعى قيىنشىلىقتارىمىزدى تىلگە تيەك ەتسەك، بالكىم قاعاز بەتىنە سىيماس. وسى ۋاقىتقا دەيىن تار جول، تايعاق كەشىپ، مويىماي وتتىك. ءار قازاقتىڭ جادىندا قورقىنىشتى ءتۇس سەكىلدى ساقتالعان ىزعارلى جەلتوقسان وقيعاسى.
ارينە، جەلتوقسان وقيعاسىن ۇمىتۋ مۇمكىن ەمەس. جەلتوقساننىڭ جەلى، ايازى، ىزعارى «قاندى مۇزدا» تالاي قازاق جازىق بولدى. ۇلت قامى ءۇشىن سول كۇنى الاڭعا، قايسار قازاق قىزدارى دا شىقتى. تالاي قازاق قىزدارىن دا، گۇلدەرىن دە جەلتوقسان سولدىرىپ، توڭدىردى.
ەگەمەندىك – بۇل ەلىمنىڭ ەلدىگى،
ەگەمەندىك – بارلىق ۇلتتىڭ تەڭدىگى.
ەگەمەندىك – ەلىن، جەرىن قورعاعان،
ەربول مەنەن قايراتتاردىڭ ەرلىگى،- دەپ مارفۋعا اپايىمىز جىرلاعانداي، ونى ۇنەمى جۇرەگىمىزگە ساقتاۋىمىز كەرەك. تاۋەلسىزدىگىمىزگە جيىرما بەس جىل تولىپ، ەلىمىز قۇرساۋدان بوسادى. اتا – بابالارىمىزدىڭ ءۇمىتى اقتالىپ، كوك تۋىمىز كوگىمىزدە جەلبىرەپ تۇر.
ەندەشە، ءارقاشان ەلىمىز امان، باۋىرىمىز ءبۇتىن بولسىن. ەلىمىز قۇرعان تاۋەلسىز قازاقستانىمىز ماڭگىلىك ەلگە اينالسىن! ۇلى ماقساتتارعا جەتۋ جولىندا بىزگە باتىر بابالاردىڭ ارۋاعى جار بولسىن! ءبىزدىڭ قاسيەتتى جەرىمىزدى ىقىلىم زامانداردان ۇلى دالا دەپ، ال بابالارىمىزدى ۇلى دالانىڭ ۇرپاقتارى دەپ اتاعان. ءبىز - سولاردىڭ جالعاسىمىز، ۇلى دالانىڭ مۇراگەرلەرىمىز. وسىناۋ كەڭ بايتاق ۇلى دالانىڭ كوگىندە حالقىمىزدىڭ ب ا ق جۇلدىزى بولىپ جاڭا قازاقستان دۇنيەگە كەلدى. ءبىزدىڭ قازاقستانىمىز - ۇلى ىستەردىڭ ۇيىتقىسى بولعان ۇلى دالا ەلى! بۇل - ءبىزدىڭ تاعدىرىمىز! بۇل - ءبىزدىڭ تاڭداۋىمىز! ماڭگىلىك ەلىمىزدە بەيبىتشىلىك پەن بەرەكە بولسىن! حالقىمىز امان بولسىن!
سەن دەگەندە، قازاقستان،
جۇرەكتەن وت لاۋلاپ ۇشقان.
گۇلدەي جايناپ، قۇلپىرا بەر،
ەگەمەن ەل - قازاقستان!