InfoHub Logo

قازاقستاندىق سينوپتيكتەردىڭ الدىن الا مالىمەتىنشە، 2025/2026 جىلعى قىس ەلىمىزدە قالىپتىدان ءسال جىلى، ءبىراق اۋا تەمپەراتۋراسىنىڭ كۇرت اۋىتقۋلارى، بوران مەن كوكتايعاق ءجيى بايقالاتىن ماۋسىم بولۋى مۇمكىن. بۇل تۋرالى infohub.kz اقپارات اگەنتتىگى حابارلايدى.

🌨 قاراشا– العاشقى بوراندار مەن «تەمپەراتۋرالىق تەربەلىستەر»

قاراشا ايىندا قازاقستاننىڭ باسىم بولىگىندە قار، ال وڭتۇستىك جانە وڭتۇستىك-باتىستا – جاڭبىر مەن قار ارالاس جاۋىن-شاشىن كۇتىلەدى.
سولتۇستىك، ورتالىق جانە شىعىس وڭىرلەردە كوكتايعاق پەن تۇمان جيىلەيدى.

سينوپتيكتەردىڭ بولجامىنشا:

• تۇندە اۋا تەمپەراتۋراسى –2…–7 °C-تان +5 °C-قا دەيىن،

• كۇندىز +5…+10 °C شاماسىندا بولادى.
  اي سوڭىندا –15…–20 °C دەيىن سۋىتۋى ىقتيمال.

وڭتۇستىك پەن باتىس وڭىرلەردە تۇنگى تەمپەراتۋرا –3…–12 °C، كۇندىز +6…+18 °C ارالىعىندا.
قاراشا سوڭىندا مۇندا دا -15 °C دەيىنگى ايازدار بولۋى مۇمكىن.

ايلىق ورتاشا تەمپەراتۋرا نورماعا جاقىن، ءبىراق 1°س جوعارى، ال جاۋىن-شاشىن مولشەرى – كليماتتىق نورما شەگىندە.

❄️ جەلتوقسان – قالىپتى قىس، كەي جەرلەردە ءسال جىلى

جەلتوقساندا ەلىمىزدىڭ كوپ وڭىرىندە اۋا تەمپەراتۋراسى نورماعا ساي نەمەسە 1°س جوعارى بولادى.
تەك شىعىس جانە سولتۇستىك-شىعىستا ءسال سۋىعىراق بولۋى ىقتيمال.
جاۋىن-شاشىن مولشەرى – نورما شەگىندە، ورتالىق پەن شىعىستا – ازداۋ.

بۇل ايدا قازاقستان اۋماعىنا سۋىق اۋا ماسسالارى ءجيى ەنىپ، قاتتى جەل، بوران جانە تۇماندى كۇندەر بولۋى مۇمكىن.

🧊 قاڭتار – ايازدار، ءبىراق انومالياسىز

قاڭتار ايىندا تەمپەراتۋرا قالىپتى دەڭگەيدە، تەك شىعىستا ازداپ تومەن بولۋى مۇمكىن.
جاۋىن-شاشىن – نورما شاماسىندا، ال تاۋلى ايماقتاردا ادەتتەگىدەن كوبىرەك.

بۇل ايدا قاتتى سۋىق تولقىندار بولۋى ىقتيمال، ءبىراق ۇزاققا سوزىلمايدى.
كوپتەگەن وڭىرلەردە تۇراقتى قار قاباتى قالىپتاسادى.

🌤 اقپان جانە ناۋرىز – جىلىراق جانە قارلى كەزەڭ

اقپان ايىندا قىس ەڭ جۇمساق بولادى: ورتاشا تەمپەراتۋرا نورمادان 1–2 °C جوعارى.
جاۋىن-شاشىن – نورما دەڭگەيىندە.
ناۋرىزدا كۇن بىرتىندەپ جىلىنا باستايدى، اسىرەسە وڭتۇستىكتە.

تاۋ بوكتەرلەرىندە جانە وڭتۇستىك-شىعىس ايماقتاردا قار مولىراق تۇسەدى،
ال ماڭعىستاۋ وبلىسىندا – كەرىسىنشە، جاۋىن-شاشىن از بولادى.

🔎 ساراپتامالىق باعا

كليمات ماماندارىنىڭ ايتۋىنشا، سوڭعى جىلدارى قازاقستانداعى ورتاشا قىسقى تەمپەراتۋرا ونجىلدىق سايىن شامامەن 0،3–0،4 °C-قا ءوسىپ كەلەدى.
بۇل تەندەنسيا جۇمساق ءارى اۋىسپالى قىستاردىڭ جيىلەۋىنە اسەر ەتۋدە.

دەگەنمەن، ەل-نينو نەمەسە لا-نينيا قۇبىلىستارى سەكىلدى جاھاندىق كليماتتىق فاكتورلار قىس مەزگىلىندە ايماقتىق سۋىق تولقىندار مەن بورانداردى تۋدىرۋى مۇمكىن.

2025/2026 جىلعى قىس قازاقستاندا قالىپتىدان جىلى، ءبىراق تۇراقسىز بولادى دەپ كۇتىلەدى:

• اي سايىن اۋا رايىنىڭ كۇرت وزگەرۋى،

• بوران، كوكتايعاق جانە جەلدىڭ كۇشەيۋى،

• ال وڭتۇستىكتە – ءجيى جاڭبىر مەن قار ارالاس جاۋىن-شاشىن كۇتىلەدى.

سينوپتيكتەردىڭ ناقتى ايلىق جانە اپتالىق بولجامدارىن Kazhydromet.kz رەسمي سايتىنان تۇراقتى تۇردە باقىلاپ وتىرعان ءجون.