InfoHub Logo

2025 جىلدىڭ 15 قازانىندا جۇڭگو، قىرعىزستان، وزبەكستان جانە تۇرىكمەنستان اراسىنداعى جاڭا حالىقارالىق جۇك تاسىمالداۋ باعىتى رەسمي تۇردە ىسكە قوسىلدى. بۇل تۋرالى infohub.kz اقپارات اگەنتتىگى حابارلايدى. جاڭا مارشرۋتتىڭ باستى ەرەكشەلىگى – قازاقستان اۋماعىن اينالىپ ءوتىپ، قىتايدان ورتالىق ازيا ارقىلى ەۋروپاعا دەيىن جۇك جەتكىزۋگە مۇمكىندىك بەرۋى.

جاڭا ساۋدا باعىتىنىڭ قۇرىلىمى

كاشگار قالاسىنان (جۇڭگو) شىققان العاشقى جەتى جۇك كولىگى قۇرامىندا جارىقتاندىرۋ جابدىقتارى، مەحانيكالىق بۇيىمدار جانە حالىق تۇتىناتىن تاۋارلار بار. ولار 15 قازاندا قىرعىزستانمەن شەكاراعا بەت الىپ، 21 قازاندا وزبەكستانعا، ال 24 قازاندا تۇرىكمەنستانعا جەتەدى دەپ جوسپارلانعان. تۇرىكمەنباشى پورتىنا كەلگەن سوڭ، جۇكتىڭ ءبىر بولىگى كاسپيي تەڭىزى ارقىلى ازەربايجاننىڭ باكۋ قالاسىنا جونەلتىلەدى.

بۇل باعىت بىرنەشە كولىك ءتۇرىن قامتيدى:

• سيان مەن چەندۋ قالالارىنان كاشگارعا دەيىن – تەمىرجول؛

• كاشگاردان وشقا دەيىن – اۆتوكولىكپەن؛

• وشتان تۇرىكمەنباشىعا دەيىن – قايتادان تەمىرجولمەن؛

• كاسپيي ارقىلى ازەربايجانعا – پاروممەن.

قازاقستان نەگە تىس قالدى؟

جاڭا باعىتتىڭ اشىلۋى – جۇڭگو مەن ورتالىق ازيا ەلدەرىنىڭ جۇك تاسىمالىنداعى ءارتاراپتاندىرۋ ستراتەگياسىنىڭ ءبىر بولىگى. ساراپشىلار بۇل قادامدى «ورتا ءدالىزدى» دامىتۋ جوسپارىنا ساي كەلەدى دەپ وتىر. الايدا بۇل جوبا قازاقستان ءۇشىن جاعىمسىز جاڭالىق بولۋى مۇمكىن.

سوڭعى ۋاقىتتا قازاقستان ارقىلى وتەتىن جۇك تاسىمالى كولەمىنىڭ ازايۋى بايقالادى. Ulysmedia.kz دەرەگىنشە، قىتايمەن شەكارادا 10 مىڭعا جۋىق جۇك كولىگى جينالىپ قالعان. بۇل لوگيستيكالىق ماسەلەلەر مەن بيۋروكراتيالىق كەدەرگىلەرگە بايلانىستى.

ساراپشىلار نە دەيدى؟

كولىك لوگيستيكاسى جونىندەگى ساراپشى ايدوس تىلەۋبەكوۆتىڭ ايتۋىنشا، جاڭا مارشرۋت قازاقستاننىڭ ترانزيتتىك مارتەبەسىنە تىكەلەي ءقاۋىپ توندىرەدى:

"ەگەر قازاقستان جۇك قوزعالىسىن جەڭىلدەتۋ بويىنشا شۇعىل شارالار قابىلداماسا، وڭىرلىك ساۋدادا ءوز ورنىن جوعالتۋى مۇمكىن. جۇڭگو، وزبەكستان جانە تۇرىكمەنستان بىرلەسىپ جاڭا لوگيستيكالىق شەشىمدەر جاساپ جاتىر، بۇل ءوز كەزەگىندە ينۆەستيسيا مەن كىرىس اعىنىن باسقا باعىتتارعا بۇرىپ جىبەرەدى،" – دەيدى ول.

مۇمكىندىك پەن ءقاۋىپ قاتار جۇرەتىن كەزەڭ

قازاقستان ءۇشىن بۇل جاعداي ۇلكەن ەسكەرتۋ رەتىندە قابىلدانۋى ءتيىس. ترانزيتتىك الەۋەتتى ساقتاۋ ءۇشىن ەلىمىز تەمىرجول ينفراقۇرىلىمىن جاڭعىرتۋ، كەدەندىك راسىمدەردى وڭايلاتۋ جانە حالىقارالىق ارىپتەستىك اياسىن كەڭەيتۋ باعىتىندا بەلسەندى جۇمىس ىستەۋى قاجەت.

جاڭا باعىتتىڭ ىسكە قوسىلۋى – تەك لوگيستيكالىق جاڭالىق ەمەس، بۇل ورتالىق ازياداعى گەوساياسي جانە ەكونوميكالىق باسىمدىقتاردىڭ وزگەرىپ جاتقانىن بىلدىرەدى. قازاقستان ەندى ءوز ترانزيتتىك ءرولىن ساقتاۋ ءۇشىن ناقتى ءارى باتىل قادامدارعا بارۋى ءتيىس.