InfoHub Logo

قازاق - قوناقجاي حالىق. وسى سويلەمدى ەستىگەن سايىن مەنىڭ كوز الدىما قارشاداي كۇنىم، داستارحانى جيىلمايتىن ءبىزدىڭ اقشاڭقاي كيىز ءۇيىمىز كەلەدى. تورىنەن قوناق ۇزىلمەيتىن، وشاعىنان قازان تۇسپەيتىن ءۇيدى سيپاتتاۋ كەرەك بولسا، ارى ۇزامايىن دەپ ءوزىمنىڭ قاراشا ءۇيىمدى تىلىمە تيەك ەتەر ەدىم. ءبىزدىڭ ءۇيدىڭ قوس بايتەرەگى ءوز الدىنا وتاۋ بوپ شىققان، 7 بالا وسىرگەن، تانىس-تامىرلارى كوپ جاندار بولدى. سودان بولار، ايتەۋىر، ءبىزدىڭ ءۇيدىڭ ىشىلەتىن اسىن قوناق كەلمەي ىشكەنىمىز ەسىمدە جوق. قوناقتىڭ سىباعاسىن ۇسىنۋ، قوناق كادە سۇراۋ ءوز الدىنا بولەك اڭگىمە. قوناق كەلسە قوي ەگىز تابىتىنى سياقتى، ىرىسىمىز ارتپاسا، كەمىگەن جوق، شۇكىر. جاستايىمىزدان كورگەنىمىز بار، انامىزدىڭ بويىمىزعا سىڭىرگەنى بار دەگەندەي. ءقازىر، ءوزىم دە ۇيگە كەلگەن جانعا ءشاي ىشكىزبەي، اۋقاتتاندىرماي شىعارمايمىن. قاتتى اسىعىس جۇرگەننىڭ وزىندە داستارحاننان نان اۋىز تيگىزەمىن. بالامىسىڭ دەگەن، كىشكەنتاي كەزىمدە، ءبىر داستارحاندى جيناپ بولا بەرگەندە، تاعى ءبىر ادام كەلسە، تاعى ءشاي قوياتىنبىز. سوندا بۇرتيىپ اشۋلانعاندا، «قوناقجاي بولۋ - اتا-بابادان دارىعان قاسيەت. كەڭ بول! كەم بولمايسىڭ، شىراعىم!» ، دەيتىن اكەم. سوعان كوزىمدى جەتكىزۋگە تىپتەن سەپتىگىن تيگىزگەن اسىل پايعامبارىمىزدىڭ ساحيح حاديستەرى: «اللا قوناعى كوپ بولعان ءۇيدى، ءۇي يەسىن جاقسى كورەدى» "قايسى ءبىر ۇيگە بولسىن قوناق كىرمەي، پەرىشتەلەر كىرمەيدى"، "قوناقتى كۇتۋ ءجانناتقا كىرەتىنىڭنىڭ دالەلى"، "كىم اللاعا جانە اقىرەتتە (ءاربىر ىسىنە ەسەپ بەرەتىنىنە) سەنسە، قوناعىنا قۇرمەت كورسەتسىن” دەگەن ەكەن ادامزاتتىڭ اسىلى. وسى تۇستا ايتا كەتۋ كەرەك، قوناقتى وزىمىزشە ءبولىپ، ات قويىپ ءجۇرمىز عوي. ماسەلەن، سىيلى قوناق، ءجاي قوناق، تانىمايتىن قوناق، شاقىرىلماعان قوناق دەپ. قازاقەكەم قانداي قوناق كەلسە دە، «قۇدايى قوناق» دەپ ءتورىن ۇسىنعان. ياعني، قازاقتىڭ مەيىرىمدىلىگى، دانالىعى، ادالدىعى قوناق كۇتكەندە سىنالادى دەسەك، ارتىق ايتقاندىق بولماس. ال، ءسىز، قانشالىقتى قوناقجايسىز وقىرمان؟! ۇيىڭىزگە كەلگەن پەندەنى شاتتانا قارسى الاسىز با، الدە توماعا تۇيىق بولىپ، ءتۇسىڭىزدى سۋىتاسىز با؟! قالاي بولعاندا دا، ىرىس-بەرەكەم ارتسىن دەسەڭىز، تابالدىرىعىزدان اتتاعان قۇتتى قوناقتى رازى قىلىڭىز! حوش، سونىمەن، قارعا تامىرلى قازاعىم، شاڭىراعىمىز بيىك، كەرەگەمىز كەڭ بولسىن! وشاعىمىز سونبەسىن، داستارحانىمىز جيىلماسىن!

---