قوڭىر الا
تۇركەشتىڭ تۇسىندا جولدىباي دەگەن كەدەي بولىپتى. جولدىبايدىڭ مال دەگەندە، ماڭدايىنا بىتكەن جالعىز قوڭىر الا اتى بار ەكەن. ول شاپسا، الدىنا قارا سالمايتىن جۇيرىك بولسا كەرەك. تالاي ات شابىس بايگىسىنىڭ جۇلدەسىن جەڭىپ الىپتى. بۇعان ىشتەرى كۇيگەن بايلار مەن بيلەر، قالاي دا وسى اتتى وزدەرىنىڭ قولدارىنا تۇسىرۋگە، ءتىپتى بولماعان كۇندە قوڭىر الانىڭ كوزىن قۇرتۋعا تىرىسادى. جولدىبايدان قولقا سالىپ قوڭىر الانى سۇرايدى. ءبىراق جولدىباي وعان كونبەيدى. اقىرى بولمايتىنىن بىلگەن سوڭ، بي ءوزىنىڭ شابارماندارىنا:
— قوڭىر الانى ۇستاپ الىپ كەلىڭدەر! — دەپ بۇيىرادى. شابارماندار جايىلىستا جۇرگەن قوڭىر الانى جان-جاقتان قورشاپ ۇستاماقشى بولادى. بۇل كەلگەندەردىڭ بوتەن ادامدار ەكەنىن سەزگەن قوڭىر الا قورشاۋدىڭ ءبىر شەتىنەن بۇزىپ ءوتىپ، اۋىلعا قاراي قاشادى...
قۋعانمەن ۇستاتپايتىنىن سەزگەن شابارماندار قوڭىر الانى اتىپ مەرتىكتىرەدى. جانۋار جارالى جانىن قيناي-قيناي قۋعىنشىلاردىڭ قولىنا تۇسپەي، ۇيىنە جەتەدى. اتىنىڭ ايانىشتى ءحالىن كورگەن جولدىباي ماڭدايىنا بىتكەن قيماس جالعىز اتىنىڭ مەرت بولعانىنا قاتتى قايعىرادى. وزىنە قاستاندىق ويلاعان بيلەرگە لاعىنەت ايتادى.
جولدىبايدىڭ وسى جاعدايىن كورگەن تۇركەش «قاپىدا كەتكەن قايران، قوڭىرىم-اي» دەپ، «قوڭىر الا» اتتى كۇي شىعارادى.
You Might Also Like
-
كۇي قۋالاپ، ىزدەنىپ جۇرگەن جاس ءاشىم، ءبىر جىلى كوكقامىر باۋرايىن ارالاي كەلىپ قايشى، شىركە جايلاۋىندا بولادى. بارعان جەگجاتىنىڭ اشىممەن شامالاس ءبىر ۇلى بار ەكەن. ەكەۋى كەشقۇرىم ساۋىنداعى بيەنى ءورىست...
-
ەرتەدە ماڭعىستاۋ تۇبەگىندە ءبىر بايدىڭ بالبيكە دەگەن ايەلى بولىپتى. بالبيكە — ءارى اقىلدى، ءارى ەل-جۇرتىنا بەدەلدى بولعان ەكەن. ءبىراق ول بالا كوتەرمەي، باي بالبيكەنىڭ ۇستىنە جاس ايەل الىپتى. ەكى...
