قورقىنىشتى ءتۇس
مايدىڭ 12-كۇنى تۇندە ءبىزدىڭ اقان دوس وتە كەش جاتتى. توسەككە جاتقاننان كەيىن دە كوپ ۋاقىت دوڭبەكشىپ ۇيىقتاي المادى. قالاي ۇيىقتاسىن! ەندى 7 كۇننەن كەيىن سىن باستالادى. جانە اناۋ-مىناۋ ەمەس، گەوگرافيادان باستالاتىنىن قايتەرسىڭ.
اقان كەرەۋەتىنىڭ باس جاعىنان گەوگرافيا كىتابىن الىپ وقي باستادى: «سسسر - دىڭ سولتۇستىگىندەگى وزەندەر: وب، ەنيسەي، لەنا!»
گۇرس ەتىپ كىتاپ جەرگە ءتۇستى. اقان ۇيقىعا كەتتى.
ءبىزدىڭ اقان سونان سوڭ،
ءبىر كەرەمەت ءتۇس كوردى.
ءتۇس ەمەس-اۋ، عاجايىپ —
تاڭقالارلىق ءىس كوردى...
تۇسىندە: مايدىڭ ءدال جيىرماسى ەكەن دەيدى. سىن باستالىپتى. اقان كارتانىڭ قاسىندا تۇر ەكەن. قولىندا سىن بيلەتى. بيلەتتە: «سسسر - دىڭ سولتۇستىگىندەگى وزەندەردى كورسەت» دەگەن سۇراق تۇر (3-سۇراق). اقاننىڭ قولىنداعى تاياق تا سولتۇستىكتى قارمايدى. «لەنا، وب، ەنيسەي...» دەيدى ول اقىرىن عانا.
— سونان سوڭ؟
سونان سوڭ اقاننىڭ ويىنا ەشتەمە تۇسپەي قالدى. ويلانىپ تۇر. الاقاي، ەسىنە ءتۇستى.
— سونان سوڭ... سسسر - دىڭ سولتۇستىگىندەگى وزەن دون... — دەدى ول.
مۇنان ارى نە بولعانىن اقاننىڭ ءوزى دە بىلمەيدى. بىلگەنى سول، اشۋلانعان تىنىق دون كارتاداعى گەوگرافيالىق ماسشتابتان اسىپ-تاسىپ كەتكەن ەكەن دە، اقاندى تاسقىنىمەن الىپ كەتكەن ەكەن.
دون تاسقىنىمەن اقاندى نە قيلى ارالدارعا، تاۋلارعا، ويپاتتارعا اپارىپ سوقتى. دون بۇلاردىڭ ءبارى تۋرالى اقاننان سۇرادى. قورىققاندىقتان با، الدە بىلمەدى مە، دوننىڭ سۇراعىنىڭ بىردە-بىرەۋىنە جاۋاپ بەرە المادى ول.
اقان دوندى كاسپييگە قۇيادى دەپ جۇرەتىن عوي. مىنە، راس ەكەن، دون تۇپ-تۋرا كاسپييگە كەلدى. سول ارادا دون اقاننان «مىناۋ قاي تەڭىز؟» دەپ سۇرادى. اقان كوزىن اشىپ كوك تەڭىزگە كوز جىبەردى. كەرەمەت! ونىڭ الدىندا كۇندە ءوزى كورىپ جۇرەتىن الاقانداي تەڭىز ەمەس، كولەمى كوز جەتكىسىز جالپاق سۋ تۇردى.
— جوق، — دەپ ويلادى اقان. كاسپيي ەمەس ەكەن. جانە دونعا «بۇل تىنىق مۇحيت» دەگەن جاۋاپ بەردى.
اشۋلاندى، دولداندى دون،
اقان دوستى قولعا الدى ول.
كوتەرىپ aپ تەڭىزگە اتتى،
قايران اقان سۋعا باتتى!
— تۇر، قالقام! ساعات سەگىز بولدى، — دەگەن اناسىنىڭ داۋسىمەن ويانىپ كەتكەن اقان «ۋھ» دەپ دەمىن ءبىر - اق الدى. كالەندارعا قارادى: مايدىڭ ون ءۇشى. راسپيسانيەگە قارادى: بۇگىن گەوگرافيادان كونسۋلتاسيا ەكەن. ول ەندى وسىعان بارۋعا اسىقتى.
اقان مەكتەپكە بارا جاتقاندا دا: «سسسر - دىڭ سولتۇستىگىندەگى وزەندەر — وب، ەنيسەي، لەنا...» دەپ كۇبىرلەۋمەن بولدى...
You Might Also Like
-
گۋريەۆ وبلىسىندا شىعاتىن «كوممۋنيستىك ەڭبەك» (مەنىڭ بالا كەزىمدە «سوسياليستىك قۇرىلىس» دەپ اتالاتىن ەدى، كەيىن «كوممۋنيستىك ەڭبەك»، ال ءقازىر «اتىراۋ»...
-
ۇلتتىق ءبىرىڭعاي تەستىلەۋ 2-8 ماۋسىم ارالىعىندا وتكىزىلەدى. بيىلعى سىناققا مەكتەپ بىتىرۋشىلەردىڭ 87 782 تۇلەك قاتىسادى.
