InfoHub Logo

ق ر پرەزيدەنتى - ەلباسى ن.ءا.نازاربايەۆتىڭ «قازاقستان-2050» ستراتەگياسى

ەلباسىمىز ن.ءا.نازاربايەۆ قازاقستان حالقىنا ارنالعان ءداستۇرلى جولداۋىن تاۋەلسىزدىك كۇنى قارساڭىندا جاريا ەتتى. «قازاقستان-2050» ستراتەگياسى قالىپتاسقان مەملەكەتتىڭ جاڭا ساياسي باعىتى» دەپ اتالدى. ەلباسىمىزدىڭ بيىلعى جولداۋىندا الدىمەن مەملەكەتىمىزدىڭ، ۇلتتىق ەكونوميكامىزدىڭ، ازاماتتىق قوعامىمىزدىڭ، قوعامدىق كەلىسىمىمىزدىڭ، وڭىرلىك كوشباسشىلىعىمىز بەن حالىقارالىق بەدەلىمىزدىڭ داعدارىستا سىنالۋى ءسوز بولدى.

ەلىمىزدىڭ 21 جىلدا ايتارلىقتاي جەتكەن جەتىستىكتەرىمىز سارالانىپ، الەم الدىنداعى بەدەلىمىزدىڭ اسقاقتاعانى ايقىندالدى. قۋاتتى دا تابىستى مەملەكەتىمىزدىڭ دەموكراتيالاندىرۋ مەن ىرىقتاندىرۋدىڭ ورنىقتى پروسەسى، ءتۇرلى الەۋمەتتىك ەتنوستىق جانە ءدىني توپتاردىڭ كەلىسىمى مەن تاتۋلىعى، حالىقارالىق ەڭبەك بولىنىسىندەگى ءبىزدىڭ ءرولىمىز، قوعامدىق تۇراقتىلىق پەن كەلىسىمدى قامتاماسىز ەتەتىن كۇشتى الەۋمەتتىك ساياسات ۇستانعان الەمدىك قوعامداستىق تانىعان ەل ەكەنىمىز، يادرولىق قارۋدى تاراتپاۋ رەجىمىن ىلگەرىلەتۋدەگى ءبىزدىڭ بەلسەندى ءرولىمىز بەن 1997 جىلعى جولدانعان «قازاقستان – 2030» ستراتەگياسىنىڭ 15 جىل ىشىندە ماقسات مىندەتتەرىنىڭ ورىندالۋى قورىتىندىلاندى.

سونىمەن قاتار الداعى ءححى عاسىردىڭ جاھاندىق ون - سىن قاتەرى دەپ: – تاريحي ۋاقىتتىڭ جەدەلدەۋى، جاھاندىق دەموگرافيالىق تەڭگەرىمسىزدىك، جاھاندىق ازىق-تۇلىك قاۋىپسىزدىگىنە تونەتىن قاتەر، سۋدىڭ تىم تاپشىلىعى، جاھاندىق ەنەرگەتيكالىق قاۋىپسىزدىك، تابيعي رەسۋرستاردىڭ سارقىلۋى، ءۇشىنشى يندۋستريالىق ريەۆوليۋسيا، ۇدەي تۇسكەن الەۋمەتتىك تۇراقسىزدىق، وركەنيەتىمىز قۇندىلىقتارىمىزدىڭ داعدارىسى، جاڭا الەمدىك تۇراقسىزدىق ءقاۋپىن اتاپ ءوتتى.

پرەزيدەنت قازاقستاننىڭ قازىرگى زامانعى وسى اتالعان سىن-قاتەرلەرگە جاۋاپ رەتىندە دامۋدىڭ 2050 جىلعا دەيىنگى كەزەڭىنە ارنالعان ستراتەگيانى قابىلدادى.
جاھاندىق ەكونوميكانىڭ كىندىگى ازيا-تىنىق مۇحيتى وڭىرىنە جەدەل اۋىسىپ بارادى، دەپ جالعاستىردى ءوزىنىڭ ءسوزىن پرەزيدەنت. بۇگىندە ءبىز «قازاقستان -2030» ستراتەگياسىن قابىلداعان ساتتەن مۇلدەم باسقا جاعداي مەن مۇمكىندىكتەردە ءومىر ءسۇرىپ وتىرمىز. 2050 – بۇل قازىرگى كەزدە الەمدىك قوعامداستىق باعىت ۇستانىپ وتىرعان ناقتى مەرزىم. ءبىزدىڭ ناقتى ماقساتىمىز – 2050 جىلعا قاراي الەمنىڭ اسا دامىعان 30 مەملەكەتىنىڭ قاتارىنا قوسىلۋ، دەپ اتاپ ءوتتى قازاقستان باسشىسى.
بۇل ءۇشىن بىزدە بارلىق مۇمكىندىكتەر: رەسۋرستار، ءبىلىمدى ادامدار، جۇدىرىقتاي جۇمىلعان ۇلت بار، دەدى ەلباسىمىز.

ەلباسىمىزدىڭ سوزىنە قاراعاندا، وسىدان 15 جىل بۇرىن قابىلدانعان 2030 ستراتەگياسى كەڭەستىك كەزەڭنەن كەيىنگى رەتسىزدىك تۇپكىلىكتى ەسكەرىلمەگەن، وڭتۇستىك-شىعىس ازيا ەلدەرى مەن كەيبىر وزگە دە رىنوكتاردى داعدارىس قالتىراتىپ تۇرعان شاقتا قابىلدانعان بولاتىن. سوعان قاراماستان، قازاقستان 2012 جىلى ءىجو كولەمى بويىنشا پلانەتامىزداعى دامىعان 50 ەلدىڭ قاتارىنا كىرەدى.

ەل باسشىسى ءوز ءسوزىن «ءبىز ءبارىمىز ءبىر اتانىڭ - قازاق حالقىنىڭ ۇلىمىز. ءبارىمىزدىڭ دە تۋعان جەرىمىز بىرەۋ - قاسيەتتى قازاق دالاسى. بۇل دۇنيەدە ءبىزدىڭ ءبىر عانا وتانىمىز بار، ول – تاۋەلسىز قازاقستان. ءبىز بولاشاققا كوز تىگىپ، تاۋەلسىز ەلىمىزدى «ماڭگىلىك ەل» ەتۋدى مۇرات قىلدىق. «قازاقستان-2050» ستراتەگياسى وسىناۋ ماڭگىلىك جولداعى بۋىندار بىرلىگىنىڭ، ۇرپاقتار ساباقتاستىعىنىڭ كورىنىسى. بابالاردىڭ ەرلىگى، بۇگىنگى بۋىننىڭ ەرەن ىستەرى جانە جاس ۇرپاقتىڭ جاسامپازدىعى اراسىندا ساباقتاستىق بولسا عانا، ءبىز «ماڭگىلىك ەل» بولامىز» دەپ قورىتىندىلادى.