قۇندى مۇرالار مەكەنى-ال-فارابي كىتاپحاناسى
«كىتاپحانا - ءبىلىم مەن عىلىمنىڭ، مادەنيەتتىڭ ورتالىعى. كىتاپتىڭ ءيىسى مەن تىنىشتىق جايلاعان كىتاپحانالار- كىتاپسۇيەر قاۋىمنىڭ سۇيىكتى مەكەنى» دەپ بەكەر ايتىلماسا كەرەك. بىلىمگە قۇشتار بارشا جاننىڭ وسىنداي رۋحاني ورتاسىنىڭ ءبىرى دە بىرەگەيى- الماتى قالاسىنداعى ءال-فارابي اتىنداعى كىتاپحانا. ءال-فارابي اتىنداعى قازۇۋ-دىڭ وقۋ جانە عىلىمي ۇدەرىستەرىن اقپاراتتىق-كىتاپحانالىق قىزمەتپەن قامتاماسىز ەتەتىن قۇرىلىمدىق بولىمشەسى سانالاتىن بۇل ورتالىق- ق ر ۇلتتىق كىتاپحاناسىنان كەيىنگى ەلىمىزدەگى اۋقىمدى كىتاپحانا. كىتاپحانانىڭ وزىندىك ەرەكشەلىگى- ءتورت قاباتتان تۇراتىن عيماراتىنداعى ءار قاباتتىڭ «ءال-فارابي»، «ۇلى دالا»، «الاش»، «ماڭگىلىك ەل» اتتى ارنايى اتاۋلارى بار.
ءبىرىنشى قاباتىندا ءال-فارابي ورتالىعى مەن مۇراجايى، ەكىنشىسىندە وقۋ زالى ، ۇشىنشىسىندە ەلەكتروندى زال، ال ءتورتىنشى قاباتىندا زاماناۋي ۇلگىدەگى 4 كونفەرەنسيا زالدارى ورنالاسقان. بۇدان بولەك، ماگيسترانتتار زالى، گازەت پەن جۋرنالدىڭ 250 اتاۋىن تابۋعا بولاتىن مەرزىمدى باسىلىمدار زالى، سونداي-اق، XVI-XIX عاسىرلىق سيرەك كىتاپتار مەن قولجازبالار ساقتالعان قۇندى باسىلىمدار زالى بار.
ال 2017 جىلى اشىلعان تۇڭعىش پرەزيدەنت زالى قازاقستاننىڭ تاۋەلسىز مەملەكەتتىلىگىنىڭ قالىپتاسۋ جانە نىعايۋ تاريحى بويىنشا اقپارات اۋقىمىن جاساۋ، ۇنەمى تولىقتىرۋ جانە ساقتاۋ مىندەتتەرىن اتقاراتىن مادەني-اعارتۋشىلىق ورتالىق بولىپ سانالادى. بۇل زالدىڭ اشىلۋ قارساڭىندا كىتاپحانا قىزمەتكەرى اقمارال امانگەلدى قىزى ارنايى اقورداعا بارىپ، ەلباسىنىڭ كىتاپتارىن، سونىمەن قاتار، وزگە دە قۇندى مۇرالارىن الىپ كەلگەن. الەم ەلدەرىنىڭ كىتاپ بۇرىشىندا جاپونيا، جۇڭگو، اۋعانستان جانە ت.ب. ەلدەردىڭ ادەبي مۇرالارى ساقتالعان. سونىمەن قاتار، بۇل جەردەن امەريكادان شىققان ەڭ العاشقى گازەتتىڭ كوشىرمەسىن دە تابا الامىز.
بۇگىندە كىتاپحاناداعى كىتاپ قورى 2 ملن-نان اسادى. «بولاشاققا باعدار:رۋحاني جاڭعىرۋ» باعدارلاماسىنىڭ اياسىندا قولعا الىنعان «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسىنىڭ جۇزەگە اسۋىنا، ياعني، كىتاپتاردىڭ اۋدارىلىپ، جارىققا شىعۋىنا كىتاپحانا ۇلكەن ۇلەسىن قوسىپ وتىر. تاعى ءبىر ارتىقشىلىعى - مۇندا ەلىمىزدە تەك ەكى جەردە عانا كەزدەسەتىن سكانەرلىك قىزمەتتىڭ وزىق ۇلگىسى- « Kirtas kabis 3» جاڭا تەحنيكاسىنىڭ بولۋى. بار-جوعى 1 ساعات ىشىندە 3000 بەتتىك كىتاپتى ەلەكتروندى نۇسقاعا كوشىرەتىن بۇل قۇرىلعى وقىرماندارعا كىتاپتى ونلاين تۇردە وقۋعا مۇمكىندىك بەرەدى.
ءال-فارابي اتىنداعى كىتاپحانا وقۋ ورداسىنىڭ اقپاراتتىق، ءبىلىم بەرۋ جانە مادەني ورتالىعى رەتىندە قىزمەت كورسەتىپ، كوپشىلىك قاۋىمدى اسا باي كىتاپ قورىمەن جانە ەلەكتروندى رەسۋرستارمەن قامتاماسىز ەتىپ كەلەدى.
You Might Also Like
-
مىرزاگەلدى كەمەل- ادامگەرشىلىك اسىل قاسيەتتەر مەن جالپىادامزاتتىق قۇندىلىقتاردى كەڭ ناسيحاتتايتىن تانىمدىق- تاعىلىمدىق ەڭبەكتەردىڭ اۆتورى. ونىڭ ەسىمى لاو-سزى، كونفۋسيي، بالتاسار گراسيان، لۋيزا حەي...
