قۇرعاق كوز سيندرومى
قۇرعاق كوز سيندرومى دەگەنىمىز، ادەتتە، ەتيولوگياسى ءار ءتۇرلى اۋرۋلاردىڭ بەلگىلەرىن كورسەتەتىن تەرمين. بۇل سىرقاتتاردىڭ سەبەپتەرى سان-الۋان.
كومپيۋتەردە جۇمىس ىستەگەن نەمەسە تەلەديدار كورگەن سوڭ كوزىڭىز اشىپ، ىشىنە قوقىس تۇسكەندەي جايسىزدىق سەزىنەسىز، كوز قىزارىپ، زاتتار بۇلدىراپ كورىنەدى، ءبىراق كوزىڭىزدى ءبىراز جىپىلىقتاتقاننان كەيىن ءبارى قايتادان قالپىنا كەلەدى. بۇنىڭ ءبارى قۇرعاق كوز سيندرومىنىڭ بەلگىلەرى. ادەتتە كوزدى جاۋىپ تۇرعان قۇرعاعان پلەنكا كوزدى جىپىلىقتاتقاندا ىلعالدانادى دا جوعارىدا ايتىلعان قولايسىز سەزىمدەر جوعالادى. ەگەر كوزدىڭ تىتىركەنۋى جيىلەپ كەتسە، ال كوزدى جىپىلىقتاتۋ كومەكتەسپەسە، كوز دارىگەرىنە بارۋ كەرەك.
«قۇرعاق كوز سيندرومى» دەگەن ناقتاما قويىلاتىن ناۋقاستار سوڭعى ۋاقىتتا كوبەيىپ كەتتى. ادەتتە، بۇل اۋرۋ كوزدىڭ بەتكەيىن ىلعالداندىرىپ، ونى جۇقا قاباتپەن جاۋىپ تۇراتىن كوز پلەنكاسى، ياعني ءۇلدىرى ساپاسىنىڭ بۇزىلۋىنان تۋىندايدى. پلەنكا كوز الماسىن كەبۋدەن جانە پاتوگەندى ميكروبتاردان قورعايدى، وندا ءمولدىر قابىقتى قورەكتەندىرەتىن زاتتار بولادى.
كوزدىڭ قۇرعاقتىعى ءبىرقاتار سەبەپتەردەن تۋىندايدى. بۇل سەبەپتەرگە دەن قويۋدى تالاپ ەتەتىن وقۋ، كومپيۋتەردە جۇمىس جاساۋ جاتادى. كەسەلدى تەمەكى شەگۋ، ءۇي-جايداعى اۋانىڭ قۇرعاقتىعى، كوشەدەگى پايدالانىلعان گازدار، جاناسپالى لينزالار كيۋ، دارۋمەنى از ساپاسىز تاماقپەن قورەكتەنۋ دە تۋدىرادى.
قۇرعاق كوز سيندرومى قارت ادامداردا ءجيى. ويتكەنى الپىس بەس جاستان اسقان سوڭ ءبىزدىڭ ورگانيزمىمىز ماي ءسولىن ءوندىرۋدى 40 پايىزعا ازايتادى، بۇل كوز جاسى ءۇلدىرىنىڭ تەز كەبۋىنە الىپ كەلەدى. قۇرعاق كوز سيندرومىنىڭ تۋىنداۋىنا سونداي-اق كليماكس، مەنوپاۋزا، جۇكتىلىك، بالا ەمىزۋ، كەيبىر دارىلەردى ءىشۋ كەزىندە جانە ادامدا بەلگىلى ءبىر اۋرۋلار بولعان جاعدايدا بايقالاتىن ەستروگەندەر تاپشىلىعى دا ىقپال ەتەدى. ءبىراق قۇرعاق كوز سيندرومى كەزىندە ناۋقاس ادام سەزىنەتىن پاتولوگيالىق احۋالداردىڭ سيپاتى، ادەتتە، بارىنە ورتاق: كوزدىڭ اشۋى، كۇيىپ تۇرعانداي سەزىم، قاتتى قۇرعاۋى نەمەسە، كەرىسىنشە، جاس اعۋ. ناۋقاس ادام كوزگە قۇم تۇسكەندەي سەزىمگە، اۋىرسىنۋعا، قاتتى جارىقتان قوزۋعا، وقىعان كەزدە ەڭبەك قابىلەتىنىڭ تومەندەۋىنە، كوز كورگىشتىگىنىڭ ناشارلاۋىنا شاعىمدانادى. كوبىنە سىرتقى بەلگىلەر بايقالمايدى، كەي ادامداردا كوز قىزارادى.
كوزدىڭ قۇرعاۋىنىڭ نەگىزگى سەبەبى — كوز جاسى سۇيىقتىعىن وندىرەتىن جاس بەزدەرى جۇمىسىنىڭ ناشارلاۋى. بۇعان اسەر ەتەتىن سەبەپتەر بىرنەشەۋ:
— جاسقا بايلانىستى گورموندىق وزگەرىستەر؛
— اللەرگياعا قارسى، نەسەپ ايدايتىن، تامىر تارىلتاتىن، گيپوتەنزيۆتىك دارىلەردى قولدانۋ؛
— سوزىلمالى اۋرۋلار — ريەۆماتويدتى ارتريت، سكلەرودەرميا، قىزىل جەگى، قانتتى ديابەت، باۋىر قىزمەتىنىڭ بۇزىلۋى؛
— تەكتىك بەيىمدىك.
كوزدىڭ قۇرعاقتىعىنا سەبەپ بولاتىن باسقا جاعدايلار مەحانيكالىق سيپاتتا. كوبىنە سالاۋاتتى ءومىر سۇرمەۋدەن بولادى. بۇل جاعدايلاردا كوز جاسى بەزدەرى قالىپتى جۇمىس جاسايدى، ءبىراق كوز جاسى سۇيىقتىعى كوز بەتىنەن تەز بۋلانىپ كەتەدى. سونىمەن قاتار كوز جاسى سۇيىقتىعىنىڭ تەز بۋلانۋىنا كوزدى سيرەك جىپىلىقتاتۋ، جىلىتقىش، جەلدەتكىش قولدانۋ، كومپيۋتەر مەن تەلەديدار الدىندا كوپ وتىرۋ، كوز جاراقاتتارى، تەمەكى شەگىلگەن بولمەدە بولۋ، قاباق قۇرىلىمىنىڭ پاتولوگياسى دا اسەر ەتەدى. سونىمەن بىرگە كوز جاسى سۇيىقتىعىنىڭ ساپالىق كۇرامىنىڭ ناشارلاۋىنا مايسىز ەمدام، جۇكتىلىك، بالا ەمىزۋ، اۆيتامينوز، باۋىر مەن بۇيرەك قىزمەتىنىڭ ناشارلاۋى دا سەبەپ.
دۇرىس ناقتامانى جانە ونىڭ سەبەبىن تەك دارىگەر عانا قويادى. قۇرعاق كوز سيندرومىن ەمدەۋدىڭ كەڭ تاراعان ءادىسى — جاساندى كوز جاسى تامشىلارىن قولدانۋ. بۇل پرەپاراتتاردى جۇيەلى تۇردە قولدانۋ ناۋقاستارعا ءبىراز جەڭىلدىك اكەلەدى. جاساندى جاس قۇرالدارى كوبىنە سۇيىق بولادى، ولار از ۋاقىت اسەر ەتەدى، ال قويۋ تۇرلەرىنىڭ اسەرى ۇزاعىراق. بۇنداي دارىلەردىڭ قۇرامىندا كونسەرۆانتتاردىڭ بولماعانى ءجون. سونىمەن قاتار تىتىركەنۋدى جانە كوزدىڭ قىزارۋىن تەز باساتىن دارمەكتەردى پايدالانۋدىڭ قاجەتى جوق. ويتكەنى بۇنداي دارىلەر كونيۋنكتيۆا تامىرلارىن تارىلتا وتىرىپ تەز اسەر ەتەدى، ءبىراق جەتكىلىكتى دارەجەدە ىلعالداندىرمايدى، سوندىقتان ماسەلەنى ۇشىقتىرا تۇسەدى. سونىمەن قاتار گەلدى دارىلەر دە بار. قالاي بولعاندا دا ناۋقاستىڭ جاعدايىن باعالاي وتىرىپ، ءدارىنى دارىگەر تاڭداپ بەرەدى. ءوز بەتىنشە ەمدەلۋدەن اۋلاق بولۋ كەرەك، سەبەبى وزدىگىنشە قولدانعان دارىلەردىڭ كوبى ۋاقىتشا وڭ اسەر بەرەدى دە كەيىن كوزدىڭ شىرىشتى قاباتىن كەپتىرىپ، ءتىپتى ونىڭ سەمۋىنە دە الىپ كەلۋى ءمۇمىن. دارىگەر تاعايىنداعان ءدارىنىڭ ءوزىن بەس كۇننەن ارتىق تامىزۋعا بولمايدى. سىرقاتتىڭ الدىن الۋ ءۇشىن كوزدى ءجيى-جيى جىپىلىقتاتۋ، سونداي-اق كوزگە ارنالعان باسقا دا جاتتىعۋلاردى جاساۋ پايدالى.
ب. ب. دجاردەموۆا وفتالمولوگ-دارىگەر
وقۋعا كەڭەس بەرەمىز:
كونيۋنكتيۆيت
كوز جاسى قالتاسىنىڭ قابىنۋى (داكريوسيستيت)
كەراتيت
جاناسپالى لينزا
الىستان كورمەۋدىڭ دامۋ سەبەپتەرى جانە ەمى
كوز لينزاسىمەن ۇيىقتاۋ ءقاۋىپتى مە؟
دۇرىس تاماقتانۋ كوز ساۋلىعىنا سەپ
كوزگە ارنالعان يوگا: كوزىڭىزدىڭ قىراعىلىعىن ارتتىراتىن 8 قاراپايىم جاتتىعۋ
You Might Also Like
-
ادەبي دۇنيە، ادەبي كىتاپ زامانا ىزعارىمەن بەتپە-بەت كەلىپ، جالعىز قالدى. كىتاپ يدەولوگياسى نولگە اينالدى. ەسەسىنە ءتىس جۋاتىن پاستا، سابىن، ءيىسسۋ، كىر جۋاتىن ۇنتاق ءتىپتى ەدەن جۋىپ، قوقىس جينايتىن شە...
-
جالىنداعان جاستار قاۋىمىنا قاشاندا قولداۋ كورسەتىپ، ولاردىڭ بەلسەندىلىكتەرىن ارتتىرۋدا وتاندىق جوعارعى وقۋ ورىندارىنىڭ الدىڭعى قاتارىنداعى ءال-فارابي اتىنداعى قازاق ۇلتتىق ۋنيۆەرسيتەتىنىڭ ماڭىزى اير...
