InfoHub Logo

(ۇستازدى شاكىرتتەرىنىڭ مەرەكەسىمەن قۇتتىقتاۋى)

ءسىز ءماندى دە ماعىناعا تولى، ۇلاعات پەن ۇجداندى جانىنا سەرىك قىلعان، وي مەن اقىل جانە پاراسات پەن پايىمدى جۇرەگىنە جاقىن ەتكەن، رۋحانيات پەن ءبىلىمدى جاس ۇرپاقتىڭ تاربيەسىنە قاراي باعىتتاپ وتىراتىن ۇستازدىق دەپ اتالاتىن يگى ماماندىقتىڭ جولىن قالاپ العان جانسىز. ءسىزدىڭ ۇستازدىق قىزمەتتەگى ءاربىر جىلىڭىز سىزگە ابىروي مەن تابىس، ب ا ق پەن بەرەكە اكەلدى، سونىمەن بىرگە تاعى دا جاڭا ءارى جارقىن مۇمكىندىكتەرگە جول اشتى.

ءاربىر باستالعان جاڭا ءبىر وقۋ جىلىنىڭ كۇمىس قوڭىراۋىنىڭ سيقىرلى ءۇنى سىزگە قۋانىش سىيلادى. بۇل ناعىز ۇستازعا عانا ءتان سەزىم ەدى. سول كۇمىس قوڭىراۋدىڭ ۇنىمەن بىرگە بالدىرعان كۇلكىلەرى جاراسا مەكتەپكە ەنگەن قانشاما ءبۇلدىرشىن ءسىزدىڭ الدىڭىزدان ءتالىم كوردى، ۇلاعاتىڭىزدى تىڭدادى، ءوز مەكتەبىنەن قانات قاقتى. ولار ءقازىر ەلىمىزدىڭ ءار تۇكپىرىندە ءجۇر.

ءسىز ۇنەمى ۇستازعا ءتان سەرگەك ويدىڭ يەسى بولدىڭىز. ءاربىر تابىستارىڭىزعا توقمەيىلسۋ مەن توقىراۋ سىزگە جات ەدى، كەرىسىنشە جاڭا ىزدەنىستەرگە جول اشتى. ءسىز ءوز قوعامىڭىزدىڭ ۇرپاقتان نە تالاپ ەتىپ وتىرعاندىعىن ءجىتى اڭعارا الدىڭىز. ءوز بويىڭىزداعى ءبىلىم مەن بىلىك دارياسىن سولاي قاراي بۇردىڭىز، جاس شىبىقتى سولاي قاراي ءيدىڭىز. ەگەر ءسىز وسى جىلداردىڭ ىشىندە ماقتاۋ مەن قۇرمەت كورسەڭىز، ۇستازدىق جولىڭىزدا، شىنىندا دا، وسىعان لايىقتى ىستەر اتقارا العان ەدىڭىز.

ءسىزدىڭ وتكەن قۇرمەتتى جولىڭىزدىڭ ءاربىر يىرىمىندە شاكىرت جۇرەگىنىڭ العىس سەزىمى جاتىر. ولاردىڭ ءارقايسىسى ءبىر الەم ەدى، ولاردىڭ ءارقايسىسى جاڭادان اشىلار ءبىر دۇنيە ەدى. مىنە، ءسىز وسى ءبىر بالدىرعان جۇرەكتەردىڭ رياسىز دوسى، ەرتەڭگە دەگەن ءۇمىتى بولا الدىڭىز. سىزگە وسى ءۇشىن دە ءوز شاكىرتتەرىڭىز العىس ايتادى.

ءسىزدى شاكىرتتەرىڭىز بۇگىنگى مەرەكەڭىزبەن قۇتتىقتاي وتىرىپ، مىقتى دەنساۋلىق، وتباسىڭىزعا باقىت، ۇستازدىق جولىڭىزعا شىعارماشىلىق تابىستار تىلەيدى. ۇستازدىق قىزمەتىڭىزدە ءار ۋاقىتتا شاكىرتتەرىڭىزدىڭ العىسىنا بولەنە بەرىڭىز!

---