InfoHub Logo

قوجاناسىر ءبىر كۇنى بالىق اۋلاماقشى بولىپ كولگە بارىپتى. بالىق قارماعىنا ىلىكپەي كوپ وتىرادى. سودان ابدەن جالىققان كەزدە ءبىر بالىق ىلىگە كەتىپتى. بۇعان قۋانا كۇيگەلەكتەي بالىعىن قارماعىنان اعىتىپ جاتقانىندا، ساۋساعىنداعى التىن ساقيناسى سۋىرىلىپ سۋعا ءتۇسىپ كەتىپتى. بۇعان قوجاكەڭ «قاپ، ەندى ءقايتتىم» دەپ از ويلانىپ تۇردى دا، دەرەۋ قولىنداعى بالىعىنا:

— بار، ساقينامدى اۋزىڭا سالىپ الىپ كەل، اكەلسەڭ، جانىڭدى قيامىن، اكەلمەسەڭ، وسى كولدىڭ سۋىن ءبىر جاققا اعىزسام دا، سەنى تابام، بەلگىڭ ەسىمدە، قۇيرىعىڭ ايىر، جالىڭ تىك، — دەپ بالىققا قاراپتى. بۇل كەزدە بالىق «ب ا ق» ەتىپ اۋزىن اشىپتى. بۇعان قوجاكەڭ بالىق ءتۇسىنىپ، «كوندىم» دەگەن ءسوزى ەكەن دەپ ويلاپ، سۋعا قويا بەرىپتى. سودان «ساقينامدى اكەلەدى» دەپ ءبىر كۇن، ءبىر ءتۇن سۋدىڭ باسىندا وتىرىپتى. اقىرى شىدامى كەتىپ، قارماعىن جيىپ الىپ، «قاپ، بالەم» دەپ ۇيىنە اياڭداپتى. كەلە جاتىپ ۇيىنە بوس كەلۋگە ۇيالىپ، «ەڭ بولماسا بازاردان بالىق ساتىپ الايىن، ايەلىم مەنىڭ سۋدان ۇستاعان بالىعىم دەپ ويلاسىن» دەگەن ويعا كەلىپ، جولدا بازارعا كەلىپتى. كەمە بازاردا ءبىر كىسى بالىق ساتىپ وتىر ەكەن. قوجاناسىر بالىققا ساۋدالاسا كەتەدى دە، بالىقتاردىڭ ىشىندە ءوزى ۇستاعان بالىققا ۇقساعان ءبىر بالىققا كوزى تۇسە كەتىپ:

— مىناۋ مەنىڭ بالىعىم، — دەپ جابىسا كەتەدى. بۇعان ساتۋشى:

— قويىڭىز، قوجەكە، بۇنىڭىز ۇيات قوي، بۇل بالىقتى ءوزىم ۇستادىم، — دەپتى. قوجاناسىر:

— كەل، ءباس تىگەيىك، ەگەر بالىقتىڭ ىشىنەن ساقينا شىقسا، بار بالىعىڭ مەنىكى، ال شىقپاسا، وندا ۇيىمدەگى ەسەك سەنىكى، —  دەپتى. وسى ەكى ارادا حالىق تا جيىلىپ قالىپتى، ساتۋشى جيىلعان جۇرتتى كۋا قىلىپ بالىقتىڭ ىشىنەن ساقينا شىقپايتىنىنا كوزى جەتكەندەي، قوجاناسىردىڭ ەسەگىن ۇتىپ الماقشى بولىپ:

— سوزىڭنەن تايما، مىنە، حالىق كۋا، — دەپ بالىقتىڭ ءىشىن جارىپ جىبەرىپتى. كۇتپەگەن جەردەن بالىقتىڭ ىشىنەن التىن ساقينا سوپاڭ ەتىپ شىعا كەلىپتى. بۇل ىسكە جيىلعان ادام، ساتۋشى — ءبارى تاڭ قالىپ:

— قوجەكە، بۇل بالىقتىڭ ىشىندە ساقينا بار ەكەنىن، جانە وزىڭدىكى ەكەنىن قالاي ءبىلدىڭ؟ — دەسىپتى.

قوجاناسىر:

— بالىعىمنىڭ قۇيرىعى ايىر، جالى تىك ەدى، سودان ءبىلدىم، —  دەپ ساتۋشىنىڭ بار بالىعىن جيىپ الىپ، ۇيىنە تارتىپ وتىرىپتى.

---