InfoHub Logo

ءبىر كۇنى قوجا اعاشتىڭ باسىنا شىعىپ، ءوزى وتىرعان بۇتاقتى كەسە باستايدى. مۇنى ءوتىپ بارا جاتقان بىرەۋ كورىپ:

— ەي، ساعان نە بولعان؟ قۇلايسىڭ عوي، — دەپ ايعايلاسا كەرەك.

ءبىراق ونىڭ ءسوزىن قوجەكەڭ قۇلاعىنا دا اسپايدى. سول-اق ەكەن، بۇتاق وپىرىلىپ كەتىپ، قوجا جەرگە قالپاقتاي ۇشىپ تۇسەدى. و جەر، بۇ جەرىنىڭ اۋىرعانىنا قاراماستان، قوجا ۇشىپ تۇرىپ، الگى كىسىنى قۋىپ جەتەدى:

— بەرى قارا، مەنىڭ بايقاۋىمشا، سەن بولاشاقتى بولجايتىن اۋليە ادام ەكەنسىڭ، مەنىڭ قۇلايتىنىمدى بىلگەندىكتەن، قاشان ولەتىنىمدى دە بىلەسىڭ. ايت، مەن قاشان ولەمىن؟ — دەپ ول كىسىنىڭ جاعاسىنا جارماسىپ جىبەرمەيدى.

سوندا الگى كىسى قوجادان قۇتىلعىسى كەلىپ:

— وتىن ارتقان ەسەگىڭ ورگە شىعىپ كەلە جاتقاندا، ءبىر رەت جەل شىعارسا، جارتى جانىڭنان ايرىلاسىڭ، ال ەكىنشى مارتەدە جەل شىعارسا، جانىڭمەن ءبىرجولا قوش ايتىساسىڭ، ولەسىڭ، — دەپ ءوز جونىنە جۇرە بەرەدى.

ايتقانداي-اق ەسەگى ورگە شىعىپ كەلە جاتىپ، جەل شىعارعاندا، قوجا اجالىنىڭ تاقاپ قالعانىن سەزىنگەندەي بولادى، ال ەكىنشى قايتارا دىبىس ەستىلگەندە، بۋىن-بۋىنى قالتىراپ، ىقىلىق اتىپ:

— ءولدىم، — دەپ قۇلاي كەتەدى.

قۇپ-قۋ بولىپ، سۇلاپ جاتقان قوجانى كورىپ، جۇرت جينالىپ قالادى. دەرەۋ تابىت جاساپ جىبەرىپ، قوجانى سالىپ اپ، قالاعا الىپ جۇرەدى. ولار ءبىر سازدى-باتپاقتى جەرگە تاپ بولىپ، قالاي قاراپ جۇرەرىن بىلمەي، داعدارىپ توقتاپ قالادى.

سوندا قوجا تابىتتان باسىن كوتەرىپ:

— مەن ءتىرى كەزىمدە مىنا ارامەن جۇرەتىنمىن، ەندىگىسىن وزدەرىڭ بىلىڭدەر، — دەپتى.

---