InfoHub Logo

قىزىلوردا وبلىسىندا «تازا قازاقستان» رەسپۋبليكالىق ەكولوگيالىق باعدارلاماسى اياسىندا اۋقىمدى تازالىق اكسياسى ءوتتى. شاراعا وبلىس اكىمى مۇرات ەرگەشبايەۆ قاتىسىپ، قورشاعان ورتانى قورعاۋعا ۇلەس قوسقان 100 قىزمەتكەردى ماراپاتتادى.

بۇل تۋرالى Infohub.kz اقپارات اگەنتتىگى حابارلايدى.

بوتانيكالىق ساياباقتا وتكەن اكسياعا وبلىس بويىنشا 17 مىڭنان استام ادام قاتىستى. ولاردىڭ قاتارىندا زيالى قاۋىم وكىلدەرى، دەپۋتاتتار، مەملەكەتتىك مەكەمە قىزمەتكەرلەرى، جاستار مەن ەكوبەلسەندىلەر بولدى.

ايماق باسشىسىنىڭ ءسوزى

وبلىس اكىمى مۇرات ەرگەشبايەۆ مەملەكەت باسشىسىنىڭ «تازالىق – وركەنيەتتى قوعامنىڭ ايناسى» دەگەن ءسوزىن ەسكە الىپ، قورشاعان ورتانى قورعاۋ ءار ازاماتتىڭ مىندەتى ەكەنىن اتاپ ءوتتى. ونىڭ ايتۋىنشا، وڭىردە سانيتارلىق تازالىق پەن اباتتاندىرۋ جۇمىستارى قارقىندى جۇرگىزىلۋدە. قالانىڭ ءبىرقاتار دەمالىس ورىندارى قايتا جاڭعىرتىلىپ، پايدالانۋعا بەرىلگەن. سونداي-اق، 80-نەن استام ەسكى تۇرعىن ءۇيدىڭ قاسبەتتەرى زاماناۋي ۇلگىدە جاڭارتىلعان.

تەحنيكامەن قامتاماسىز ەتۋ

ەكولوگيالىق ينفراقۇرىلىمدى نىعايتۋ ماقساتىندا سالالىق مەكەمەلەرگە 26 ارنايى تەحنيكا تابىستالدى. ولاردىڭ قاتارىندا قالدىق تاسىمالدايتىن كولىكتەر، ءورت ءسوندىرۋ تەحنيكالارى، تراكتورلار جانە كىشى ءورت ءسوندىرۋ كەشەندەرى بار.

جاسىل جەلەك جانە سەنبىلىك

بوتانيكالىق ساياباق اۋماعىنا 500 ءتۇپ قىلقان جاپىراقتى اعاش وتىرعىزىلدى. بۇل جۇمىستار ءوڭىردى جاسىل جەلەككە بولەۋگە، اۋا ساپاسىن جاقسارتۋعا باعىتتالعان. «تازا قازاقستان» باعدارلاماسى اياسىندا وبلىستىڭ بارلىق ەلدى مەكەنىندە اۋقىمدى سەنبىلىك جانە اباتتاندىرۋ جۇمىستارى ۇيىمداستىرىلدى.

جىل باسىنان بەرگى كورسەتكىشتەر

جىل باسىنان بەرى وڭىردەگى ەكولوگيالىق شارالارعا 121 مىڭنان استام ادام قاتىستى. وسى ۋاقىت ىشىندە 3 مىڭ توننادان استام تۇرمىستىق قالدىق شىعارىلىپ، سكۆەرلەر، پاركتەر، تاريحي-مادەني ەسكەرتكىشتەر، الەۋمەتتىك نىساندار، سۋ وبەكتىلەرى مەن كوشە بويلارى تازارتىلدى. بۇل جۇمىستارعا 548 ارنايى تەحنيكا جۇمىلدىرىلدى. سونىمەن قاتار، 88 مىڭنان استام اعاش كوشەتى وتىرعىزىلدى.