راقىمنىڭ ءومىر تولعاۋى
ەرەنقابىرعا وڭىرىندە ون ساۋساعى تۇگەل ونەر راقىم دەگەن شەبەر وتكەن. ول قازاق حالقىنىڭ مادەني ءومىرى مەن زاتتىق تۇرمىسىنا قاجەتتى بۇيىمداردى ونەر ورەسىنە كوتەرگەن، ونەرمەن قالىڭ قاۋىمعا تانىلعان شەبەر ەدى. راقىم تىككەن ساپتاما ەتىكتى، كوكساۋىر كەبىستى، ويۋ باسقان ءماسى مەن كۇمىس بەلبەۋدى جۇرت قادىر تۇتقان. راقىمنىڭ تاۋتەكەنىڭ مۇيىزىنەن جەزبەن ويۋلاپ جاساعان سارى الا شاقشاسى، سول زاماننىڭ قولى جەتكەندەرى ماقتانىشپەن الىپ جۇرەتىن ءزىننات بۇيىمى بولعان، دەسە دە راقىمنىڭ شەبەرلىگىن ەلگە ايىرىقشا تانىتقان ونەرى — ونىڭ جاساعان دومبىراسىنىڭ كوركەمدىگى مەن شەشەندىگى ەكەن. راقىم شەبەرلىك ونەرىنىڭ سىرتىندا، اسقان دومبىراشى دا بولعان كىسى. ونىڭ مۇنداي قاسيەتىنە ءوز قولىمەن جاساعان دومبىراسىنىڭ ويداعىداي شەشەن دە، كوركەم بولۋى نەگىز بولاتىن. سوندىقتان ول دومبىرانىڭ قۇلاعىنان تيەگىنە دەيىن ءوزى ورنالاستىرىپ، ءاربىر پەرنەنى ورنىن تاۋىپ بايلاپ قولىنان ءبىر-اق شىعارعان. دومبىرا الۋعا كەلگەندەرگە راقىم الدىمەن ءوز كۇيى «ءومىر تولعاۋىن» تارتادى ەكەن. «ءازىر اتتانامىن» دەپ وتىرعان جۇرگىنشىلەر راقىمنىڭ كۇيىن قيماي، اقىرى اتىنىڭ ەرىن الۋعا ءماجبۇر بولادى ەكەن. مىنە، وسىلاي «ءومىر تولعاۋى» جۇرتتىڭ جۇرەك قىلىن تەربەتەتىن كۇيگە اينالعان. راقىمنىڭ كوپتەگەن شاكىرتى، نەمەسە راقىم قولىنان شىققان دومبىرانى ۇستايتىن دومبىراشىلار قاشان، قاي جەردە بولسىن وزدەرىنىڭ كۇيىن راقىمنىڭ «ءومىر تولعاۋىمەن» باستايتىن بولعان.
You Might Also Like
-
كەشەگى ۇكىمەتتەن زورلىق، جاۋلىق كورگەن الاساپىران زاماندا التايدان اۋىپ بوسقان ەل قايدا تىنىشتىق، قايدا بوستاندىق بار دەپ، موري، باركول، گانسۋعا اعىلعان. وسىنداي بوسقان ەلدىڭ سوڭىنان قۋعان ۇكىمەت ءا...
-
اقىمجان — التاي وڭىرىندە جاساعان اتاقتى كۇيشى، سىبىزعىشى ونەرىمەن ەلگە تانىلعان ادام ەكەن. سول تۇستا ونىڭ ونەرىنە تاڭداي قاققان ۇكىرداي، بيلەر قايدا بارسا دا، اقىمجاندى قاستارىنان تاستاماي ەر...
