InfoHub Logo

قىزمەت بابىندا ءارتۇرلى جاعدايعا بايلانىستى ادام قاتتى كۇيزەلىسكە ۇشىراي بەرەدى. ول ءتىپتى بولىمسىز نارسەدەن دە تۋىنداۋى مۇمكىن. سولاي بولسا دا ادامنىڭ جۇيكە جۇيەسىنە ۇلكەن سالماق ءتۇسىپ، ءوزىنىڭ قالىپتى جاعدايىنان شىعىپ، قان قىسىمى كوتەرىلىپ، تامىر سوعۋى جيىلەپ، جۇرەك تۇسى شانشۋى ىقتيمال. ارينە، ءجيى قايتالانا بەرەتىن تەرىس ەموسيالىق قۇبىلىستار ءىز قالدىرماي كەتپەيدى. سوندىقتان ادام ءوزىنىڭ بويىنان جوعارىدا كورسەتىلگەن جايلار بايقالسا، قالايدا بۇعان كوڭىل اۋداراتىن جاتتىعۋلار جيىنتىعىن ورىنداۋعا كىرىسكەنى ءجون. سوندا عانا ادامنىڭ اشۋ-ىزاسى تارقاپ، جۇمىس قابىلەتى ارتىپ، دەنساۋلىعى قالپىنا كەلەدى. سونداي جاتتىعۋلاردىڭ ءبىرى شەتكى قانتامىر جۇمىسىن جاقسارتۋ بولىپ تابىلادى.

1.      اياقتىڭ ۇشىمەن 9-10 رەت كوتەرىلەدى.

2.      وتىرىپ نە تۇرىپ وكشەدەن اياقتىڭ باسىنا جانە كەرىسىنشە اياقتىڭ باسىنان وكشەگە سالماق تۇسىرەدى.

3.      ءبىر قولمەن قابىرعاعا سۇيەنە تۇرىپ، جۇرەدەن وتىرىپ جۇرەدى. 8-10 رەت قايتالانادى.

4.      ءبىر اياقتى ەكىنشى اياققا ايقاستىرا سالىپ، بالتىردىڭ بۇلشىقەتىن سيپاپ، ىسقىلايدى.

5.      جۇدىرىقتى قاتتى اشىپ-جۇمىپ سىلكىلەيدى.

6.      قولدىڭ ۇشىن بىلەزىك بۋىنىنان اينالدىرادى.

7.      قولدى ۇستەل ۇستىنە قويىپ، ساۋساقتاردىڭ اراسىن الشاقتاتىپ، قايتا بىرىكتىرەدى. 3-4 رەت قايتالايدى.

8.      قولدىڭ ۇشىنان يىق بۋىنىنا دەيىن ۇگىپ، ۋقالايدى.

تەرىس ەموسيالىق قۇبىلىسپەن كۇرەسۋ

قاتتى رەنىشتەن سوڭ جۇيكە جۇيەسىن قايتا قالپىنا كەلتىرۋ ءۇشىن بۇلشىقەتتەردى كۇشپەن شيرىقتىراتىن جاتتىعۋلار قاجەت. بۇل ءۇشىن وسىعان لايىقتى جەكە بولمە نەمەسە ارنايى بۇرىش بولعانى ءجون. ول جەردە گانتەل، ەسپاندەر، ۆەلوستانوك نەمەسە بوكسكە ارنالعان ىشىنە ماقتا تولى دوپ ت.ب. بولۋى كەرەك.

1.      ەگەر ارنايى بولمە بولسا، 15-20 سەكۋندتاي جىلدام، ەكپىنمەن ءجۇرۋ كەرەك.

2.      بوكسشىنىڭ جاتتىعۋى كەزىندەگىدەي، قولدى قاتتى سەرمەپ، قيمىلدايدى.

3.      جۇدىرىقتى ءتۇيىپ، قولدى كەۋدەگە ۇستاپ، ەكى جاققا سىلتەپ لاقتىرعانداي قيمىل جاسايدى. قولدى تومەن سالبىراتىپ، بوساڭسىتادى.

4.      قولدى ورىندىققا تىرەپ، اياقتى ءتۇزۋ ۇستاپ، دەنەنى بىرنەشە رەت تومەن ءتۇسىرىپ، جوعارى كوتەرەدى.

5.      8-10 رەت جۇرەدەن وتىرىپ-تۇرادى. جوعارى كوتەرىلگەندە قولدى سوزىپ، دەمدى ىشكە تارتادى. تۇسىرگەن كەزدە دەمدى سىرتقا شىعارادى.

6.      وتىرعان قالىپتا ەسپاندەردى ءار جاققا قۇشاق جايا تارتادى.

وسىنداي پروفيلاكتيكالىق ءادىس ادامنىڭ قاجىعان جۇيكە-تامىرىن قالپىنا كەلتىرىپ، دەنساۋلىقتى ساقتاۋعا تولىق مۇمكىندىك بەرەدى.

گ.يكىمانوۆا، پروفەسسور

---