شىمكەنتتە مۇگەدەكتىگى بار ازاماتتار ءۇشىن 967 نىسان بەيىمدەلدى
شىمكەنت قالاسىندا مۇگەدەكتىگى بار ازاماتتاردىڭ قۇقىقتارىن قامتاماسىز ەتۋ جانە قولجەتىمدى ورتا قالىپتاستىرۋ ماقساتىندا 967 الەۋمەتتىك ينفراقۇرىلىم نىسانى تولىق بەيىمدەلدى. بۇل كورسەتكىش 2024 جىلعا جوسپارلانعان 491 نىساننان الدەقايدا جوعارى، ياعني جوسپار ارتىعىمەن ورىندالدى.
ەلىمىزدە ينكليۋزيۆتى ساياسات قالاي ىسكە اسۋدا؟
قازىرگى ۋاقىتتا قازاقستاندا 2025-2030 جىلدارعا ارنالعان ينكليۋزيۆتى ساياسات تۇجىرىمداماسى، «Amanat» پارتياسىنىڭ 2023-2027 جىلدارعا ارنالعان جول كارتاسى جانە پرەزيدەنت تاپسىرماسىنا ساي «حالىقپەن بىرگە» جوباسى جۇزەگە اسىرىلۋدا.
«Amanat» پارتياسىنىڭ جول كارتاسىنا سايكەس، ينتەراكتيۆتى قولجەتىمدىلىك كارتاسىنا ەنگىزىلگەن 42 مىڭنان استام نىساندى كەزەڭ-كەزەڭىمەن بەيىمدەۋ كوزدەلگەن. جوسپارعا ساي، جىل سايىن وسىنداي نىسانداردىڭ 20%-ى بەيىمدەلۋى ءتيىس. 2023 جىلى – 20%، 2024 جىلى – 40%، 2025 جىلى – 60%، 2026 جىلى – 80%، 2027 جىلى – 100% كورسەتكىشكە جەتۋ جوسپارلانعان. بۇگىندە رەسپۋبليكا بويىنشا 22 980 نىسان تولىقتاي بەيىمدەلدى.
شىمكەنت قالاسىندا قانداي نىساندار بەيىمدەلدى؟
وڭىردەگى 967 نىسان مۇگەدەكتىگى بار ادامداردىڭ بارلىق ساناتتارى ءۇشىن قولجەتىمدى. ونىڭ ىشىندە:
- دەنساۋلىق ساقتاۋ نىساندارى – 138؛
- ءبىلىم بەرۋ مەكەمەلەرى – 429؛
- مادەنيەت نىساندارى – 33؛
- ساۋدا جانە قىزمەت كورسەتۋ ورىندارى – 195؛
- مەملەكەتتىك جانە كۆازيمەملەكەتتىك ۇيىمدار – 55؛
- سپورت نىساندارى – 9؛
- الەۋمەتتىك قورعاۋ نىساندارى – 9؛
- وزگە دە نىساندار – 99.
ءبىرىنشى توپتاعى مۇگەدەكتىگى بار ازامات، شىمكەنت تۇرعىنى تولەندى اتاحايەۆ قالادا ينكليۋزيۆتى ورتا قالىپتاسىپ كەلە جاتقانىن اتاپ ءوتتى:
"مۇگەدەكتىگى بار ازاماتتاردىڭ ەركىن قوزعالىسىنا جاعداي جاسالعان. اسىرەسە، مەديسينالىق مەكەمەلەر مەن بانك بولىمشەلەرىندە ىڭعايلى جاعدايلار بار. مىسالى، بايتۇرسىنوۆ كوشەسىندەگى «جۇرەك ورتالىعى» عيماراتىندا پاندۋستار، تاكتيلدى جولاقتار، منەموسحەمالار جانە تەگىس جولدار قاراستىرىلعان."
مەملەكەتتىك باقىلاۋ جانە تەكسەرۋلەر
2024 جىلى الەۋمەتتىك قورعاۋ سالاسىنداعى رەتتەۋ جانە باقىلاۋ كوميتەتىنىڭ شىمكەنت قالاسى بويىنشا دەپارتامەنتى 338 تەكسەرۋ جۇرگىزدى. ونىڭ ىشىندە:
- 25 – پروفيلاكتيكالىق باقىلاۋ؛
- 55 – جوسپاردان تىس تەكسەرۋ؛
- 258 – پروكۋراتۋرا ورگاندارىنىڭ تالابى بويىنشا.
ناتيجەسىندە، 61 نىسانعا بۇزۋشىلىقتاردى جويۋ تۋرالى ۇيعارىم بەرىلدى، 11،2 ملن تەڭگەدەن استام سوماعا 35 اكىمشىلىك ايىپپۇل سالىندى. العاش رەت انىقتالعان بۇزۋشىلىقتار ءۇشىن نىسان يەلەرىنە تەك نۇسقاما بەرىلەدى، ەگەر ولار بەلگىلەنگەن مەرزىمدە ورىندالماسا، ايىپپۇل سالىنادى.
You Might Also Like
-
قازاقستاندا ازىق-تۇلىك باعاسىن تۇراقتاندىرۋ ماسەلەسى تاعى دا وتكىر تۇر. كارتوپ قورى مەن ونىڭ ەسەبى اراسىنداعى سايكەسسىزدىكتەر ۇكىمەتتىڭ قاتاڭ رەاكسياسىنا سەبەپ بولدى. ۆيسە-پرەمەر سەرىك جۇمانعارين ...
-
مەملەكەت باسشىسى قاسىم-جومارت توقايەۆ توتەنشە جاعدايلار ءمينيسترى شىڭعىس ءارىنوۆتى قابىلداپ، ۆەدومستۆونىڭ اتقارعان جۇمىستارى مەن جۇرگىزىلىپ جاتقان رەفورمالار تۋرالى ەسەپ تىڭدادى.
