InfoHub Logo

ءبىر ساراڭ باي ايشىلىق جەردەگى بازارعا ءبىر توپ قويىن ساتۋعا ايداپ كەلىپتى. اكەلگەنى قۇرىسىن، مالىنا بازارداعى جوق نارىقتى سۇراپ، ساۋدالاي كەلگەن ادامداردى ۇركىتىپتى دە تۇرىپتى. بايدان كۇدەر ۇزگەن كىسىلەر كەش تۇسە ۇيدى-ۇيلەرىنە تاراپتى. ءبىر كەزدە باي جان-جاعىنا قاراسا، كەڭ الاڭنىن ورتاسىندا كوزگە شىققان سۇيەلدەي شوشايىپ ءبىر ءوزى قالعانىن كورەدى. ەندى قالاي وتەرىن بىلمەي ساسىپ تۇرعاندا، قاسىنا قالانىڭ قۋاقىلاۋ ءبىر كەدەي جىگىتى كەلەدى:

— بايەكە، مىنا مالدارىڭىزدى ساتاسىز با؟

قالا جۇرتىن الدامشى دەپ ويلايتىن باي:

— كەت اۋلاق! سەنىڭ الداۋىڭا تۇسەتىن اڭقاۋ، اشىق اۋىز مەن ەمەس، — دەيدى.

— جارايدى، ساتپاساڭ، ءوزىڭ ءبىل، — دەيدى الگى قۋ. «تاعى ءبىر كەزدەسەرمىز» دەگەن ويىن ىشىنە ءتۇيىپ كەتەدى ول.

ساراڭ باي ساتا الماعان مالىنا كىرە ەتىپ ايداتىپ، اۋىلىنا قايتادى. ءبىر بەلدەن اسقاندا، جول شەتىندە «قالجيىپ» جاتقان ءبىر سىڭار ەتىكتى كورەدى. الگىنى الىپ، ۇستاپ تۇرادى دا:

— اتتەگەن-اي، مىنانىڭ ەكىنشى سىڭارىنىڭ بولماۋىن-اي، ايتپەسە كيىپ الار ەدىم، — دەيدى. سويتەدى دە، سىڭار ەتىكتى لاقتىرىپ تاستاپ، ىلگەرى تارتادى.

جانە ءبىر قىردان اسقان سوڭ، باي جول شەتىندە جاتقان الگىندەي تاعى دا ءبىر ەتىكتىڭ سىڭارىن كورەدى. الىپ كورسە، جاڭاعى ەتىكتىڭ سىڭارى ەكەن. «قاپ!» دەپ وكىنگەن باي قويلارىن سول اراعا قالدىرادى دا، دەرەۋ كەرى قايتادى. الگىندە الماي تاستاپ كەتكەن ەتىككە جەتۋگە اسىعادى. تاسادا بۇعىپ جاتقان كەدەيدىڭ كۇتكەنى دە وسى بولاتىن. مىنانىڭ ءبارىن ىستەپ جۇرگەن دە سول ەدى. ساراڭ بايدىڭ قاراسى كوزدەن تاسا بولىسىمەن، ونىڭ بار مالىن الدىنا سالىپ، جونىنە تارتىپ وتىرادى. باي سىنار ەتىكتەردى جيناپ، وكپەسى ءوشىپ جەتسە، تاستاپ كەتكەن جەرىندە قويلارى جوق. ول اۋزى اڭقايىپ، قولىنداعى سىڭار ەتىككە قاراپ، جان-جاعىنا ءبىر قاراپ تۇرىپ قالادى.

---