InfoHub Logo

تيىننىڭ كوزىنەن وتكەن ءبىر ساۋداگەر بولىپتى. وعان ەسەسى كەتىپ جۇرگەن بىرەۋلەر تاڭدايبايدىڭ ەسەسىن الىپ بەرۋگە قايراپتى. ءبىر كۇنى تاڭدايباي ونى ارناۋلى ىزدەپ كەلىپ، اتىن بايلاپ قويىپ، قالاشىقتى جاياۋ ارالاپ جۇرسە، الگى ساۋداگەر باسقا ءبىر دۇكەننەن ءبىر ساندىق اسىل بۇيىم الىپ كەلەدى ەكەن. مۇنى كورگەن تاڭدايباي دا سول دۇكەننەن ءبىر ساندىق الىپ، اۋزىنا ءدال سونداي قۇلىپ باسىپ، كوتەرگەن بەتى الگى ساۋداگەردىڭ دۇكەنىنە كەلسە، ساۋداگەر ساندىعىن تەكشەنىڭ ۇستىنە قويىپ، دەمالىپ وتىر ەكەن. تاڭدايباي سالەم بەرىپ كىرىپ كەلىپتى دە، ساندىعىن ساۋداگەردىڭ ساندىعىنىڭ قاسىنا قويىپ:

— مەن ءبىراز قالايى الماق ەدىم، — دەگەن ەكەن. ساۋداگەر ءبىر قاداق قالايى كورسەتىپتى.

— مەنىڭ الماعىم بەس قاداق ەدى، — دەپتى تاڭداباي.

— ونداي بولسا مەن الىپ شىعايىن، — دەپ ساۋداگەر ىشكە كىرىپ كەتكەن كەزدە تاڭدايباي ەكى ساندىقتى اۋىستىرا قويىپتى. ول ساۋداگەر اكەلگەن قالايىنى ارى كورىپ، بەرى كورىپ:

— المايمىن، قالايىڭىز ناشار ەكەن، — دەگەندە، ساۋداگەر ىزا بولىپ:

— الماساڭ كەت ءوزىڭ، اقىماق قىلماي، — دەپ اۋىستىرىپ قويعان ءوز ساندىعىن تاڭدايبايعا تامان يتەرىپتى. تاڭدايباي:

— قالانى ءبىر اينالىپ كەلىپ السام، ساندىعىم وسىندا تۇرا تۇرسا قايتەدى، — دەگەن ەكەن.

— وتتاماي جوعال تەز، اكەت ساندىعىڭدى، — دەپ ساۋداگەر ونان ارى يتەرمەلەپتى. ساندىقتى كوتەرىپ الىپ، تاڭدايباي ءوز جولىنا ءتۇسىپتى. ۇيىنە كەلىپ اشسا، ىشىندەگىسى ءجۇز قويلىق نارسە ەكەن.

---