InfoHub Logo

استانا سوتىندا بلوگەر ەربولات جانابىلوۆ پەن ەلميرا تولەگەنوۆاعا قاتىستى قىلمىستىق ءىس بويىنشا ايىپتاۋ اكتىسى وقىلدى. سوتتا انىقتالعانداي، اتالعان تۇلعالار الەۋمەتتىك جەلىدە وزدەرىنىڭ باقۋاتتى ءومىرىن كورسەتىپ، كوپشىلىكتى سەندىرۋ ارقىلى اقشا تابۋدى كوزدەگەن.

بۇل تۋرالى Infohub.kz اقپارات اگەنتتىگى حابارلايدى.

ءمانسىز ۆيدەوكۋرستار ارقىلى اقشا تابۋ جوسپارى

تەرگەۋ مالىمەتتەرىنە سۇيەنسەك، 2025 جىلى بلوگەرلەر اسا ءىرى كولەمدە قارجى تابۋ ماقساتىندا قىلمىستىق جوسپار قۇرعان. ولار 30 مىڭ تەڭگەدەن ساتىلاتىن ۆيدەوكۋرستاردى ۇسىنعانىمەن، بۇل كۋرستاردىڭ ءبىلىم بەرۋ نەمەسە ەكونوميكالىق قۇندىلىعى بولماعان. ءتىپتى، بۇل ماتەريالدار بۇرىن دا باسقا پلاتفورمالاردا جاريالانعان ەكەن.

«كۋرستار ازاماتتاردى رۇقسات ەتىلمەگەن ۇتىس ويىندارىنا تارتۋ ارقىلى تابىس تابۋعا باعىتتالعان. ولار لوتەرەيانى بۇركەمەلەيتىن قىزمەت اتقاردى. كۋرس ساتامىز دەپ، لوتەرەيا وتكىزۋ ەرەجەلەرىن ازىرلەگەن. لوتەرەيا مەرزىمى 4 ايعا، ياعني 2025 جىلدىڭ 21 تامىزىنان 31 جەلتوقسانىنا دەيىنگى ۋاقىتقا بەلگىلەنگەن»، – دەلىنگەن ايىپتاۋ اكتىسىندە.

ەرەجەگە سايكەس، كەپىلدەندىرىلگەن جۇلدەلەر رەتىندە 10 Hyundai اۆتوكولىگى، iPhone تەلەفوندارى، سونداي-اق 5 مىڭنان 2 ميلليون تەڭگەگە دەيىنگى اقشالاي سىياقىلار قاراستىرىلعان. جالپى جۇلدە قورى 200 ميلليون تەڭگەدەن اسقان. ال كۋرستاردى ساتۋدان 487 ميلليون تەڭگەگە جۋىق قاراجات جيناۋ جوسپارلانعان.

200 ملن تەڭگەدەن استام تابىس

پروكۋروردىڭ مالىمەتىنشە، اكسياعا 16 249 ادام قاتىسىپ، ولاردىڭ ءارقايسىسى 30 مىڭ تەڭگەدەن تولەگەن. وسىلايشا، شىعىنداردى ەسەپتەمەگەننىڭ وزىندە، سوتتالۋشىلار 200 ميلليون تەڭگەدەن استام تازا تابىس تابۋدى كوزدەگەن.

ايىپتاۋ اكتىسىندە جانابىلوۆتىڭ ارەكەتتەرى تۇتىنۋشىلاردى ادەيى الداۋعا باعىتتالعانى ايتىلادى. ول اۆتوكولىك ۇتىپ الۋ مۇمكىندىگى تۋرالى جالعان اقپارات تاراتقان. شىن مانىندە، تاراپتار اراسىنداعى كەلىسىم تەك ونلاين-كۋرستاردى ساتۋمەن شەكتەلگەن. جۇلدەلەردى ۇتىسقا شىعارۋ Instagram جەلىسىندەگى جەكە پاراقشالار ارقىلى جۇرگىزىلگەن، ال رەسمي كورپوراتيۆتىك سايت نەمەسە زاڭدى تۇلعانىڭ اككاۋنتى قولدانىلماعان.

جانابىلوۆ پەن تولەگەنوۆانىڭ Instagram اككاۋنتى جەكە پاراقشالارى بولعاندىقتان، ولار جەكە كاسىپكەر رەتىندە ارەكەت ەتكەن.

«تەرگەۋ بارىسىندا جانابىلوۆ پەن تولەگەنوۆا اراسىندا اكسيالاردى وتكىزۋ قىزمەتىن رەتتەيتىن شارتتىق-قۇقىقتىق قاتىناستاردىڭ بولماعانى انىقتالدى. قىلمىستىق نيەتتى جۇزەگە اسىرۋ ءۇشىن ولار جەكە كاسىپكەرلەر اراسىندا قىزمەت كورسەتۋ تۋرالى فورمالدى شارتتار جاساسقان. جارنامالىق ناۋقاندار دا زاڭدى تۇلعانىڭ ءاتى-جونىن كورسەتپەي، جانابىلوۆتىڭ جەكە اتىنان جۇرگىزىلگەن. بۇل ناقتى ۇيىمداستىرۋشىنى جاسىرۋ نيەتىن بىلدىرەدى»، – دەيدى پروكۋرور.

كولىك ۇتۋ مۇمكىندىگىنىڭ تومەندىگى

ولجاس حايرۋللايەۆتىڭ ايتۋىنشا، جارناما روليگىندە بارابان اينالىپ، جۇلدە ۇتىسقا شىعاتىنى كورسەتىلگەنىمەن، شىن مانىندە اۆتوكولىك ۇتۋ ىقتيمالدىعى ۆيدەودا كورسەتىلگەننەن الدەقايدا تومەن بولعان. تەرگەۋ كەزىندە ۇتىس مەحانيزمىنە وزگەرىستەر ەنگىزىلگەنى دە انىقتالدى: 5000 تەڭگە ۇتۋ ىقتيمالدىعى باسقا جۇلدەلەرگە قاراعاندا جوعارى بولعان.

«ايىپتالۋشىلاردىڭ بارابان پارامەترلەرىنە تەحنيكالىق وزگەرىستەر ەنگىزۋگە مۇمكىندىگى بولعانى جانە مۇنداي ارەكەتتەردىڭ سالدارىنا تۇسىنگەنى ەسكەرىلىپ، بۇل شەشىمدەر ادەيى قابىلدانىپ، ۇتىس ناتيجەلەرىن بۇرمالاۋعا باعىتتالعان دەپ باعالانادى»، – دەيدى مەملەكەتتىك ايىپتاۋشى.