سيفرلار سويلەسىن
ءقازىر بىزدە مىلجىڭدىقتىڭ مەرەيى ۇستەم بولىپ، ءسوزدىڭ ءقادىرى كەتىپ تۇر. ويلارىنا نە كەلسە سونى جازادى، اۋزىنا نە كەلسە،— سونى ايتادى. مۇنداي جاعدايدا ءبىزدىڭ ۇلتتىق ماسەلەلەرىمىزدى بايسالدى تۇردە تالقىلاپ شەشۋ مۇلدە مۇمكىن ەمەس.
بىرەۋى ەلدىڭ ەكونوميكاسىن ارتتىرۋ ءۇشىن جوسپار كەرەك دەيدى، ەكىنشىسى — كۇردەلى قور كەرەك دەيدى، ءۇشىنشىسى — نەسيە كەرەك دەيدى. ءبىرتۇتاس باعىت بولماعان سوڭ جۇرتشىلىق پىكىرىن قالىپتاستىرۋ قيىندايدى جانە بەرەكەسىزدىك بەلەڭ الا بەرەدى. ال ەگەر ءبىز بارلىق ماسەلەلەردى سيفلارعا سۇيەنە وتىرىپ عىلىمي نەگىزدە شەشسەك، ول ماسەلەلەردىڭ بارلىعى باياعىدا-اق رەتتەلىپ بىتەتىن ەدى. قاشاندا بولسىن ءىستىڭ ءتۇيىنىن سيفرلار شەشەدى.
كانە، سيفرلارمەن سىرلاسىپ بايقايىق.
ايتالىق: حالقىمىزدىڭ ءوسۋ قارقىنى جىلىنا ءۇش پروسەنت، ال ۇلتتىق تابىسىمىزدىڭ كەمۋ قارقىنى ەكى پروسەنت دەيىك. بۇل جاعدايدا ەكونوميكانى دامىتۋ ءۇشىن ەكونوميكالىق ءوندىرىستىڭ ءوسۋ قارقىنى ەڭ كەمىندە جەتى پروسەنت بولۋعا ءتيىس. ال وندىرىستە ەڭبەك ەتىپ جۇرگەن جانە ۇلتتىق تابىستىڭ الپىس پروسەنتىن قامتاماسىز ەتكەن ءجۇمىسشىلار بۇل تابىستىڭ ون توعىز پروسەنتىن عانا الادى. بۇدان نەنى بىلۋىمىزگە بولادى؟ كەلىڭىز، سيفرلاردى سويلەتەيىك. ەكونوميكالىق ءوندىرىستىڭ ءوسۋ قارقىنىنداعى جەتى پروسەنتتى الامىز دا، حالىقتىڭ ءوسۋ قارقىنىنداعى ءۇش پروسەنتكە كوبەيتەمىز، تورتكە بولەمىز، قالدىعىن ون توعىز پروسەنتتەن الىپ، سونسوڭ بەس پروسەنتكە بولەمىز. قانشا بولدى؟ و! بۇل ويىنشىق ەمەس! ەندى بۇنى الپىس پروسەنتكە قوسامىز، ءۇش پروسەنتكە كوبەيتەمىز، ءۇش جارىمعا بولەمىز. سونسوڭ بۇدان شىققان ناتيجەگە توعىز ءجۇز سەكسەندى، ياعني باعانىڭ وسۋ پروسەنتىن قوسامىز جانە 589561ء-دى (مەنىڭ تەلەفون ءنومىرىمدى) تاعى قوسامىز. قانشا بولدى؟ مىنە، كوردىڭ بە، الاقانىڭا سالعانداي اپ-ايقىن بوپ شىعا كەلدى!
ءارقاشان وسىلاي ىستەۋ كەرەك. ماسەلەنى تالقىلاۋعا كىرىسپەس بۇرىن سيفرلاردى سايلاپ العان ءجون. سودان كەيىن بارىپ ەسەپتەپ كەپ جىبەرسەڭ،— ءبارى دە بەپ-بەلگىلى بولا قالادى، جاعدايدىڭ ءالى دە سونشاما ءۇمىتسىز ەمەس ەكەنىن سەزەسىز... ءبىزدىڭ قۇرمەتتى پرەمەر-مينيسترىمىز كەز كەلگەن ماسەلەنى تالقىلاۋ ءۇشىن قاشاندا بولسىن اۋەلى سيفرلارىن سايلاپ الادى.
ەسكەرتۋ. ەگەر ءسىز ماسەلەنى سيفرلارعا سۇيەنە وتىرىپ تازا عىلىمي تۇرعىدان شەشۋدى ويلاساڭىز، باسىڭىزدىڭ رازمەرىنىڭ تۋرا جارتىسىن كورسەتەتىن سيفردى الىڭىز دا، ونى بويىڭىزدىڭ ۇزىندىعىنا كوبەيتىپ، سونسوڭ سالماعىڭىزعا ءبولىڭىز...
سوندا، جەر-كوكتەن ىزدەپ تابا المايتىن عىلىمي اقيقات اقپارلار ءسىزدىڭ قولىڭىزدا بولىپ شىعادى!
اڭگىمەنى ورىسشادان اۋدارعان عابباس قابىشيەۆ
You Might Also Like
-
ءوز ماماندىعىندا تابىسقا جەتكەن ادامدار ورتاق ءبىر قاسيەتكە يە – ولار ارەكەت ەتەدى جانە ناتيجەگە قول جەتكىزەدى. بۇل قاسيەت اقىل-پاراساتتى، دارىن، ءوز تابىسىڭدى انىقتاي الۋ مەن تابىسقا جەتۋ قارقى...
-
الەمدەگى ەڭ جىلدام ادام يامايكالىق سپورتشى — ۋسەين بولت. ءۇش دۇركىن وليمپيادا ويىندارىنىڭ چەمپيونى، بىرنەشە مارتە الەم چەمپيونى اتاعىنا يە بولعان، سپرينتەردىڭ ءۇش ەرەجەسى بويىنشا الەمدىك ءۇش رە...
