InfoHub Logo

تاراز قالاسىندا الماتى وبلىسى ىلە اۋداندىق ءماسليحاتىنىڭ دەپۋتاتى، ادۆوكات نۇرلان بايعازييەۆ سوققىعا جىعىلدى. وقيعا 13 مامىر كۇنى كەشكىسىن جەرگىلىكتى كافەلەردىڭ بىرىندە بولعان. الدىن الا مالىمەتكە سايكەس، شابۋىل كاستەتپەن جاسالعان بولۋى مۇمكىن.

جامبىل وبلىستىق دەنساۋلىق ساقتاۋ باسقارماسىنىڭ حابارلاۋىنشا، بايعازييەۆ سول جاق بەت سۇيەگىنىڭ سىنۋى دياگنوزىمەن اۋرۋحاناعا جەتكىزىلگەن. جاراقات اشىق بولماعانىمەن، ناۋقاسقا بارلىق قاجەتتى مەديسينالىق كومەك كورسەتىلگەن. الايدا ول اۋرۋحانادا جاتۋدان ۇزىلدى-كەسىلدى باس تارتقان.

«ناۋقاس سول جاق بەت سۇيەگىنىڭ سىنۋى دياگنوزىمەن ءتۇستى. تەرىدە جاراقات بولماعان. بارلىق مەديسينالىق كومەك كورسەتىلدى. گوسپيتاليزاسيا ۇسىنىلدى، ءبىراق ناۋقاس ودان باس تارتتى»، – دەلىنگەن باسقارما مالىمدەمەسىندە.

وقيعاعا قاتىستى پوليسيا ق ر قىلمىستىق كودەكسىنىڭ 293-بابى 1-بولىگى («بۇزاقىلىق») بويىنشا سوتقا دەيىنگى تەرگەۋ باستاعان. شابۋىل جاساعان ادامنىڭ جەكە باسى انىقتالىپ، ول پوليسياعا جەتكىزىلگەن.

«ءقازىر قىلمىستىق ءىس بويىنشا بارلىق ءمان-جايدى انىقتاۋعا باعىتتالعان تەرگەۋ جانە جەدەل-ىزدەستىرۋ شارالارى جۇرگىزىلۋدە»، – دەپ حابارلادى جامبىل وبلىستىق پوليسيا دەپارتامەنتى.