InfoHub Logo

باياعىدا ەكى جىگىت جولاۋشىلاي كەلە جاتىپ، ءبىر بايدىڭ اۋىلىنا تاياعاندا اتتارىنان ءتۇسىپ، دەمالىپتى. بىرەۋى قاتتى قۋ بولسا كەرەك. ول ىشتەي «باي مەن جولداسىمدى قوسا ءبىر الداسام» دەپ ويلاپتى دا، جولداسىنا:

— ءبىز بۇگىن انا اۋىلداعى بايدىڭ ۇيىنە قونامىز، ول ۇيگە بارعاندا مەن باسقا جەردەن كەلگەن بولايىن دا، سەن ماعان ەرگەن اتقوسشى بول. باي ءۇيىنىڭ الدىنا بارعاندا مەنى اتتان سۇيەپ ءتۇسىرىپ، ەسىك اشىپ ۇيگە كىرگىز. ودان كەيىن ارقاما قالىڭداۋ قىلىپ توسەنىش قوي، سوندا الدىمىزعا مول تاباق تارتىلادى. تاباقتان كەيىن تەگەنەمەن تارىنىڭ قاۋىزىن اكەلەدى. مۇنى كوبىنەسە بايلاردىڭ اتقوسشىسى جەيدى. سوندا الدىمەن ءبىر ۋىسىن الىپ «ءبىز دە تويىپ قالدىق قوي» دە داعى، اۋزىڭا سالىپ اساي سال، ايتپەگەندە، ولار ساعان تەگەنەدەگى قاۋىز تۇگەگەنشە جەگىزەدى، — دەپ اقىل ۇيرەتىپتى. ايتقانداي-اق كەشتە بۇلارعا تۇرە تاباق ەت تارتىلىپ، ارتىنان قولدىڭ مايىن سۇرتۋگە تارىنىڭ قاۋىزىن اكەلىپتى. باي بولعان جىگىت دەرەۋ اتقوسشىلىق ىستەگەن جولداسىنا:

— انانى تەز الىپ جىبەر، — دەپ ىم قاعىپتى.

— ءبىز دە تويىپ قالدىق قوي، — دەپ اتقوسشىسى قاۋىزدى اساپ جىبەرىپ، قاقالىپ قالىپتى. بۇعان ۇيدەگىلەر دۋ كۇلىپتى.

— اتتەڭ، سەنىڭ مىسقىلشىلىعىڭ-اي، — دەپ جىگىت قاقالعان جولداسىنا قاراپتى. سوندا مۇنى بايقاپ وتىرعان باي:

— قوناقتار تويماي قالىپ، قاۋىز جەگەن ەكەن، — دەپ قايتادان قازان استىرىپتى. ءسويتىپ، قۋ جىگىت امالىن اسىرىپ كەتكەن ەكەن.

---