InfoHub Logo

تۇلكى مەن تىرنا دوستاسىپ، بىرگە تۇرماق بولىپتى، ەكەۋى ءبىر جەرگە قونىستانىپتى. ىشىپ-جەمەگى ورتاق. ءبىرى جەم ىزدەپ، ساياحاتقا كەتكەندە، بىرەۋى بالاپاندار مەن كۇشىكتەردىڭ جانىندا قالادى.

كۇندەردىڭ كۇنىندە تىرنانىڭ تاز بالاپاندارىنا ءجۇن شىعىپ، جورعالايتىن بولادى. تۇلكىنىڭ كۇشىكتەرى پۇشپاق بولىپ قۇلپىرادى. انالارى بالالارىن اۋىق-اۋىق جاتاقتىڭ جانىنداعى جايداققا سەرۋەنگە الىپ شىعىپ جۇرەدى.

ءبىر كۇنى تىرنا ساياحاتقا كەتىپ، تۇلكى بالالاردى باعىپ ۇيدە قالادى. ءبارىن سەرۋەنگە الىپ شىعادى، بالاپاندار مەن كۇشىكتەر اپىر-توپىر الىسىپ، ويناپ جۇرەدى. ونى كورىپ وتىرعان تۇلكىگە وي تۇسەدى:

— وسى، مەنىڭ مۇنىم نە، مىنا تىرنانىڭ تۇقىمدارىنىڭ مەكەنى - اسپان. جايشىلىقتا بۇلار قۇدايدان تىلەپ الا المايتىن تاماق قوي. بۇل ارى-بەرىدەن سوڭ، ۇشادى دا كەتەدى. ساندى سوعىپ ءبىز قالامىز. دوستاساتىن، بۇلار مەنىڭ ەكى تۋىپ، ءبىر قالعانىم با؟ مەنىڭ مىنا كۇشىكتەرىم دە قۇس ۇستاۋعا ۇيرەنۋى كەرەك. قوي، كىسى بالاسى كىسىگە بالا بولمايدى. ودان دا، – دەپ، تىرنانىڭ ءبىر بالاپانىن تىريتىپ الىپ ۇرىپ، كۇشىكتەرىنە قالاي ۇستاپ، قالاي ءولتىرىپ، قالاي جەۋدى كورسەتەدى.

سويتە-سويتە كۇشىكتەر اناسىنىڭ باۋلۋىمەن بار بالاپانداردىڭ باسىن قۇرتادى. ولتىرگەن بالاپاندارىن اۋلاققا اپارىپ، تىعىپ تاستايدى دا قايتىپ جاتاققا جايلاسادى. كەشىندە تىرنا قايتادى. تۇلكى تىرنانىڭ الدىنان شىعىپ، جىلامسىرايدى.

تىرنا:

— ەي، نە بولدى؟ – دەيدى.

تۇلكى:

— ءاۋ، بىلمەيمىن. بالالاردىڭ سانى از كورىنەدى – دەيدى.

تىرنا اپالاقتاي ساسقالاقتاپ:

— جوعى سەنىكى مە، مەنىكى مە؟ – دەپ سۇرايدى.

تىرنانى قىجىرتا كەكەتىپ:

— ءاي، بايعۇس-اي، ويىڭنىڭ ارامى-اي، قانشا باۋىرعا تارتسام دا بولەكتەنگەن ءسوزىڭنىڭ ۇشقىنى شىعادى دا تۇرادى. بالاپانداردى سەنىكى، مەنىكى دەۋشى مە ەدىك، – دەپتى قۋ تۇلكى.

---