InfoHub Logo

ءبىر قاسقىر تاماق ىزدەپ كەلە جاتىپ، قۇرۋلى تۇرعان قاقپانعا ءتۇسىپ قالادى. ولاي جۇلقىنىپ، بۇلاي جۇلقىنىپ، زورعا قۇتىلادى. قاشىپ بارا جاتقان قاسقىردى اڭشىلار كورىپ، ارتىنان قۋا جونەلەدى. قاسقىر ساسقالاقتاپ ءبىر ەگىنشىگە كەلىپ جايىن ايتادى:

         — قايتسەڭ دە مەنى جاسىر، ۇمىتپاسپىن جاقسىلىعىڭدى. مەنى قابىڭا سالىپ، ارقالاپ جۇرە بەر. قاسقىر جىلاپ تۇرعان سوڭ، ەگىنشى قابىنا سالىپ الىپ، ارقالاپ جۇرە بەرەدى. كەشىكپەي اڭشىلار مىلتىعىن جارقىلداتىپ جەتىپ كەلەدى.

         كىسىدەن:

         — قاشىپ بارا جاتقان قاسقىر كورمەدىڭ بە؟ – دەپ سۇرايدى. كىسى:

         — جاڭا ءبىر قاسقىر اناۋ ماڭايدان قاشىپ ءوتتى، تەزىرەك ۇمتىلىڭدار، – دەيدى.

         اڭشىلار بەل اسىپ كەتكەننەن كەيىن، ەگىنشى قاپتىڭ اۋزىن شەشىپ، قاسقىرعا:

         — جونىڭە بارا بەر، ماعان دا ءبىر جاقسىلىق ەتەرسىڭ، – دەيدى. قاسقىر قۋانىپ ەگىنشىگە:

         — مەن سەنى جەيمىن، قارنىم اشتى، – دەپ تاپ-تاپ بەرەدى. ەگىنشى بايعۇس ساسقالاقتاپ:

         — اي، قاسقىر، بۇنىڭ قالاي، مەن سەنى ولىمنەن قۇتقارىپ الىپ قالىپ ەدىم، جاقسىلىققا جاماندىق ەتە مە ەكەن، ولاي بولسا، بىرەۋدەن تورەلىك سۇرالىق، قايسىمىزدىكى ءجون ەكەن، – دەيدى.

         ەكەۋى كەرىسىپ تۇرعاندا، قاڭعىرىپ ءبىر جاعىنان تۇلكى كەلەدى. بۇلار تۇلكىگە وقيعانى باستان-اياق ايتىپ شىعادى.

         تۇلكى:

         — جوق ءسوزدى ايتپاڭىزدار، مەنەن باسقا بىرەۋ ەستىسە، كۇلىپ جۇرەر، مىنا دورباعا ۇلكەن قاسقىر سىيادى دەگەنگە نانبايمىن، بارىپ تۇرعان وتىرىك، – دەيدى.

         قاسقىر مەن كىسى:

         — بۇل راس، – دەپ كەرىسىپ بولمايدى. تۇلكى قاسقىرعا:

         — قاپقا كىرمەي سەنبەيمىن، – دەيدى. قاسقىر سەندىرمەكشى بوپ قاپقا كىرگەندە، تۇلكى ەگىنشىگە:

         — بايلا قاپتىڭ اۋزىن، ەندى قيمىلدايتىن كەزىڭ كەلدى. قانە، مەن كورەيىن، كۇزدىگۇنى ەگىندى قالاي سوعىپ ءجۇرسىڭ؟ – دەيدى.

         ەگىنشى قۇرالىن الىپ، قاسقىردى ۇرا باستايدى.

         تۇلكى:

         — ەندى قاپتىڭ اۋزىن اش، – دەيدى.

قاسەكەڭ الدى-ارتىنا قاراماستان اتا جونەلەدى. ارتىنان تۇلكى:

         — كوپتەن بەرى ىستەگەن ءبىر ءادىل تورەلىگىم ەدى، – دەپ ساق-ساق كۇلىپتى. ءسويتىپ، ەگىنشى بايعۇس تۇلكىنىڭ ايلاسىمەن اجالدان قۇتىلىپتى.

---