ءتىس
بەرىككە كۇندە تاڭەرتەڭ ەرتە تۇرىپ ءتىسىن تازالاپ ءجۇرۋدى ايتقالى قاشان؟ قۇلاعىنا ءسوز كىرگىزە الماعان اكە-شەشەسى اقىرى شارشاپ تىنعان-دى. ءبىراق، ءبىر كۇنى سول جالقاۋ بەرىكتىڭ اياقاستى ءتىسىن ىسىپ، تازالاپ جۋا باستاعانىن كورگەن دە، ۇيدەگىلەر تاڭ-تاماشا بولدى. اۋەلى شەشەسى بايقاپتى.
— سەن بىردەڭە دەدىڭ بە... بەرىك كەشەلى بەرى ەرتە تۇرىپ ءتىسىن شايىپ ءجۇر عوي؟ — دەدى ەرتەڭگىلىك شاي ۇستىندە وتىرعاندا وتاعاسىعا.
— جوق-ا! ايتا-ايتا جالىعىپ، قويعالى قاشان! — دەدى وتاعاسى تاڭدانىپ. — وعان نە بوپ قالدى ەكەن؟
— بىلمەدىم... مەن دە ايتۋدى باياعىدا قويعام... الدە ءتىسى اۋىردى ما ەكەن؟
سۇراۋلارىنا جاۋىپ تاپپاعان ەكەۋى اڭتارىلعان كۇيلەرىندە جۇمىستارىنا كەتىپ ەدى، كەشكە قاراي ۇيگە كەلگەن سوڭ، تاڭدانىستى اڭگىمە قايتا جالعاندى.
— ... الدە ءتىسى اۋىردى ما ەكەن؟ — دەدى باسقا سەبەپ تابا الماعان شەشەسى اقىرىندا تاڭەرتەڭگى تۇسپالىن تاعى قايتالاپ.
— جوق. ونىڭ ءتىسى اۋىرعان جوق. الماستىڭ ءتىسى اۋىرعان، — دەدى وسى كەزدە مەكتەپتەن ەرتە كەلگەن ءبىرىنشى سىنىپ وقۋشىسى كىشكەنە ەرىك سوزگە ارالاسىپ.
— الماس دەگەن كىم ەدى؟ — دەدى اكەسى ەرىكتىڭ ءبىر نارسەنى بىلەتىنىن اڭعارىپ.
— ول دەگەن بەرىك اعاممەن بىرگە وقيتىن بالا.
— ونىڭ ءتىسى قاشان اۋىرىپتى؟ — دەدى شەشەسى اڭگىمەنى ارى جالعاپ.
— ونىڭ ءتىسى الدىڭعى كۇنى اۋىرىپتى. مەكتەپتە جۇرگەندە سۋ ىشكەن ەكەن، قاتتى قاقساپتى. «ول جىلادى» دەيدى بەرىك اعام. ارتىنان ونى ءتىس دارىگەرىنە اپارىپتى. دارىگەر ونىڭ ءتىسىن بىردەڭەمەن شۇقىلاپ، ودان ارى اۋىرتىپتى. ارتىنان «ءتىسىڭدى جۇلۋ كەرەك، اكە-شەشەڭدى ەرتىپ كەل» دەپتى. ەكەۋى الماستىڭ ۇيىنە كەلىپ، اكەسىن ەرتىپ اپارىپتى.
— سودان كەيىن؟
— سودان كەيىن الماستىڭ ءتىسىن جۇلىپتى. الماس قاتتى جىلاپتى. بەرىك اعام قورقىپ كەتىپتى...
— سودان...
— ارتىنان بەرىك اعام دارىگەردەن الماستىڭ ءتىسىن نەگە جۇلىپ تاستاعانىن سۇراپتى. سويتسە، دارىگەر «الماستىڭ ءتىسىن قۇرت جەپ قويىپتى» دەپتى. بەرىك اعام دارىگەردەن «قۇرت نەگە جەپ قويادى؟» دەپ سۇراعان ەكەن، دارىگەر «الماس ءتىسىن دۇرىس كۇتپەگەن. كۇندەلىكتى تازالاپ جۇرمەگەن» دەپتى. «ءتىستى جۋماسا، قۇرت جەپ قويا ما؟» دەپ سۇراپتى بەرىك اعام تاعى دا. «ءيا، — دەپتى دارىگەر. — ەگەر ءتىستى جاقسى كۇتپەسە، ءشىرىپ كەتەدى. شىرىگەن سوڭ اۋىرادى» دەپتى... بۇنىڭ ءبارىن ماعان بەرىك اعام ايتىپ بەرگەن. ول تاعى «بۇدان كەيىن ەكەۋمىز ءتىسىمىزدى تازالاپ، جۋىپ جۇرەيىك» دەدى. ءتىس اۋىرعان جامان ەكەن. ەكەۋمىز كۇندە ءتىسىمىزدى جۋىپ ءجۇرمىز.
— بۇلاي بولعاندا، اۋزىن شايمايتىن بالالاردى ءتىس ەمدەيتىن جەرگە اپارىپ، ءتىسى اۋىرعانداردى كورسەتۋ كەرەك بولدى عوي، — دەپ كۇلدى اكەسى.
— باسە، — دەدى شەشەسى ەرىكتىڭ باسىنان سيپاپ قويىپ. — بۇعان اياقاستى قايداعى اقىل كىرە قالدى دەسەم...
You Might Also Like
-
بۇزىلىپ (ايەلىم ەستىمەسىن)، ياعني اۋىرىپ جاتقان ايەلىمدى زاپچاست رەتىندە ساتامىن. مىنەزىنە كاپرەمونت قاجەت. ارتىق دوڭعالاقتارى، وي-ب-ۋ-ۋ-ۋ قارا دومالاقتارى جوق. ۇرىس كەزىندە موتورى تەز وتالادى. ءسون...
