تىشقان، يت جانە مىسىق
ەرتەدە يت، مىسىق جانە تىشقان ۇشەۋى دوس بولىپتى. سوندا دا يت پەن مىسىق تىشقاندى ونشا جاقتىرمايدى ەكەن. تىشقان كۇنى-تۇنى تىنبايتىن ەڭبەكقور بولىپتى. ال يت پەن مىسىق تاپقانىن جەپ، جۇمساق ءشوپ پەن جىلى جەردە جاتىپ الادى. ءبىر كۇنى يت قاسىنداعى مىسىققا:
— وسى تىشقاننىڭ جۇمىسى تاۋسىلمايدى، ءتىپتى. كۇيبەڭدەيدى دە جۇرەدى، – دەپ، قىنجىلادى. سوندا مىسىق:
— ءوزىمىز شولجيىپ جاتىپ بىرەۋدى كۇندەيمىز. وسىنىمىز دۇرىس پا؟ – دەپ، يتكە ءجونىن ايتادى.
يت ۇيالىپ قالادى دا ءوزى دە شارۋا ىستەمەك بولادى. سودان بىلاي قاراي تىشقانعا كومەكتەسىپ جۇرەدى.
— سەن دە قول ۇشىڭدى بەر، – دەيدى ەندى يت مىسىققا. وعان مىسىق كونبەيدى.
— وزدەرىڭ-اق ىستەي سالىڭدار!..
يت پەن تىشقان وعان:
— جالقاۋلىقتى قوي، بىرگە جۇمىس ىستە، – دەيدى.
— ءاي، مەن سەندەردىڭ جۇمىستارىڭدى كۇندەپ جاتقان جوقپىن عوي. نەگە تيىسەسىڭدەر، – دەپ، مىسىق اشۋلانادى. يت پەن تىشقان ۇندەمەي جۇرە بەرەدى. مىسىققا تاماق قالدىرماي، وزدەرى جەيدى. اش مىسىق ەندى يت پەن تىشقاننىڭ تاپقانىن ۇرلاي باستايدى. مۇنى كورىپ قويعان تىشقان مىسىقتىڭ ۇرلىعىن يتكە ايتادى. يت وڭدىرماي تالايدى.
سودان بەرى يت پەن مىسىق ءوش ەكەن. ءبىرىن-بىرى كورسە تالاپ تاستاۋعا دايىن تۇرادى. ال تىشقانعا ىزا بولعان مىسىق ونى ۇستاپ الىپ جەي سالادى ەكەن.
You Might Also Like
-
ورمان شەتىندە دومالانىپ بارا جاتقان كىرپىنى اش قاسقىر باس سالادى. سول كەزدە كىرپىنىڭ ينەلەرى قانجارداي قادالىپ، قاسقىردىڭ تۇمسىعى مەن تاماعى قانعا بويالادى. ءوزىنىڭ وزبىرلىعىن، قوماعايلىعىن سەزدىرگىس...
-
ەرتەدە حالىق دەگەن ءبىر كەدەي ءومىر ءسۇرىپتى. مال دەگەندە ون شاقتى ەشكىسى، جالعىز اتى جانە التىن قاۋىرسىندى قورازى بولىپتى. ول كەزدە قوراز ايعاي سالىپ، ەشكى دە باقىرمايدى ەكەن.
