InfoHub Logo

ءبىر كۇنى بۇركىت قارا قارعاعا كەزىگىپ:

          — قارعام، ەكەۋىمىزدىڭ دە تەگىمىز - قۇس. ءبىراق سەندەر جۋاس قۇسسىڭدار، نە بولسا سونى جەپ، ءۇش ءجۇز جىلعا دەيىن ءومىر سۇرەسىڭدەر. ال ءبىز بولساق، وتىز جاستان ارەڭ اسىپ بارىپ جىعىلامىز. بۇل قالاي؟ – دەپ سۇراپتى.

          سوندا قارعا:

          — سەندەر ىلعي جەمتىكتى تىرىدەي جەپ، قانىن ىشەسىڭدەر. ءبىز بولساق، تەك ولەكسەلەرمەن عانا كۇن كورەمىز، – دەپتى.

          سودان كەيىن بۇركىت پەن قارعا ەكەۋى جەمتىك ىزدەۋگە شىعادى. ۇشىپ كەلە جاتىپ، ايدالادا جاتقان ءبىر جىلقىنىڭ ولەكسەسىن كوزدەرى شالادى.

          ىزدەگەن جەمى تابىلعان قارعا ولەكسەنى قۇشىرلانا شوقي باستايدى. ۇزاق ءومىر سۇرۋگە سەبەپشى بولار ما ەكەن دەگەن ويمەن بۇركىت تە ءدام تاتۋعا كىرىسەدى. جەمتىكتى شوقي بەرگەن بۇركىت كىلت شەگىنشەكتەيدى.

          — قۇرىسىن، يىستەنىپ كەتىپتى، وتە ءدامسىز ەكەن. جۇرەگىمدى اينىتتى. مۇندايدى جەپ ءۇش ءجۇز جىل ءومىر سۇرگەنشە، اتا-بابا سالتىنان اينىماي، وتىز-اق جىل ءومىر سۇرگەنىمنىڭ ءوزى ارتىق ەكەن، – دەپ ۇشا جونەلىپتى.

---