قاسقىر نەگە ۇليدى؟
ەرتەدە حالىق دەگەن ءبىر كەدەي ءومىر ءسۇرىپتى. مال دەگەندە ون شاقتى ەشكىسى، جالعىز اتى جانە التىن قاۋىرسىندى قورازى بولىپتى. ول كەزدە قوراز ايعاي سالىپ، ەشكى دە باقىرمايدى ەكەن.
كۇندەردىڭ ءبىر كۇنىندە اقسيعان ءتىسى بار، ادام قورقار ءتۇسى بار ءبىر اڭ كەلىپ، كەدەيدىڭ ەكى ەشكىسىن الىپ كەتەدى.
— ءوزى بارىپ تۇرعان قاسكۇنەم ەكەن، قىردى دا كەتتى، — دەيدى حالىق كۇيىنىپ كەمپىرى مەن بالاسىنا.
— ول ءوزى بىزگە قاس، ەشكىلەردى قىردى، دەمەك، ول قاسقىر عوي، — دەپ قالادى سوندا بالا. سودان باستاپ قاسقىر قاسقىر اتانعان ەكەن. قاسقىرلار كەدەيدىڭ مالىن قىرۋدى قويمايدى. كەش قارايعاندا، ءتىپتى، قاماۋلى تۇرعان ەشكىنى قوراعا ءتۇسىپ الىپ كەتەتىن بولادى. وندايدا ەشكىنىڭ بار بىتىرەتىنى: ساقالى شوشاڭداپ باقىرادى ەكەن. قوراز بولسا، التىن قاناتىن قاعىپ-قاعىپ جىبەرىپ: «كۋ، كا-رە، كۋ!» — دەپ، ايعايعا باسادى. ونىسى: قاسقىرلار كەلدى، قۋا گور دەپ، حالىق اتايعا حابار بەرگەنى ەكەن دەسەدى. سول ءتۇن، سول كۇننەن باستاپ، قوراز شاقىراتىن بولىپتى، ەشكى دە باقىراتىن بولىپتى.
حالىق اتاي كۇندە ۇيىنە قايتقاندا، ورىستەن قاسقىرلار جەمەي، تاستاپ كەتكەن ەشكىنىڭ قۇيىرشىقتارىن ءبىر ەتەك قىپ جيناپ الا كەلىپ جۇرەدى.
ءبىر كۇنى كەدەيدىكىنە ساقالى بەلىنە تۇسكەن ءبىر اقساقال كەلەدى. ول:
— جاۋىزدىقپەن كۇرەسۋ مەنىڭ پارىزىم ەدى. ءما، مىنا كىتاپتى ال. وقى. وقىعانىڭدى كوڭىلىڭە توقي ءبىل. ەرىنبەسەڭ، دۇشپانىڭنان قۇتىلاسىڭ، — دەپ، كەدەيدىڭ بالاسىنا ءبىر كىتاپ بەرەدى.
سول كۇننەن باستاپ، بالا كىتاپتان كوز المايدى. ونىڭ بار ويى جاۋىز قاسقىردى ولتىرەتىن ءدارى جاساپ شىعارۋ بولادى. اقىرى، بىرنەشە ءشوپ تامىرلارىن قايناتىپ، ءدارى جاسايدى. ونى اپارىپ قۇيىرشىق جەمتىككە سەۋىپ قويادى. ەشكىلەردى ۇيگە قامايدى. قاسقىرلار ءبىرىنشى كۇنى كەلىپ، ءۇيدى توريدى، ەشكىلەر كورىنبەيدى. ەكىنشى كۇنى كەلەدى، ەشكىلەر شىقپايدى. ءۇشىنشى كۇنى قاسقىرلار ىرىلداپ كەلىپ، ءۇيدىڭ ىرگەسىن قازا باستايدى. ءبىراق ۇيگە كىرۋگە باتپايدى. ەشكىدەن كۇدەر ۇزگەن سوڭ، جاۋىزدار جەمتىككە جينالادى. قوماعايلاۋ بىرەۋى كەلگەن بەتىندە ارس ەتىپ، جەمتىكتى قاۋىپ وتەدى دە: «ۋ-ۋ-ۋ...» — دەپ، مۇرنىنان شانشىلا قۇلاپ تۇسەدى. قالعاندارى باسى اۋعان جاققا قاشا جونەلەدى.
سودان بەرى قاسقىرلار: «ۋ-ۋ-ۋ!..» — دەپ ۇليتىندى شىعارىپتى.
You Might Also Like
-
ەرتەدە يت، مىسىق جانە تىشقان ۇشەۋى دوس بولىپتى. سوندا دا يت پەن مىسىق تىشقاندى ونشا جاقتىرمايدى ەكەن. تىشقان كۇنى-تۇنى تىنبايتىن ەڭبەكقور بولىپتى. ال يت پەن مىسىق تاپقانىن جەپ، جۇمساق ءشوپ پەن جىلى ...
-
ەلپەڭدەي جۇگىرىپ كەلە جاتقان تۇلكىنىڭ سيراعى سارىشۇناقتىڭ ىنىنە ءتۇسىپ كەتىپ، كەپتەلىپ قالىپتى. قانشا اۋرەلەنسە دە قايتا تارتىپ شىعارا المايدى. ىنىندە جاتقان سارشۇناق سۇعىنىپ تۇرعان تۇلكىنىڭ تابانىن...
