تىشقاندار
قامباعا باس سۇقسا-اق مىسىق باس سالىپ، اجالعا تاپ بولا بەرگەن سوڭ، تىشقاندار وڭاشا ءبىر قۋىسقا جينالىپتى دا كەڭەس قۇرىپتى.
– جاۋىز مىسىقتان قالاي قۇتىلامىز؟ – دەپتى، ءماجىلىستى باسقارىپ وتىرعان تىشقان. ءبارى ءۇنسىز ويلاسىپ، امال ىزدەي باستاپتى. ءارى ويلاپ، بەرى ويلاپ، ەشقانداي شارا ويلارىنا تۇسپەپتى.
ءسويتىپ دال بولىپ وتىرعاندا:
– مىسىقتىڭ موينىنا قوڭىراۋ تاعىپ قويالىق، – دەپتى ءبىر تىشقان بىلگىشسىنىپ. – سوندا ونىڭ كەلە جاتقانى الىستان ەستىلەدى. ءبىز دىبىسىن ەستي سالا، تىعىلىپ ۇلگەرەمىز.
بۇل كەڭەسكە ءبىر كارى تىشقان مىسقىلداي كۇلىپ، بىلاي دەپتى:
– جارايدى، سولاي-اق ىستەيىك.
دال بولعان تىشقاندار امال تابىلعانىنا قۋانىپ:
– سولاي ىستەيىك! – دەپ داۋىستاپ جىبەرىپتى. بۇلاردان كارى تىشقان:
– سوندا مىسىقتىڭ موينىنا قايسىڭ بارىپ قوڭىراۋ تاعاسىڭ؟ – دەپ سۇراپتى.
تىشقاندار نە ايتارىن بىلمەي، ءۇرپيىسىپ قالىپتى.
ءسويتىپ، تىشقاندار كۇنى بۇگىنگە دەيىن مىسىقتان قۇتىلۋدىڭ امالىن تابا الماي كەلەدى ەكەن.
You Might Also Like
-
ەرتەدە ءبىر دانىشپان كىسى بولىپتى. ول كىسى جان-جانۋارلاردىڭ، قۇرت-قۇمىرسقانىڭ ءتىلىن بىلەدى ەكەن.
-
ەرتەدە ءبىر اسقان مەرگەن بولىپتى. اتقان وعىنان جۇگىرگەن اڭ، ۇشقان قۇس قۇتىلمايدى ەكەن. اڭشى ۇستىنە ءوزى اتقان اڭداردىڭ تەرىسىن جامىلىپ ءجۇرىپتى. سوندىقتان ءوزىنىڭ ءتۇر-تۇسى دە الىستان قاراعاندا اڭ سياقت...
