InfoHub Logo

اققويلى بي توقسابا دەگەن كىسى جولاۋشىلاپ كەلە جاتىپ، ءبىر اۋىلدىڭ سىرتىندا قوزى باققان جاس بالاعا جولىعىپ:

         – بالام، بۇل قوزى كىمدىكى؟ – دەپتى.

         – اتا، قوزى قويدىكى،– دەپتى بالا.

         – اكەڭنىڭ اتى جوق پا ەدى؟ – دەپتى توقسابا.

         – اكەمنىڭ قارا، تورى، قۇلا اتى دا بار، – دەپتى بالا.

         – شىراعىم، اۋلىڭنىڭ ۇلكەنى كىم؟ – دەپتى توقسابا تاعى.

         – ۇلكەنى تۇيە بولادى، – دەپتى بالا.

         – جوق، بالام، ساقالدىسىن ايتام؟ – دەسە:

         – اۋىلدىڭ ساقالدىسى تەكە،– دەپتى. توقسابا سوزدەن توسىلىپ، شاقشاسىن الىپ ناسىبايىن اتىپتى. سوندا بالا:

         – اتا، شاقشاڭىز نەنىڭ ءمۇيىزى؟ – دەپ سۇراپتى. توقسابا:

         — بالام، بۇل ءبىزدىڭ ەلدىڭ قويانىنىڭ ءمۇيىزى، – دەپتى.

         بالا: – «ەلى ازعاننىڭ جەرى ازعان» دەگەن وسى-اۋ، ءبىزدىڭ ەلدىڭ قويانىنىڭ مۇيىزىنەن شاڭىراق يەدى، ءسىزدىڭ ەلدىڭ قويانىنىڭ مۇيىزىنەن شاقشا عانا شىققانى ما؟ – دەپتى.

         توقسابا سوزدەن توسىلعانىن ءبىلىپ، ءجۇرىپ كەتىپتى دە ەلىنە كەلگەن سوڭ «كەز ەندى مىنا بالا الىپ قالدى»، –دەپتى.

         اققويلى ەلىنىڭ ەنى كەز ەكەن، سونى مىنا بالا ەندى ەلدى بيلەيدى دەگەن ءسوزى ەكەن. ايتقانىنداي ەرجەتكەن سوڭ اققويلى ەلىن سول بالا بيلەپتى.

---