تورعاي مەن ادام
ءبىر ساياتشى تور قۇرىپ، اڭ مەن قۇس ۇستاپ كۇن كورەدى ەكەن. ءبىر كۇنى قۇرىپ قويعان تورىنا بارماقتاي عانا تورعاي ءتۇسىپ قالىپتى. ساياتشى تورعايدى توردان بوساتىپ الادى دا ۋىسىنا قىسا ۇستاپ، ۇيىنە قايتادى. جولدا كەلە جاتقاندا، تورعاي ادامعا جالىنادى:
– مەن بارماقتاي عانا تورعايمىن، اۋزىڭ تولىپ اسايتىن ەتىم جوق. سويۋعا جارامايمىن، قابىرعام قىلتانداي، سيراعىم شيدەي. قاپاسقا قاماپ قويساڭ، قۇسادان ولەمىن عوي بوسقا. مەنىڭ اسپان استىندا شارىقتاي ۇشىپ ءجۇرۋىم كەرەك. قاناتىمدى سەرمەپ، ەركىمشە سامعاۋىم كەرەك. قويا بەرشى مەنى، جىبەرشى كەڭ دۇنيەگە. تورعايدىڭ ارمانى مەن تىلەگىن قىزىق كورگەن ادام:
– بوساتىپ جىبەرسەم نە بەرەسىڭ؟ – دەپتى ازىلدەي كۇلىپ. سوندا تورعاي ايتىپتى: «ءوزىم بىلەتىن ەكى وسيەتىم بار ەدى، سونى ۇيرەتەيىن»
– ال، ەندەشە، ۇيرەت سول وسيەتىڭدى، – دەپتى، ادام سەنەر-سەنبەسىن بىلمەي، تاڭ كورىپ. «جارايدى. ءبىر وسيەتىمدى قولىڭدا تۇرىپ-اق، ايتايىن. تاعى بىرەۋىن سەن بوساتقان سوڭ، جەرگە ءتۇسىپ تۇرىپ ايتايىن. ايتپەسە، سەن قوس قولداپ، ۋىسىڭدى قىسىپ ۇستاپ تۇرعاندا، وكپەم اۋزىما تىعىلىپ، جوندەپ سويلەي دە الاتىن ەمەسپىن»، – دەپتى، تورعاي قينالىپ. سونان سوڭ ادام تورعايدى ۋىسىنان بوساتىپ جىبەرىپتى. مەيلى، قينالما، ەركىن تۇرىپ-اق ايتا عوي، – دەپتى.
– ءبىرىنشى وسيەتىم، – دەپتى تورعاي ادامنىڭ ۋىسىنان بوسانعان سوڭ، بويىن جازىپ. – وتكەن ىسكە وكىنبە!
– ەكىنشى وسيەتىم – كوزىڭمەن كورمەگەنگە ەش ۋاقىتتا سەنبە!
وسيەتىڭنىڭ بار-جوعى وسى ما؟ ونى ءوزىم دە بىلەمىن، – دەپتى، ادام ونشا رازى بولماي. جوق، سەن ەشتەڭەنى دە تۇسىنبەدىڭ، – دەپتى تورعاي. بۇعان ادام تاڭ قالادى. قالايشا، نەنى تۇسىنبەدىڭ دەيسىڭ؟
– مەنىڭ بوتەگەمدە جۇدىرىقتاي گاۋھار جاتىر ەدى، – دەپتى، تورعاي كۇلىپ.
مۇنى ەستىگەندە ادام قارسى الدىنداعى شوپكە قونىپ وتىرعان تورعايدى ۇستاماق بولىپ، تۇرا ۇمتىلادى. تورعاي پىر ەتىپ ۇشىپ، ءار جەرگە ءبىر قونىپ، ۇستاتپاي قويادى. سونان سوڭ ادام ءوزىن الداعان تورعايعا نارازىلىعىن ءبىلدىرىپ:
– سەن مەنى الداپ سوقتىڭ، – دەپ، وكپە ايتىپتى.
سوندا تورعاي:
– جوق، مەن سەنى الداعان جوقپىن، سىنادىم، – دەپتى سەندىرىپ. – مەنىڭ جاڭاعى ايتقان وسيەتىمە سەن ءالى تۇسىنبەگەن ەكەنسىڭ. ءوزىڭ ويلاشى، مەنىڭ بۇكىل تۇرقىمنىڭ بار-جوعى بارماقتاي عانا، وعان جۇدىرىقتاي گاۋھار قالاي سىيادى؟ - دەپتى.
You Might Also Like
-
باياعى وتكەن زاماندا ءبىر حان ءومىر ءسۇرىپتى. ول جەر بەتىندەگى ادامداردى مەنسىنبەي، ولاردىڭ قالاۋ-تىلەۋىنە ونشا كوڭىل بولمەپتى. سودان كەيىن وعان شايتان ءۇيىر بولىپتى. ءسويتىپ، جاقىنداسا ءجۇرىپ، حان مەن شا...
-
ءتىرى جاسۋشا كۇردەلى - ديناميكالىق وزگەرىستەر ءوتىپ تۇراتىن جۇيە. وندا زات الماسۋى، جاڭارۋ، ءوسۋ، كوبەيۋ سياقتى وزگەرىستەر بولىپ تۇرادى. جاسۋشانىڭ ءومىر ءسۇرۋ قابىلەتىنە ونىڭ تىركەنىشتىگى، قوزعىشتىعى، ءوس...
