InfoHub Logo

ءبىر قويان وتە ايلاكەر ەكەن. بايقاۋسىزدا ءوزىن ۇستاپ العان قاسقىرعا دا، تۇلكىگە دە ايلامەن قۇتىلىپ كەتىپ جۇرەدى.

ءبىر كۇنى قالىڭ بۇتالى سايدى ارالاپ كەلە جاتادى دا اپانىنىڭ اۋزىندا القىنىپ، شارشاپ وتىرعان ايۋدى كورەدى. قالقيىپ قارسى الدىنا تۇرا قالادى دا ونى مازاقتاپ، اندەتە باستايدى

 

               – ءاي، قورباڭباي، قورباڭباي،

               كۇنىڭ قاراڭ بولعان با-اي؟

               كەزىپ قالىڭ اعاشتى،

               ءجۇرۋشى ەدىڭ ورداڭداي.

               ءالىڭ ءبىتىپ قالىپتى،

               ەندى ولەسىڭ، سورماڭداي!..

 

ونىڭ بۇل قىلىعىنا ىزا بولعان ايۋ تاپ بەرگەن كەزدە، قويان زىتا جونەلەدى. تۇبىر-تۇبىرتىكتەردەن ورعىپ، ۇستاتپاي كەتەدى. سول بەتىمەن بۇتا-بۇتانى ارالاپ، ءار جەردەن جۇرگەن قويانداردى جيناپ الادى.

– جۇرىڭدەر، مەن سەندەرگە ءبىر قىزىق كورسەتەيىن، – دەيدى. ونىڭ لەپىرگەنىنە قوياندار تاڭدانىسادى. سوندا دا اۋەستەنىپ:

– ول قانداي قىزىق؟ – دەپ سۇراسادى.

– ەرىڭدەر سوڭىمنان، بارعان سوڭ بىلەسىڭدەر.

– ءجۇر، ەندەشە، – دەپ، باسقا قوياندار سوڭىنان ىلەسەدى.

سىتىرلاعان سىبىردى ەستىگەن ايۋ قالىڭ بۇتانىڭ اراسىنا تىعىلا قالادى. الگى قويان ايۋدى اپانىندا جاتقان شىعار دەپ ويلاپ، تاقاپ بارادى دا:

– ءاي، قورباڭباي، تىڭدا، – دەيدى دە اندەتە ولەڭ ايتۋ ءۇشىن تاماعىن كەنەيدى. سول كەزدە تاسادا تۇرعان ايۋ شاپ بەرىپ، قوياننىڭ ەدىرەيگەن قۇلاعىنان ۇستاي الادى.

– ءا، بالەم، ءتۇستىڭ بە قولعا؟ – دەپ كىجىنەدى. مۇنداي وقيعانى كۇتپەگەن قوياننىڭ زارەسى ۇشادى.

باسقا قويانداردىڭ كۇلىپ تۇرعانىن بايقاعان سوڭ بارىپ، تەز ەسىن جينايدى دا:

– ايۋ اعا، جاڭاعى اعاتتىعىم ءۇشىن مەن وزىڭنەن كەشىرىم سۇراعالى كەلىپ ەم، – دەيدى، جالبارىنا ايلاعا باسىپ. – مىنا قويانداردى كۋا بولسىن دەپ، ادەيى ەرتىپ كەلىپ ەم.

مۇنى ەستىگەن سوڭ:

– ا، سولاي ما؟.. – دەپ، اڭقاۋ ايۋ قوياندى بوساتىپ قويا بەرەدى. ءسويتىپ، ايلاكەر قويان تاعى دا امالىن اسىرعان ەكەن.

---