InfoHub Logo

شۋ وزەنىنىڭ باس جاعىن مەكەندەيتىن ۇلى جۇزدەن شىققان ورتا شارۋاسى بار ءبىر ادام مۇقتاجسىز ءومىر ءسۇرىپتى. اقكوڭىل، قولى اشىق بولعاندىقتان اۋىلداستارى ونى «جومارت» اتاپ كەتىپتى. ءبىراق بالاسى بولماي، سوعان قاتتى رەنجيدى ەكەن. جاسى ەلۋگە اياق باسقان سوڭ مۇراگەرلەردەن دە ءۇمىت ءۇزىپ، قۇداي سالعاندى كورىپ، جاتا بەرەدى. جۇبايى دا قاراپايىم، جولداسىنىڭ ايتقانىن ەكى ەتپەي، ءتاتۋ-تاتتى ءومىر وتكىزەدى.

قويان جىلى كەلگەندە ۇلكەن جۇت بولىپ، ەلدەگى مال بىتكەننىڭ ءبارى قىرىلىپ، حالىق اشارشىلىققا، بوسقىنشىلىققا ۇشىرايدى. مۇنداي جاعداي جومارتقا دا جاقسىلىق اكەلمەيدى. كوكتەمگە سالىم ونىڭ دا قىسىپ ۇستاپ وتىرعان بىردى-ەكىلى تۇياعى ءشوبى بولماعاندىقتان وپات بولىپ كەتەدى. ول بالا ورنىنا جاس مالدى: بۇزاۋ، قوزى، بوتا، قۇلىنداردى باعىپ-قاعىپ كۇتەدى ەكەن. ەندى مال ورنىندا ونىڭ قىستاۋىندا ارنەمەنى شۇقىپ، قارقىلداعان ءتورت قارعا قالادى. قارعالار شالدىڭ جالعىز ەكەنىن سەزگەندەي، ءبىر ورىننان ەكىنشى ورىنعا سەكىرىپ ءجۇرىپ، ءبىر ۋاقىتتا ونسىز دا قايىر سۇراۋعا، بولماسا ولۋگە بەل بايلاعان جالعىز شالدىڭ قاسىنا كەلەدى. ءتىپتى، ولار دا جالعىزسىرادى ما، كىم ءبىلسىن، شالدىڭ ارتىنان ىلەسىپ قالماي قويادى. شال ءبىر نارسەسىن ۇمىتقان كىسىدەي ءسال ويلانىپ تۇرىپ، جۇگىرىپ ۇيىنە بارىپ، دومبىراسىن الىپ شىعادى. كوكتەم لەبىن اكەلگەن سامال جەلدىڭ ىزىڭىنا قوسىلىپ تۇرىپ دومبىرانىڭ شەگىنە قول سوعادى.

شال ەسكى ءبىر كۇيدى ويناپ كەتتى. دومبىرا حالىق باسىنا تۇسكەن اۋىر قايعىنى سەزگەندەي بوزداي جونەلەدى. كۇيدە كوڭىلسىز اۋەن تاقىرىبى ءوتىپ جاتىر، بىردە اتتىڭ جەلىسىن بەينەلەيتىن ساز دا ەستىلىپ قويادى. سونان كەيىن باسىن تومەن سالىپ، ءبىر كەز ءوزىن-وزى ۇمىتقانداي شال كۇيدى وتە ءبىر نازىك سەزىممەن شەرتە جونەلەدى. ۇزدىك-سوزدىق دىبىستارى بارعان سايىن باياۋلاپ، السىرەپ بارىپ كۇي اياقتالادى.

جان-جاعىنا بايقاپ قارايدى. توڭىرەكتە ەشكىم كورىنبەيدى. تەك جاڭاعى ءتورت قارعا عانا دوڭگەلەنگەن كوزدەرىمەن قاراپ قالىپتى. بارلىق جەردە ولگەن مال، جانداردىڭ قالدىقتارى كورىنەدى. جومارت دومبىراسىن قايتا قولعا الىپ قارعالاردىڭ قارقىلداعان ۇنىنە ەلىكتەتىپ ءبىر كۇي تارتتى. دومبىرا ءتورت قارعامەن قارعاشا سويلەسىپ كەتتى. «سەندەردەن باسقا مەنىڭ ەشكىمىم جوق، مەنى تاستاپ كەتپەي-اق قويىڭدار، ماعان ەشتەڭە قالماسا دا، سەندەر ءۇشىن جەتەتىن ازىق مول»، — دەيدى.

---