تۇرىسبەك كەلگەندە
1918 جىلى فيەۆرال ايىندا «اقمولا ۋەزىندە كەدەيلەر وكىمەتى قۇرىلدى» دەگەن حابار كەلدى. جۇمىسشىلاردىڭ قۋانىشى قوينىنا سىيمايدى. قوجايىنداردىڭ قۇتى قاشىپ، بەرەكەسى كەتە باستادى. بۇرىن 3 سوم عانا جالاقى الساق، ەندى 5 سوم، 6-7 سومعا دەيىن جالاقى الاتىن بولدىق.
اقمولادان جاڭا وكىمەت قۇرىلىسىمەن كوپ كەشىكپەي 1918 جىلدىڭ اپرەل ايىندا قاراعاندىعا دا وكىمەت ۋاكىلدەرى كەلە باستادى. 1918 جىلى اپرەلدىڭ اياق كەزىندە قاراعاندى مەن سپاسس زاۋىتىنا تۇرىسبەك مىڭبايەۆ كەلدى. تۇرىسبەك تۇسكەن ۇيگە جۇمىسشىلار جينالىسىپ قالدى. كەلگەندەر شاپۇر-شۇپىر امانداسىپ جاتىر. جۇرتتىڭ ءبارى جاڭا ورناعان وكىمەتتىڭ جايىن بىلگىسى كەلەدى. الدەن ۋاقىتتا سىرتتان ءىلياس اقىن كىرىپ كەلدى دە مىناداي دەگەن ولەڭمەن:
— ءجۇرسىڭ بە، تۇرىسبەكجان، ەسەن-امان،
ەستىدىم كەلگەنىڭدى اقمولادان.
«كەدەيدىڭ وكىمەتى ورنادى» دەپ،
الىپ ەك ءبىر حاباردى ءبىز قالادان.
«جاقسى ءسوز، جارىم ىرىس» دەۋشى ەدى عوي،
كانەكي، سويلەشى ەندى بىزگە سودان، —
دەپ جۇرتشىلىقتىڭ نازارىن بىردەن تۇرىسبەككە اۋدارىپ قول الىسىپ امانداستى. «تۇرىسبەك نە ايتار ەكەن» دەپ جۇرت شىلىقتىڭ قۇلاق تۇرۋدە. سۇيتسەك، كەدەيلەر وكىمەتىنىڭ ورناعانى راس ەكەن. سول بەتىندە تۇرىسبەك وسپەنگە بارىپ قايتتى. سودان باستاپ-اق قوجايىنداردان ەرىك كەتىپ، ەسىنەن تانا باستادى عوي.
قاراعاندى ءوندىرىسى توقتالعاننان كەيىن مەن اۋىل اراسىندا بولدىم. ول كەزدە قوسشى ۇيىمى دەگەن بولدى. سونىڭ مۇشەسى بولىپ سايلاندىم. ەڭ العاش كولحوزداستىرۋ باستالعاندا نۇرا وزەنىنىڭ ەسەن دەيتىن قۇيىلىسىنان «اشىق» كولحوزىن ۇيىمداستىرۋعا قاتىستىم. سودان كۇنى بۇگىنگە دەيىن كولحوزشىمىن.
You Might Also Like
-
— ءبىزدىڭ اتامىز ەلكەلدىگە تۇسىندە بەيتانىس ءبىر ادام «ولەڭ الاسىڭ با، كوگەن الاسىڭ با» دەگەندە، «ولەڭ الامىن» دەگەن ەكەن.
-
1921 جىلى ءوندىرىس توقتالدى. ءبىراق ءوندىرىس كوميتەتىنىڭ قاۋلىسى بويىنشا ۋسپەن، سپاسس، قاراعاندى جۇمىسشىلارى 1924 جىلدىڭ ماي ايىنا دەيىن وكىمەتتەن جالاقى الىپ وتىردى...
