InfoHub Logo

تۇركيانىڭ تانىمال كۋرورتتارىنا باراتىن دەمالۋشىلار ەندى جاعاجايدا تەمەكى شەگۋ ەرەجەلەرىن ەسكەرۋى كەرەك. انتاليا قالاسىندا 5 ماۋسىمنان باستاپ جاعاجايلاردا تەمەكى شەگۋگە تولىق تىيىم سالىندى. بۇل تۋرالى Infohub.kz اقپارات اگەنتتىگى حابارلايدى.

تىيىم سالىنعان ايماقتار

جاڭا ەرەجەلەر العاشقىدا لارا، بەلەك، چاميۋۆا جانە بيچ پارك سياقتى ءتورت تانىمال جاعاجايعا قاتىستى بولادى. بۇل ايماقتار قازىرگى تاڭدا تۇركيانىڭ مادەنيەت جانە تۋريزم مينيسترلىگىنىڭ باسقارۋىنداعى جاعاجايلار بولىپ سانالادى. الايدا، بيلىك "ءتۇتىنسىز ايماقتاردى" بولاشاقتا كەڭەيتۋدى جوسپارلاپ وتىر.

شەكتەۋلەردىڭ سەبەبى

بۇل شەشىم اقدەنيز ۋنيۆەرسيتەتىنىڭ زەرتتەۋلەرىنەن كەيىن قابىلداندى. زەرتتەۋ ناتيجەسىندە تەڭىز تۇبىنەن تەمەكىنىڭ قالدىقتارىنىڭ تىم كوپ مولشەردە تابىلعانى انىقتالدى. جوبا ۇيلەستىرۋشىسى ەبرۋ شاحيننىڭ ايتۋىنشا، تەمەكى قالدىقتارى تەڭىز ەكوجۇيەسىنە زيان كەلتىرەدى.

"تەڭىز تۇبىندەگى سۋرەتتەردە باستاپقىدا تەڭىز ورگانيزمدەرى نەمەسە گۋبكالار دەپ ويلاعان زاتتار تابىلعان، ءبىراق ولار تەمەكىنىڭ قالدىقتارى بولىپ شىقتى"، - دەدى شاحين.

بۇل شارا تەڭىز فلوراسى مەن فاۋناسىن قورعاۋعا باعىتتالعان. سونداي-اق، جاعاجايلاردى بالالارمەن دەمالاتىندار ءۇشىن تازا ءارى جايلى ەتۋ كوزدەلگەن.

بولاشاق جوسپارلار

بۇل جاڭالىق انتاليانىڭ ەكولوگيالىق ستراتەگياسىنىڭ ءبىر بولىگى بولىپ تابىلادى. قالادا تەگىن اۋىز سۋ ستانسيالارى ورناتىلىپ، قايتا وڭدەۋگە ارنالعان كونتەينەرلەردىڭ جەلىسى كەڭەيتىلۋدە. بۇل شارالار ءبىر رەتتىك پلاستيكتى قولدانۋدى ازايتۋعا كومەكتەسەدى.

تۇركيانىڭ دەنساۋلىق ساقتاۋ مينيسترلىگى دە بۇل باستامانى قولدايدى. ەلدە تەمەكى شەگۋگە تىيىم سالىنعان قوعامدىق ورىنداردى كەڭەيتۋ تۋرالى زاڭ جوباسى ازىرلەنۋدە. تۇرىك باق-تارىنىڭ حابارلاۋىنشا، بۇل قۇجات سوڭعى كەلىسۋ ساتىسىندا.

تۇركيانىڭ امبيسيالىق ماقساتى – 2040 جىلعا دەيىن ەل اۋماعىندا تەمەكى ونىمدەرىن ساتۋدى تولىعىمەن توقتاتۋ.