InfoHub Logo

نەگىزگى ۇبت باستالعاننان بەرى 220 مىڭ رەت تەست تاپسىرىلدى. ونىڭ ىشىندە تۇلەكتەردىڭ 75،8% – قازاق تىلىندە، 24% - ورىس تىلىندە، 0،1% - اعىلشىن تىلىندە تەستىلەۋدەن ءوتتى.

ۇبت باستالعالى شەكتى بالدى 68% جۋىق تالاپكەر جينادى، وتكەن اپتامەن سالىستىرعاندا 1%-عا ارتتى. ورتاشا بالعا كەلەتىن بولساق، ول - 66 بالل.

«تەستىلەۋدىڭ التىنشى اپتاسى اياقتالدى، بارلىعى شتاتتى رەجيمدە ءوتىپ جاتىر. جالپى نەگىزگى ۇلتتىق ءبىرىڭعاي تەستىلەۋگە قاتىسۋعا 290 مىڭعا جۋىق ءوتىنىش كەلىپ ءتۇستى، ونىڭ ىشىندە 160 مىڭ ءوتىنىش - ءبىرىنشى مۇمكىندىككە، 130 مىڭ ءوتىنىش - ەكىنشى مۇمكىندىككە بەرىلگەن. قازىرگى تاڭدا 220 مىڭ رەت تەست تاپسىرىلدى، ياعني تالاپكەرلەر ەكىنشى مۇمكىندىگىن تاپسىرىپ جاتىر. ۇبت 5 شىلدەدە اياقتالادى»، – دەپ اتاپ ءوتتى ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ.

تالاپكەرلەردىڭ، سونىڭ ىشىندە ەرەكشە ءبىلىم بەرۋ قاجەتتىلىكتەرى بار تالاپكەرلەردىڭ تەستىلەۋدى ىڭعايلى تاپسىرۋى ءۇشىن ۇبت تاپسىرۋ ۋاقىتى 40 مينۋتقا ۇزارتىلدى.

سونىمەن قاتار، ولار ءۇشىن سىزبا جانە دياگراممالارسىز سۇراقتار جاسالدى. قابىلدانعان شارالار ارقاسىندا ەرەكشە ءبىلىم بەرۋ قاجەتتىلىكتەرى بار تەستىلەنۋشىلەر سانى ارتىپ كەلەدى.

بيىل تالاپكەرلەرگە ىڭعايلى بولۋ ءۇشىن العاش رەت ۇبت-نىڭ كۇنىن، ۋاقىتىن، ورنى مەن بەيىندىك پاندەرىن ەسكە سالاتىن SMS جولدانادى.

حابارلاما ۇبت-عا قاتىسۋشىلاردىڭ وزدەرىنە، سونداي-اق كامەلەتتىك جاسقا تولماعان تەستىلەنۋشىلەردىڭ اتا-انالارىنا نەمەسە زاڭدى وكىلدەرىنە جىبەرىلەدى.

اكادەميالىق ادالدىقتى ساقتاۋ ماقساتىندا تالاپكەرلەردىڭ تەست نۇسقاسى تاڭبالاندى. ياعني ۇبت-نىڭ ءاربىر قاتىسۋشىسىنىڭ جەكە تەست نۇسقاسى بولادى. ەرەجە بۇزعان جانە تەست تاپسىرمالارىن اۋديتوريادان شىعارۋعا تالپىنعان جاعدايدا ۇلتتىق تەستىلەۋ ورتالىعى ەرەجە بۇزۋشىلاردى انىقتاپ، ولاردىڭ ناتيجەلەرىن جويادى.

بۇگىنگى تاڭدا 267 تالاپكەر سمارتفون، شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى.

تەستىلەۋ كەزىندە ەرەجە بۇزعانى ءۇشىن اۋديتوريادان 262 ادام شىعارىلىپ، ولاردىڭ ناتيجەسى جويىلدى.

ەستەرىڭىزگە سالا كەتەيىك، ۇبت-عا كىرگىزۋ ءۇش دەڭگەيلى جۇيە بويىنشا جۇزەگە اسىرىلادى: Face ID جەكە باسىن سايكەستەندىرۋ ارقىلى، جەكە كۋالىك بويىنشا، سونداي-اق وتىرعىزۋ ورنىندا جەكە باسىن سايكەستەندىرۋ جۇرگىزىلەدى.

بيىل تەستىلەۋ «1 كومپيۋتەر – 2 كامەرا – 1 تەستىلەنۋشى» قاعيداتى بويىنشا وتەدى.

ەگەر بۇعان دەيىن تەستىلەۋ پروسەسىن ءار كومپيۋتەردىڭ جوعارعى جاعىنان باقىلاپ وتىراتىن ءبىر كامەرا عانا بولسا، ەندى تەستىلەنۋشىنىڭ جەكە باسىن سايكەستەندىرۋگە جانە بوگدە ادامداردىڭ كىرۋىنە جول بەرمەۋگە مۇمكىندىك بەرەتىن ەكىنشى (فرونتالدى) كامەرا ورناتىلعان.

ايتا كەتەيىك، تالاپكەرلەر تەستىلەۋ اياقتالعاننان كەيىن 30 مينۋت ىشىندە اپەللياسياعا بەرە الادى. سەرتيفيكات اپەللياسيا تۋرالى شەشىم قابىلدانعاننان كەيىن تەستىلەنۋشىنىڭ جەكە كابينەتىندە قولجەتىمدى بولادى.

---