InfoHub Logo

بۇدان بىلاي ۇلتتىق ءبىرىڭعاي تەستىلەۋ (ۇبت) تاپسىرۋشىلارعا قورىتىندى بالمەن بىرگە تاقىرىپتىق تالداۋ قورىتىندىسى بەرىلەدى. بۇل تۋرالى ق ر ءبىلىم جانە عىلىم ءمينيسترى اسحات ايماعامبەتوۆ Facebook-تەگى پاراقشاسىندا جازدى.

«ەندى ۇبت قورىتىندىسى بويىنشا ءار مەكتەپ، وبلىس، ءتىپتى ءپان بويىنشا تالداۋ جاساپ، ونى مەكتەپتەردىڭ جۇمىسىن باعالاۋ ءۇشىن پايدالانۋعا شەشىم شىعاردىق.

ەلەكتروندى فورماتقا كوشۋ ەندى تەستىلەۋگە تاقىرىپتىق تالداۋ جاساۋعا مۇمكىندىك بەرەدى. مۇنداي جاڭالىقتى ءبىز ناۋرىز ايىنداعى ۇبت كەزىندە پيلوتتىق رەجيمدە ەنگىزدىك»، - دەپ جازدى مينيستر.

ايتۋىنشا، ەندى تۇلەك تەستىلەۋدى اياقتاعاننان كەيىن جيناعان ۇپايلارىنىڭ ناتيجەسىن عانا ەمەس، سونىمەن قاتار قانداي تاقىرىپتاردى بىلەتىنى جانە قايسىسىنا كوڭىل ءبولۋ قاجەت ەكەنى تۋرالى قوسىمشا تالداۋ الادى.

«ءدال وسىنداي تالداۋدى مەكتەپكە دە، ناقتى پانگە قاتىستى دا، اۋدان، وبلىس جانە جالپى رەسپۋبليكا كولەمىندە دە جاسايمىز. بۇل نە بەرەدى؟ بۇل شەشىم تەستىلەۋشىلەرگە قانداي تاقىرىپتارعا نازار اۋدارۋ، قانداي تاقىرىپتاردى كۇشەيتۋ كەرەگىن كورۋگە مۇمكىندىك بەرەدى. ياعني سىناققا قاتىسۋشىلار ءقازىردىڭ وزىندە وزدەرىنىڭ ءالسىز تۇستارىن انىقتاپ، جەكە تاقىرىپتارعا كوبىرەك ۋاقىت ءبولىپ، قاتەلەرمەن جۇمىس ىستەي الادى»، - دەيدى ۆەدومستۆو باسشىسى.

اسحات ايماعامبەتوۆ بۇل ءتاسىل مۇعالىمدەرگە وقۋشىلاردىڭ قانداي تاقىرىپتاردا قينالعانىن كورۋىنە مۇمكىندىك بەرەتىنىن ايتادى.

«مەكتەپتى الاتىن بولساق، مىسالى، ماتەماتيكا ءپانى ءمۇعالىمىنىڭ وقۋشىلارىنىڭ ءبىر بولىگى كەيبىر ەسەپتەردى ناشار شىعاراتىنىن بايقاۋعا بولادى. تالداۋ سەبەپتەردى انىقتاۋعا سەپتىگىن تيگىزەدى. دالىرەك ايتقاندا، ءمۇعالىمنىڭ ءوزى تۇسىندىرۋدە قينالاتىنى نە باعدارلامادا ۋاقىت جەتكىلىكسىزدىگى، وقۋلىقتاعى سۇراقتار ماسەلەسى جانە تاعى باسقاسى.

تيىسىنشە، تالداۋعا بايلانىستى وقۋ باعدارلامالارىن پىسىقتاۋ، مۇعالىمدەردىڭ ماقساتتى تۇردە بىلىكتىلىگىن ارتتىرۋ، بىلىكتىلىكتى ارتتىرۋ باعدارلامالارىن وزگەرتۋ جانە ت.ب. بويىنشا شەشىمدەر قابىلداي الامىز. جازعى ۇبت قورىتىندىسى بويىنشا ءاربىر مەكتەپ، وبلىس، ءمۇعالىم جانە تۇلەك وسىنداي تالداۋ الادى»، - دەپ جازادى مينيستر.

سونداي-اق، ول بىرنەشە جىل بۇرىن ۇبت قورىتىندىسى بويىنشا مەكتەپتەر رەيتينگىن وتكىزۋگە تىيىم سالىنعان ەسكە سالدى. ال بۇل جولعى باعالاۋ مەكتەپتەردىڭ، مۇعالىمدەردىڭ، ءبىلىم باسقارمالارىنىڭ وقىتۋ پروسەسىندە كەتكەن قاتەلىكتەرمەن جۇمىس ىستەۋىنە جول اشپاق.

«ءقازىر قابىلدانعان شەشىم ءوز ءرولىن اتقارعانىن، پەداگوگتەر مەن مەكتەپتەرگە تۇسەتىن جۇكتەمەنى ازايتقانىن كورىپ وتىرمىز. ياعني وقۋشىلار ۇبت-عا ەلەكتروندى فورماتتا ءوز بەتىنشە ءوتىنىش بەردى جانە ولاردى ۇبت-دان شەتتەتۋ، سونداي-اق تەك تەست ارقىلى عانا دايىنداۋ جانە اكىمدىكتەردىڭ وبلىس رەيتينگىنە ىقپال ەتۋ ارەكەتتەرى توقتاتىلدى»، - دەپ جازدى اسحات ايماعابەتوۆ.

---