InfoHub Logo

بيىلدىڭ 26 مامىرى مەن 17 ماۋسىمى ارالىعىندا «جازعى مەكتەپ» جۇمىس ىستەيدى. بۇل تۋرالى ق ر ءبىلىم جانە عىلىم مينيسترلىگىنىڭ مەكتەپكە دەيىنگى جانە ورتا ءبىلىم كوميتەتىنىڭ ءتوراعاسى گۇلميرا كارىموۆا ايتتى.

ونىڭ ايتۋىنشا، پاندەميا، شەكتەۋ شارالارى كەزىندە ورىن العان بىلىمدەگى ولقىلىقتاردىڭ ورنىن تولتىرۋ جانە ءبىلىم ساپاسىن ارتتىرۋ ماقساتىندا 2022 جىلدىڭ 26 ​​مامىرى مەن 17 ماۋسىمى ارالىعىندا «جازعى مەكتەپ» جۇمىس ىستەيدى.

جازعى مەكتەپتىڭ ماقساتى – بەلسەندى تۇردە وقۋشىلاردىڭ ءبىلىمىن تەرەڭدەتۋ. جازعى مەكتەپتە ءبىلىمدى تولىقتىرۋ بويىنشا وقۋ پروسەسى مەكتەپتىڭ بەكىتىلگەن جۇمىس وقۋ جوسپارىنا سايكەس جۇزەگە اسىرىلادى. جازعى مەكتەپكە 1-8 جانە 10 سىنىپ وقۋشىلارى قاتىسادى. جازعى مەكتەپتە ءبىلىم الۋ تەگىن.

ءبىلىم بەرۋ ۇيىمى ساباقتاردىڭ يكەمدى كەستەسىن جاسايدى. ءبىلىم بەرۋ ۇيىمىنىڭ باسشىسى جازعى مەكتەپتىڭ جۇمىس ىستەۋى تۋرالى بۇيرىق شىعارادى. ءبىلىم بەرۋ ۇيىمى قول جەتكىزىلمەگەن وقۋ ماقساتتارىن ەسكەرە وتىرىپ، جازعى مەكتەپتىڭ جۇمىس جوسپارىن جاسايدى جانە وقۋ پروسەسىنىڭ ۇيىمداستىرىلۋىن جانە وقۋشىلاردىڭ وقۋ جەتىستىكتەرىن باقىلايدى.

جازعى مەكتەپ باعدارلاماسىنا الشاقتىقتى جويۋ پاندەرى بويىنشا وقۋ ساباقتارىنان باسقا، جوبالىق جانە عىلىمي-زەرتتەۋ جۇمىستارى، زەرتحانالىق جۇمىستار، سىنىپتان تىس جۇمىستاردىڭ كەڭ اۋقىمى، دارىستەر، سەمينارلار، شىعارماشىلىق ستۋديالار، سپورتتىق-شىعارماشىلىق ءىس-شارالار مەن ەكسكۋرسيالار، اشىق اۋادا ءىس-شارالار كىرەدى.

تاراتىلعان مالىمەتكە قاراعاندا، جازعى مەكتەپ جۇمىسىن ۇيىمداستىرۋ كەزىندە مۇعالىمدەر بيىلعى وقۋ جىلىنا بەكىتىلگەن جۇكتەمەسى اياسىندا 17 ماۋسىمعا دەيىن جۇمىس ىستەيدى، سودان كەيىن مۇعالىمدەرگە 56 كۇندىك دەمالىس بەرىلەدى.

---