InfoHub Logo

2024 جىلدىڭ 1 اقپانىنان 2025 جىلدىڭ 1 شىلدەسىنە دەيىن «ۇلتتىق قور – بالالارعا» باعدارلاماسى اياسىندا تۇرعىن ءۇي مەن ءبىلىم قاجەتتىلىكتەرىنە جالپى 14،86 ميلليون اقش دوللارى اۋدارىلعان. بۇل سوما 117 495 ءوتىنىش بويىنشا ءبولىندى.

قارجىنىڭ نەگىزگى بولىگى — 9،20 ميلليون دوللار — تۇرعىن ءۇي جاعدايىن جاقسارتۋعا جۇمسالعان. بۇل باعىتتا 71 488 ءوتىنىش قاناعاتتاندىرىلىپ، كەلەسىدەي سالالار بويىنشا ءبولىندى:

• تۇرعىن ءۇي قۇرىلىس جيناق سالىمىن تولىقتىرۋ – 69 756 ءوتىنىش، 9،00 ملن دوللار؛
• يپوتەكالىق قارىز بويىنشا العاشقى جارنا ەنگىزۋ – 551 ءوتىنىش، 66،52 مىڭ دوللار؛
• تۇرعىن ءۇيدى ازاماتتىق-قۇقىقتىق مامىلە ارقىلى ساتىپ الۋ – 436 ءوتىنىش، 49،84 مىڭ دوللار.

ال ءبىلىم بەرۋ ماقساتىندا 46 007 وتىنىشكە سايكەس 5،66 ميلليون دوللار ءبولىندى. ونىڭ ىشىندە:

• قازاقستانداعى وقۋ ورىندارىنا تولەم – 40 517 ءوتىنىش، 5،04 ملن دوللار؛
• ءبىلىم بەرۋ جيناق سالىمىن تولىقتىرۋ – 4 040 ءوتىنىش، 454،21 مىڭ دوللار؛
• شەتەلدىك وقۋ ورىندارىنا تولەم – 1 166 ءوتىنىش، 131،38 مىڭ دوللار.

قور مالىمەتىنشە، ازاماتتار نىسانالى جيناقتاردىڭ بارلىعىن بىردەن ەمەس، قاجەتىنە قاراي ءىشىنارا پايدالانا الادى. قولدانىلماعان قالدىق نىسانالى جيناق شوتىندا (نجش) ساقتالادى.

كامەلەت جاسىنا تولعاندار بجزق سايتى نەمەسە eGov ارقىلى جەكە كابينەتىمەن ءوز جيناقتارىن باقىلاي الادى. قاراجاتتى پايدالانۋ ءۇشىن ۋاكىلەتتى وپەراتورعا اقش دوللارىندا شوت اشىپ، ءوتىنىش بەرۋ قاجەت.