InfoHub Logo

اقىن بالعىنبەك يماشيەۆ ۇلى دانيار يماشيەۆتىڭ اتىنا بايلانىستى تۋعان داۋعا قاتىستى العاش رەت پىكىر ءبىلدىردى. ايتۋىنشا، قاجىلىق ساپارىنا بارماق بولىپ الدانىپ قالعان ازاماتتاردىڭ قاراجاتى قايتارىلىپ جاتىر، دەپ حابارلادى Nege.kz.

الماتىدا بەلگىلى ايتىسكەردىڭ ۇلىنا قاتىستى "الاياقتىق" بابى بويىنشا تەرگەۋ باستالعانى بۇعان دەيىن بەلگىلى بولعان ەدى. دانيار يماشيەۆ بيىل قاڭتاردان باستاپ اتقارۋشى ديرەكتور رەتىندە قىزمەت اتقارعان كومپانيانىڭ جۇمىسىنا بايلانىستى 50-گە جۋىق ادام شاعىم تۇسىرگەن. ولار قاسيەتتى ساپارعا بارۋ ءۇشىن قاراجات تولەپ، اقىرى دىتتەگەن جەرگە جەتە الماي قالعان.

بالعىنبەك يماشيەۆ بۇل جاعدايدىڭ ءمان-جايىن ءوزى ءتۇسىندىرىپ بەردى:

> "ۇلىم – بۇل كومپانياعا جالدامالى قىزمەتكەر رەتىندە قاڭتار ايىندا عانا كەلگەن. ياعني، بار بولعانى ءۇش ايدان بەرى سول ورىندا جۇمىس ىستەپ كەلەدى. ول قارجىلىق ماسەلەلەرگە جاۋاپتى ەمەس. الايدا قوعامدا «بالعىنبەكتىڭ بالاسى» دەگەن جەلەۋمەن دۇرلىگۋ باستالىپ كەتتى. ءيا، تاجىريبەسىزدىگى بار شىعار، قاتەلىك تە كەتكەن بولار. ءبىراق بۇل – ونى قاساقانا الاياق قىلدى دەگەن ءسوز ەمەس. ۇلىمدى عانا ەمەس، مەنى دە ءتۇرلى ايىپتاۋلارمەن قارالاپ جاتقاندار بار"، — دەدى ول اشىنا.

اقىننىڭ ايتۋىنشا، شاعىمدانۋشىلار الدىمەن الەۋمەتتىك جەلى ارقىلى ماسەلەنى كوتەرىپ، تەك سودان كەيىن قۇقىق قورعاۋ ورگاندارىنا جۇگىنگەن. ال قازىرگى تاڭدا كومپانيا قاجىلىققا بارا الماعان ازاماتتاردىڭ قاراجاتىن قايتارۋ جۇمىستارىن قولعا العان.