ۇرى ەكىنشى ۇرلىق قىلماۋعا تاۋبە قىلىپتى
ءبىر باۋكەسپە ۇرى بار ەكەن، سەرىكبايدىڭ جالعىز قارا شولاق سيىرى دا وسى ۇرىنىڭ كەڭىردەگىنە ءتۇسىپ كەتىپتى.
سيىرىنىڭ ىزىنە ءتۇسىپ بارسا، «سيىرىڭدى كورگەنىم جوق» دەپ بەت باقتىرماي قويىپتى. ءوزىنىڭ بوي بەرمەسىن بىلگەن سوڭ سەرىكباي امالىن تاۋىپ ەسە قايتاراتىن وراي كۇتىپتى. ۇرى ۇرلىققا كەتتى دەگەن حاباردى ەستىپ، ەندى قايتادى-اۋ دەگەن كەزدە، جول بويىنداعى زيراتقا كەلىپ جاتىپ ۇرىنى توسىپتى. ۇزاق جۇرىستەن قالجىراپ ات ۇستىندە قالعىپ كەلە جاتقان ۇرى وسى جەردەن وتە بەرگەندە، بايقاتباي جەتەك اتقا ءمىنىپ الىپ باسىن تارتىپ تۇرا قالىپتى.
ىركە تارتقان اتقا جالت قاراعان ۇرى ۇستىندەگى اپپاق كەبىن كيگەن «ءارۋاقتى» كورىپتى. ساسقان ۇرى جەتەك اتتى تاستاي سالىپ، اتىنا ۇستى-ۇستىنە قامشى باسىپ جوعالىپتى. سەرىكباي اتتى يەسىنە تابىس ەتىپ قايتا بەرىپتى. شوشىنعان ۇرى ۇيىنە بارا اۋىرىپ جاتىپ قالىپتى. ول كەزدە سەرىكباي ەل ىشىندەگى اتاقتى ەمكۇستەردىڭ ءبىرى ەكەن. ساۋىعا الماعان ۇرى كىسى جىبەرىپ سەرىكبايدى شاقىرتادى. «ءىشى مەرەزدىڭ ىشىندە يت ۇلىپ جاتادى» دەگەندەي اۋرۋى وزىنە ءمالىم ەكەنىن بىلەتىن سەرىكباي ونىڭ تامىرىن ۇستاپ كورىپ:
— جۇرەگىڭ قوزعالعان ەكەن، اۋرۋىڭ ەداۋىر سالماقتى، نە نارسەدەن شوشىدىڭ، شىنىڭدى ايت، سوعان قاراي وتىرىپ ەم جاسايمىن، الدەقالاي بولار ەكەنسىڭ، — دەپ شوشىتا تۇسەدى.
بۇلتارار امالى قالماعان ۇرى كورگەن-بىلگەنىن ايتىپ بەرەدى. سەرىكباي سوندا:
— باسە، قاتتى ۇشىنعان ەكەنسىڭ، مەن ەمدەپ كورەيىن، جازىلىپ قالارسىڭ. ول كورىنگەن جان الاتىن پەرىشتە، قۇداي جولىمەن جۇرمەگەن، باسقالاردىڭ قاقىسىن جەگەن، كۇناعا باتقان ادامداردىڭ جانىن الۋعا كەلگەن. تاۋبە قىلىپ، ادال كاسىپپەن شۇعىلدانساڭ، جازىلىپ كەتەسىڭ، — دەپتى. جانىنان قورىققان ۇرى ەكىنشى ۇرلىق قىلماۋعا تاۋبە قىلىپتى.
You Might Also Like
-
ءبىر باي جوعالعان اتىن مالشىسىنان كورىپ، كوكالا قويداي قىپ ساباپ، جالعىز كوك شولاعىن تارتىپ الىپتى دا، ءوزىن قۋىپ سالىپتى.
-
جازعىتۇرىم جولاۋشىلاپ، شولدەپ كەلە جاتقان سەرىكباي سىرتتاي سىرىن بىلەتىن ءبىر ۇيگە كەلىپ تۇسەدى. ۇيگە سالەم بەرىپ كىرسە، جالعىز كەمپىر وتىرادى. «ءساتى بولدى» دەپ ويلاعان ول كەمپىرگە قول ب...
