ۇستاز مارتەبەسى – ۇلت مەرەيى
بۇعان دەيىن ق ر تۇڭعىش پرەزيدەنتى – ەلباسى ن.ءا.نازاربايەۆتىڭ باستاماسى بويىنشا «پەداگوگ مارتەبەسى تۋرالى» زاڭ جوباسى ازىرلەنگەنى بەلگىلى. ءوتكەن 2019 جىلدىڭ 27 جەلتوقسان كۇنى تاۋەلسىز ەلىمىزدىڭ 28 جىلدىق تاريحىندا مەملەكەت باسشىسى قاسىم-جومارت توقايەۆتىڭ جارلىعىمەن تۇڭعىش رەت ءمۇعالىم مارتەبەسى تۋرالى زاڭنىڭ قابىلدانۋى ۇستازدار قاۋىمىن ءبىر سەرپىلتىپ تاستادى. ەلىمىزدە جارتى ميلليوننان اسا ۇستاز بار بولعاندىقتان، اتالعان زاڭ جوباسى وتە قىزۋ تالقىلانىپ، ءتۇرلى ۇسىنىستاردىڭ ناتيجەسىندە كەم-كەتىگى دە تولىقتىرىلدى.
الاش ارداقتىسى ماعجان جۇمابايەۆ: «التى الاشتىڭ باسى قوسىلسا، توردەگى ورىن مۇعالىمدىكى» دەپ اسا قۇرمەت تۇتقان مۇراتى بيىك ءمۇعالىم مارتەبەسىنىڭ زاڭمەن بەكىتىلگەنى ەلىمىزدى، اسىرەسە، ۇستازدار قاۋىمىن ايرىقشا قۋانتتى.
اتالمىش زاڭ جوباسى اياسىندا الماتى قالاسى ناۋرىزباي اۋدانى «№187 جالپى ءبىلىم بەرەتىن مەكتەپ» كوممۋنالدىق مەملەكەتتىك مەكەمەمىزدە وسىعان وراي ارنايى دوڭگەلەك ۇستەل وتكىزدىك. تانىسۋ، تالداۋ جۇمىستارىن جۇرگىزىپ، 6 ءبولىم، 21 باپتان تۇراتىن قۇجاتتى مەملەكەتىمىزدىڭ ۇستازدار قاۋىمىن قادىرلەگەن ايرىقشا قامقورلىعى دەپ قابىلدادىق. جيىن بارىسىندا «پەداگوگ مارتەبەسى تۋرالى» زاڭعا ارنايى باپتار ەنگىزىلگەنى، ياعني، «جالپى ەرەجەلەردەن» باستاپ، «پەداگوگتىڭ مارتەبەسى جانە ونىڭ پەداگوگيكالىق قىزمەتى»، «پەداگوگيكالىق قۇقىقتارى»، «پەداگوگتىڭ مىندەتتەرى مەن جاۋاپكەرشىلىگى» سياقتى نەگىزگى بولىمدەر پەداگوگتىڭ باستى قۇجاتى ەكەندىگى باسا ايتىلدى.
ۇلى ۇستاز ى.التىنسارين: «بىزگە جاقسى ءمۇعالىم بارىنەن قىمبات، ويتكەنى، ءمۇعالىم – مەكتەپتىڭ جۇرەگى» دەگەنىندەي، مۇعالىمدەردىڭ الەۋمەتتىك جاعدايلارى تۋرالى دا زاڭدا تايعا تاڭبا باسقانداي انىق كورسەتىلگەندىگى، ءمۇعالىمنىڭ مارتەبەسىن كوتەرۋدى ولاردىڭ ايلىق جالاقىلارىن وسىرۋدەن باستاعاندىعى ۇستازدار مەرەيىن ءوسىرىپ، نۇر ۇستىنە نۇرلاندىردى. ۇجىمنىڭ ايرىقشا قاناتتانىپ، ەڭبەككە دەگەن قۇلشىنىستارىنىڭ ارتقاندىعى بايقالدى. ەندى ۇستازدىق قىزمەت قىلار وقۋ بىتىرگەن وزىق جاستاردىڭ دا ءبىلىم ورداسىنا قادام باسۋى اسىرەسە، ەر ازاماتتاردىڭ كەلۋى مەكتەپكە ءتارتىپ ورناتىپ، ۇلداردىڭ ەر ادام تاربيەسىن كورىپ وسەتىندىگى كوڭىل قۋانتادى.
ءمۇعالىم مارتەبەسى كوتەرىلۋى ءۇشىن زاڭنىڭ جاي قۇقىقتىق قۇجات، ياعني دەكلاراسيا كۇيىندە قالماي، ەڭ الدىمەن – فۋنكسيانالدى تۇردە تولىق ورىندالىپ، ناقتى ىسكە اسىپ جاتقاندىعىن كوزىمىز كورىپ، كوڭىلىمىزگە قۋانىش ۇيالادى. قابىلدانعان جاڭا زاڭ ەلىمىزدىڭ بارشا ۇستازدارىنا ۇلكەن سەنىممەن قاتار زور جاۋاپكەرشىلىكتى دە جۇكتەدى. وسى ۇدەدەن شىعىپ، مارتەبە بيىگىنەن كورىنۋ – ءاربىر ۇستازىمىزدىڭ مىندەتى. تاپسىرىلىپ وتىرعان تاۋداي سەنىم – ءبىز ءۇشىن ۇلكەن مارتەبە!
ۇستازداردىڭ قۇقىقتارىن كەڭەيتۋ جانە وزىنە ءتان ەمەس جۇمىستان بوساتۋ، جۇكتەمەسىن ازايتۋى مۇعالىمدەرگە وقۋشىلاردىڭ تانىم-تاربيەسىنە، ءبىلىم ساپاسىنا اسا ءمان بەرۋىنە جاعداي جاسالعانىنا ەرەكشە ءمان بەرىلدى. ەڭ باستىسى، ءمۇعالىم مارتەبەسىنىڭ زاڭمەن بەكىتىلگەندىگىن مەكتەپ ۇجىمى زور قۋانىشپەن قابىلدادى.
«ءبىر ءارىپ ۇيرەتكەنگە قىرىق جىل سالەم بەر» دەگەن قازاقتىڭ ءسوزى ۇستازعا دەگەن ۇلى سىيلاستىق، قۇرمەت تۇتقان قاعيدا ەكەنى انىق. قوعامداعى ەڭ جوعارعى مارتەبە ۇستاز قاۋىمىنا تيەسىلى ەكەندىگى – قوعامنىڭ عىلىم-بىلىمگە دەگەن سانالى كوزقاراسى. ال عىلىمعا دەگەن نەمقۇرايلى كوزقاراس قوعامنىڭ دامۋىن ارتقا تارتىپ، كوشىمىزدى كەنجەلەتەتىنى ءسوزسىز. «ۇستازعا قۇرمەتسىزدىك – عىلىمعا قۇرمەتسىزدىك» دەمەكشى، الەمدىك يۋنەسكو ۇيىمىنىڭ 1966 جىلعى ءمۇعالىم ءمارتەبەسى جونىندە: «مەملەكەتتەرگە مىناداي نورمانى قاراستىرۋ قاجەت: ەگەر پەداگوگتىڭ باسى داۋعا قالاتىن بولسا، وعان بايلانىستى داۋ، تەرگەۋدىڭ بارىسى جانە ول ءجونىندەگى قابىلدانعان شەشىمدى جاريالاۋعا رۇقساتتى تەك پەداگوگتىڭ ءوزى بەرۋى كەرەك» دەپ ايتىلعان ۇسىنىسى مۇعالىمدەردى قۇقىقتىق جاعىنان ەرەكشە قورعايتىن نورما بولىپ تابىلادى.
ءمۇعالىم مارتەبەسى – مەملەكەتتىڭ مارتەبەسى. ول بولاشاق پرەزيدەنتتىڭ، عارىشكەردىڭ، ينجەنەردىڭ، عالىمنىڭ، مەملەكەتىمىزدىڭ كەز كەلگەن ازاماتىنىڭ ءومىر جولىنا جولداما بەرەتىن تۇلعا. قابىلدانعان زاڭدى قاي جاعىنان الساڭىز دا، ساياسي جانە الەۋمەتتىك ءمانى تەرەڭ، اۋقىمى ۇلكەن. ءيا، ءقازىر باسەكەلەستىكتىڭ، دامىعان تەحنولوگيالار زامانى. الەمدەگى بارلىق جاڭاشىلدىقتىڭ ءبارى وسى ءبىلىم-عىلىم ارقىلى جۇزەگە اساتىنى بەلگىلى. مىنە، ەڭ باستىسى ءبىلىمنىڭ قاينار كوزى عىلىمنىڭ وسۋىنە ەداۋىر سەپتىگىن تيگىزەءتىنى ءسوزسىز. عىلىم دامىسا، قوعام دا داميتىنى اقيقات.
ءبىز، «№187 جالپى ءبىلىم بەرەتىن مەكتەپ» ۇجىمى «پەداگوگ مارتەبەسى» زاڭىن تولىق قولداپ قۋاتتايمىز جانە ماڭداي تەرىمىزدى سالىپ، ايانباي جۇمىس ىستەيمىز. «بۇل – بولاشاعىمىزعا قۇيىلعان ينۆەستيسيا!» دەپ بىلەمىز. وقۋشىلارىمىزعا ساپالى ءبىلىم بەرىپ قانا قويماي، ءوزىمىز دە ۇزدىكسىز تال بەسىكتەن جەر بەسىككە دەيىن ءبىلىمىمىزدى جالعاستىرىپ، ۇستاز دەگەن ارداقتى اتىمىزدى ابىرويمەن ارقالايمىز دەگەن بەك سەنىمدەمىز.
ينديرا ەرجىگىتوۆا
ناۋرىزباي اۋدانىنداعى №187 جالپى ءبىلىم بەرەتىن مەكتەپ ديرەكتورىنىڭ مىندەتىن اتقارۋشى
نۇرسۇلتان امىربەك ديرەكتوردىڭ وقۋ ءىسى جونىندەگى ورىنباسارى
You Might Also Like
-
ادام بالاسىنىڭ ءبىلىم الۋ ساتىسىندا ەكى جاۋاپتى كەزەڭ بار. ارينە ولار مەكتەپ جانە ۋنيۆەرسيتەت. بالالىق شاعىڭ، نەگىزگى ءبىلىمىڭ مەكتەپتە وتسە، ونىڭ دامۋى ەكىنشى كەزەڭدە جالعاسپاق. بۇل سەنىڭ جاڭا...
-
وزدەرىڭىز بىلەتىندەي، تەحنوگەندىك اپاتتان زارداپ شەككەن ماقتاارال ەلىنىڭ وقۋشىلارى كانيكۋلىن ءتيىمدى ۇيىمداستىرۋ ماقساتىندا ءبىلىم جانە عىلىم مينيسترلىگى باستاماسىمەن رەسپۋبليكاداعى بەلدى وقۋ-ساۋىقتى...
