InfoHub Logo

سي سزينپين قازاقستانعا اۋىلداعى تۋىستان دا ءجيى كەلەدى دەگەن ءسوز ەل ىشىندە ازىلگە اينالعانىمەن، بۇل جۇڭگو مەن ورتالىق ازيا اراسىنداعى قاتىناستىڭ قانشالىقتى تىعىز ەكەنىن كورسەتەدى. سوڭعى جىلدارى قحر باسشىسى استاناعا بىرنەشە رەت كەلىپ، ماڭىزدى سامميتتەرگە قاتىسىپ ءجۇر. ەندى الداعى ۋاقىتتا استانادا وتەتىن “ورتالىق ازيا – جۇڭگو” ەكىنشى ءسامميتى وسى قاتىناستاردىڭ جاڭا باعىتىن ايقىنداپ بەرمەك.

ۆيزاسىز رەجيم – سەنىم مەن ساۋدانىڭ بەلگىسى
جۇڭگو بىرنەشە ورتالىق ازيا ەلدەرىمەن، ونىڭ ىشىندە قازاقستانمەن ۆيزاسىز رەجيمدى ەنگىزىپ ۇلگەردى. بۇل ءتۋريزمدى، ىسكەرلىك ساپارلاردى، وقۋ جانە مادەني بايلانىستاردى جەڭىلدەتىپ وتىر. ەكونوميكالىق ساراپشىلاردىڭ پىكىرىنشە، ۆيزاسىز رەجيم ەكىجاقتى ساۋدا كولەمىن ايتارلىقتاي ارتتىرۋعا مۇمكىندىك بەرەدى.

ورتاق سۋ رەسۋرستارى – كۇردەلى، ءبىراق قاجەت ماسەلە
سۋ ماسەلەسى – ورتالىق ازياداعى ەڭ سەزىمتال تاقىرىپتاردىڭ ءبىرى. جۇڭگو مەن قازاقستان اراسىندا ىلە مەن ەرتىس وزەندەرى بويىنشا سۋ اعىسىنىڭ ءادىل ءبولىنۋى، ەكولوگيالىق قاۋىپسىزدىك سياقتى ماسەلەلەر كۇن تارتىبىندە تۇر. وسى سامميتتە بۇل تاقىرىپ جابىق ەسىك جاعدايىندا تالقىلانۋى ىقتيمال. ايماقتىق تۇراقتىلىق ءۇشىن بۇل – اسا ماڭىزدى.

“ورتا ءدالىز” – جۇڭگو ءۇشىن بالاما جول
“ءبىر بەلدەۋ – ءبىر جول” باستاماسىنىڭ اياسىندا ورتالىق ازيا ترانزيتتىك حابقا اينالىپ كەلەدى. رەسەيگە بالاما رەتىندە قاراستىرىلاتىن ورتا ءدالىز جۇڭگو–ەۋروپا باعىتىنداعى ستراتەگيالىق ساۋدا جولىنا اينالۋى مۇمكىن. قازاقستان ءۇشىن بۇل – ينفراقۇرىلىمعا ينۆەستيسيا تارتۋ، لوگيستيكا مەن ەكسپورت كولەمىن ارتتىرۋ مۇمكىندىگى.

بۇل كىمگە ءتيىمدى؟
قىتايعا – ساياسي ىقپالىن كۇشەيتۋ جانە ترانزيتتىك ارتىقشىلىق الۋ.
ورتالىق ازيا ەلدەرىنە – نارىققا قول جەتكىزۋ، ينۆەستيسيا تارتۋ، جۇمىس ورىندارىن اشۋ.
ءبىراق ساراپشىلار قارىزدىق تاۋەلدىلىك، ەكولوگيالىق ءقاۋىپ، گەوساياسي تەڭسىزدىك ءقاۋپىن دە ەسكەرۋگە شاقىرادى.

جۇڭگو مەن ورتالىق ازيا اراسىنداعى بايلانىس جاڭا ساپالى كەزەڭگە ءوتىپ جاتىر. ۆيزاسىز رەجيم، ورتاق سۋ جۇيەسى، ترانزيت دالىزدەرى – مۇنىڭ ءبارى سىرت كوزگە تەك ەكونوميكالىق جوبا كورىنۋى مۇمكىن. الايدا بۇل كەلىسىمدەر ايماقتىڭ بولاشاعىنا تىكەلەي اسەر ەتەتىن كۇردەلى ساياسي شەشىمدەرگە اينالۋدا.