ۆيسە-مينيستر ءبىلىم سالاسىنا قاتىستى تاراعان قاۋەسەتتەرگە جاۋاپ بەردى
قازاقستاندا جوعارى وقۋ ورىندارى سانى تىم كوپ دەگەن پىكىرلەر نەگىزسىز. بۇل تۋرالى جوعارى ءبىلىم بەرۋ جۇيەسىن دامىتۋ تاقىرىبىنداعى دوڭگەلەك ۇستەلدە ءبىلىم جانە عىلىم ۆيسە-مينيسترى اسحات ايماعامبەتوۆ ءمالىم ەتتى.
«ءبىزدىڭ قوعامدا بىلىمگە قاتىستى ءتۇرلى اڭىزدار ايتىلىپ ءجۇر. قازاقستاندا جوعارى وقۋ ورىندارى تىم كوپ دەگەن پىكىرلەر ءجيى كەزدەسەدى. بىزدە قازىرگى كەزدە 130 جوو بار. ەگەر دە حالىقتىڭ جان باسىنا شاقساق ءارى جالپى كولەمگە نازار اۋدارساق، وندا فرانسيادا 500-دەن استام، اقش-تا 5 مىڭعا جۋىق، ال بىزدە 130. بۇل تۇرعىدا ابساليۋتتىك كورسەتكىشتەرگە ەمەس، حالىققا شاققانداعى كوەففيسيەنتكە قاراعان ابزال. وسى ورايدا بىزدە جوعارى وقۋ ورىندارى سونشالىقتى كوپ ەمەس ەكەنىن بايقايمىز. نەگىزى، ماسەلەنىڭ ءمانى ساندا ەمەس، ساپادا ەكەنىن ءتۇسىنۋ كەرەك»، - دەدى اسحات ايماعامبەتوۆ.
بۇدان كەيىن ول ەلىمىزدەگى ستۋدەنتتەر سانىنا قاتىستى ايتىلىپ جۇرگەن قاۋەسەتتەرگە توقتالدى.
«تاعى بىرەۋلەر بىزدە ستۋدەنتتەر تىم كوپ ەكەنىن العا تارتۋدا. شىندىعىندا، ەلىمىزدەگى ستۋدەنتتەر سانى ەكونوميكالىق ىنتىماقتاستىق جانە دامۋ ۇيىمى ەلدەرىمەن سالىستىرعاندا بىرنەشە از. كەرىسىنشە بۇگىندە بىزگە وسى باعىتتى دامىتۋ كەرەكتىگىن ايتۋدامىز»، - دەپ ويىن ءبىلدىردى ۆيسە-مينيستر.
سونىمەن قاتار ول قازىرگى كەزدە ءبىلىم سالاسىنا شامادان ارتىق قارجى ءبولىنىپ جاتقاندىعى قوعامدا ءسوز بولعاندىعىنا توقتالدى.
«ناقتىراق ايتقاندا، قارجى جالپى ىشكى ونىمنەن 3 پايىزدان ءسال استام دەڭگەيدە بولىنۋدە. ال ەگەر جوعارى بىلىمگە توقتالساق، وندا ونىڭ ۇلەسى ايتارلىقتاي تومەن. سوندىقتان قوعامدا كوتەرىلىپ جۇرگەن نەگىزگى ماسەلەلەردى بىلەمىز جانە سول باعىتتاردا جۇمىستاردى جالعاستىرۋدامىز»، - دەدى ءمينيستردىڭ ورىنباسارى.
قازاقپارات
You Might Also Like
-
ماعان ايتىپ بەرسەڭ-ۇمىتىپ قالامىن، كورسەتسەڭ-ەسىمدە ساقتايمىن، وزىمە جاساتساڭ ۇيرەنەمىن.
-
قازاقستاندا جوعارى ءبىلىم بار ادامداردى كوبىرەك دايارلاۋعا ەكپىن قويىلادى. بۇل تۋرالى ءبىلىم جانە عىلىم ۆيسە-مينيسترى اسحات ايماعامبەتوۆ ءمالىم ەتتى.
