InfoHub Logo

بۇرىنعى زاماندا ءبىر بايدىڭ ءبىر يت، ءبىر مىسىعى بار ەكەن. ءيتى كارى، مىسىعى جاس ەكەن. كۇندەردىڭ بىرىندە الگى باي يت پەن مىسىققا جۇمىس تاپسىرىپتى. ول:

— ەكەۋلەرىڭ انا اۋىلداعى قىزىما مىنا التىن جۇزىكتى اپارىپ كەلىڭدەر، مىسىق سەن جۇزىكتى الىپ ءجۇر. يت ساعان جول باستاسىن، ساقتانىپ جۇرىڭدەر، جۇزىكتى جوعالتىپ قويماڭدار، — دەيدى.

ولار جولعا شىعىپ، جارىم جولعا كەلگەندە الدارىنان ءبىر وزەن كەز بولادى. وزەندە كوپىر جوق ەكەن، سونان ولار وزەننەن مالتاپ وتبەك بولادى. مىسىقتىڭ مالتاۋعا ونشا شەبەر ەمەس ەكەنىن بىلەتىن يت جۇزىكتەن الاڭداپ:

— ەي، مىسىق، وزەننەن وتكەنشە جۇزىكتى ماعان بەر، سەن جوعالتىپ الاسىڭ، — دەيدى.

— بولمايدى، — دەيدى مىسىق، — قوجايىن ماعان: «جۇزىكتى سەن الىپ ءجۇر» دەگەن، ساعان بەرە المايمىن.

— مەن ساعان قاراعاندا مۇقياتتاۋمىن، وزەننەن وتكەنشە جۇزىكتى ماعان بەر، اۋزىما سالىپ الايىن، وزەننەن وتكەن سوڭ وزىڭە بەرەمىن، — دەيدى يت.

اقىرى، مىسىق جۇزىكتى يتكە بەرەدى. ولار وزەننىڭ ورتان بەلىنە بارعاندا يت:

— ويباي! جۇزىك اۋزىمنان ءتۇسىپ كەتتى، — دەيدى.

— ەندى قايتتىك! — دەيدى مىسىق.

— مەن ىزدەپ كورەيىن — دەيدى يت. الايدا قانشا ىزدەگەنىمەن جۇزىكتى تابا المايدى. اقىرى ولار جاعدايدى قوجايىنعا ايتۋ ءۇشىن ۇيگە قايتادى. ۇيگە تاياعاندا يت جازالانۋدان قورقىپ، ورمانعا كىرىپ، عايىپ بولادى.

مىسىقتىڭ تەز قايتىپ كەلگەندىگىن كورگەن قوجايىن الاڭداپ:

— يت قايدا؟ — دەيدى.

— جۇزىكتى جوعالتىپ قويىپ قاشىپ كەتتى، — دەيدى مىسىق. اشۋلانعان باي ءيتتىڭ تاناۋىن تارتپاق بولىپ، اۋىلداعى باسقا يتتەردى جيناپ الىپ ولارعا:

— قايتسەڭدەر دە الگى ءيتتى تاۋىپ كەلىڭدەر، — دەيدى.

— ءبىز ول ءيتتى باسقا بەيۋاز يتتەردەن قالاي پارىقتايمىز؟ — دەپ سۇرايدى الگى يتتەر.

— ول ەرەكشە قارتايىپ كەتكەن، اۋزىندا ءبىر دە ءتىس جوق، سەندەر ونىڭ تىسىنە قاراساڭدار، وڭاي تاني الاسىڭدار، — دەيدى باي.

سونىمەن، يتتەردىڭ بارلىعىن الگى كارى ءيتتى ۇستاپ كەلۋ ءۇشىن جان-جاقتان ىزدەۋگە اتتاندىرادى. تالاي تاۋ-تاستى باسىپ ىزدەۋگە اتتانادى. ولار تالاي تاۋ-تاستى باسىپ، وزەن-توعايدى ارالاپ، الىس-جاقىنداعى قالالاردىڭ بارلىعىنا بارادى. الايدا الگى ءيتتى ەشقانداي جەردەن تابا المايدى. كۇنى بۇگىنگە دەيىن يتتەر التىن جۇزىكتى، سول ءيتتى تابا الماپتى. سول ءۇشىن ءقازىر دە يتتەر ءبىرىن-بىرى كورىپ كەزدەسە قالعاندا «بايدىڭ التىن جۇزىگىن جوعالتقان يت مەن ەمەس، سەنبەسەڭ قاراپ كور، ءتىسىم ساۋ» دەپ تىستەرىن اقسيتىپ، ىرىلداپ قويادى ەكەن.

---