InfoHub Logo

سوناۋ ەرتە زاماندا قوياننىڭ قۇيرىعى ۇزىن بولعان ەكەن. ەندەشە، قوياننىڭ قۇيرىعى ءقازىر قالايشا شولاق بولىپ قالعان؟ بۇل جونىندە ەل اۋزىندا تارالىپ جۇرگەن مىناداي ەرتەك بار.

ەرتەدە ەكى قويان ءبىر وزەن بويىندا اسىر سالىپ ويناپ ءجۇرىپ، قارسى جاعاداعى جايقالىپ تۇرعان كوكبەڭبەك ءشوپتى كورىپ قالادى. ولار: «وزەننەن ءوتىپ اتتەڭ قۇماردان شىققانشا جەسەك»، — دەپ ويلايدى. ءبىراق ەكى قويان سۋدا جۇزە بىلمەيتىندىكتەن وزەننەن ءوتۋدىڭ ەشقانداي شاراسىن تابا المايدى.

ولار ءسويتىپ تۇرعاندا، سۋ باياۋ تولقىپ، ءبىر ۇلكەن تاسباقا شۇر-شۇر ەتىپ سۋ بەتىنە شىعا كەلەدى. تاسباقانى كورگەن قوياندار بىر-بىرىنە قاراپ، كوزدەرىن الاقتاتىپ، سۋدان ءوتۋدىڭ ءبىر ايلاسىن ويلاپ تابادى:

— تاسباقا اجەي، وسى وزەندى ءسىزدىڭ اۋلەتىڭىز سۇرايدى دەسەدى عوي، راس پا؟ — دەيدى. مۇنى ەستىگەن تاسباقا اجەي قاتتى قۋانىپ:

— ول راس، بۇل وزەندە مەنىڭ اۋلەتىم سان جەتكىسىز. ەگەر ولار وزەننىڭ بەتىنە قاز-قاتار قالقىپ تۇرا قالسا، ەكى قاتار كوپىر بولادى، — دەيدى.

اۋلەتىڭىزدىڭ سونشالىق كوپتىگىنە كوزىم جەتپەيدى، قالايدا ءبىزدىڭ اۋلەتتەن كوپ بولماس، — دەيدى قويان.

— سەندەردىڭ اۋلەتتەرىڭ سونشاما كوپ بولسا، مەن قالايشا كورمەيمىن؟-دەيدى تاسباقا.

— ەگەر ءبىزدىڭ بالالارىمىز تۇگەل وسىندا كەلسە، وزەننىڭ جاعاسىنا سىيماي قالۋى مۇمكىن، — دەيدى ەندى ءبىر قويان.

— ماقتانىپ تۇرعان شىعارسىڭدار، — دەيدى تاسباقا.

— سەنبەسەڭىز، ءوزارا سالىستىرىپ كورەيىك، كىمنىڭ اۋلەتىنىڭ كوپ ەكەنىن سوندا ءبىراق بىلەسىز، — دەيدى قويانداردىڭ بىرەۋى.

— بۇل نە دەگەنىڭىز، ولاردى قايتىپ سالىستىرۋعا بولسىن؟ — دەيدى تاسباقا.

— الدىمەن ءسىز اۋلەتىڭىزدى شاقىرىپ كەلىڭىز، سۋ بەتىن قالقىپ، وزەننىڭ مىنا شەتىنەن انا شەتىنە دەيىن ساناپ شىعامىز. ساناپ بولعان سوڭ، ءبىز دە اۋلەتتەرىمىزدى جيناپ كەلىپ، وزەننىڭ جاعاسىنا قاتار تۇرعىزامىز، سونان ءسىز ساناپ شىعارسىز، — دەيدى ءبىر قويان.

— بولادى، — دەپ تاسباقا وزەنگە شوگىپ كەتىپ، اۋلەتتەرىن تۇگەل شاقىرىپ كەلىپ، بەتىنە ەكى قاتار ەتىپ، تىزە قويادى. ولار ايتىپ-ايتباي وزەنگە سالىنعان ەكى قاتار كوپىر بولا قالادى.

ەكى قويان قاتار سالىنعان «تاسباقا كوپىرگە» شىعىپ، اربىرەۋى ءبىر قاتارىن ساناعان بولىپ، قارسى جاعاعا ىلىنەدى. «قۋلىعىمىزدى اسىردىق»، — دەپ ويلاعان ەكى قويان جاعاعا شىعا بەرىپ:

— بىزدە قايدان ونشالىق كوپ اۋلەت بولسىن، ماقساتقا جەتتىك ايتەۋ، — دەيدى. ءبىراق بۇل كەزدە ەكى قويان سەكىرىپ جاعاعا شىققانىمەن، ولاردىڭ شۇباتىلعان ۇزىن قۇيرىقتارى سۋدان ءالى شىعىپ بولماعان ەدى. قويانداردىڭ الگى ءسوزىن ەستىپ قالعان تاسباقالار ەكى قوياننىڭ قۇيرىعىنان الا تۇسەدى. ساسقالاقتاعان ەكى قويان جۇلقي تارتقاندا قۇيرىقتارى تۇبىنەن ءۇزىلىپ، شولاق بولىپ قالادى.

كەيىن بۇل ەكى قويان كوپ اۋلەتتى بولادى. ءبىراق كوجەكتەرى مەن نەمەرە-شوبەرەلەرىنىڭ بارلىعى شولاق قۇيرىق بولىپ تۋىلادى.

---